تعالو نفتكر مع بعض

[hazem_khidr]

لو استثنيت الحكات و الخرابيش اللي غالبا مش بيبقي ليا ذنب فيها
يبقي كده عندي حوالي اربع خمس خبطات كلها كانت بال 125 المأسوف علي شبابها.
اول خبطه كنت بتعلم ازاي ادخل من شارع رئيسي علي شارع فرعي علي سرعه 80
و اكون ضاغط علي الفرامل اهدي بيها و طبعا الطبرياج علشان العربيه ما تبطلشو البنزين علشان لما ادخل اقوم شايل رجلي من الفرامل يكون عندي عزم في العربيه تقوم العربيه منطلقه بسرعه !!!!!!!!!!!!
(طبعا دا حاجات خطرو كنت بعملها وا نا طفل طايش عندي 15 سنه)
المهم اخدت الملف و كله تمام بس كانت مشكله ان فيه رمل علي الارض و العربيه كانت بتموت في الزحلقه لقيت العربيه بتزحلق مني و تزحلق و داخله في كشك كهرباء في الشارع!!!!!!!!!!
و قمت لافف الدركسيون في اتجاره العربيه في محاوله مني اني ما اخبطش لكن لا تأتي الرياح بما تشتهي الانفس
قمت خابط بالفرده الشمال في الرصيف و نزلت بصيت للعربيه ما لقتش فيها ولا خدش
قولت الحمد لله و ركبت تاني اعدل الدركسيون و بتحرك لقيت الدركسيون تقيل جداااااااااا و كل ما افك ايدي من عليه الاقيه يقوم لافف ناحيه الشمال بغابء
قمت واخد العربيه و روحت للعفشجي قولت يكون فيها زوايا ولا حاجه
المهم العفشجي قالي دا الجنط اتعوج و المقص اتني و فرده الشاسيه اتكسرت !!!!!!!!
يالهووووووووووووووووووووو ووووووي
اقولهم ايه في البيت اقولهم ايه في البيت اقولهم ايه في البيت
بقيت مش علي بعضي المهم فكينا و جاب بتاع شكمانات يعمل فرده الشاسيه و المقص اتعدل
و قمت متصل بوالدي قولتله انا عند العفشجي تعلالي
جه و فحكيت له ان ماشي في امان الله و تاكسي وقف قدامي فضربت فرامل جامد
لقيت الدركسيون بيلف في ايدي و العربيه طلعت فوق الرصيف فالجنط باظ من كده و المقص كمان
طب ايه اللي خلي العربيه تطلع فوق الرصيف ؟؟
ماهو يا بابا لما ضربت فرمله جامده فرده الشاسيه كانت دايبه ففكت من مكانها فعجله القياده اختلت في ايدي
و الحمد لله انها جات علي قد كده انا شفت الموت بعنيا بسبب عربيتك دي هههههههه
قام رادد قالي و انت حد قالك تاخد العربيه و تشوف فيها الموت
ههههههههههههههههههههه
المهم دخلت عليه و بكده يكون عدي اول خبطه في حياتي
الي اللقاء في حلقه اخري

[alymonir]

موضوع شيق كالعادة يا أستاذ أحمد و مشاركات جميلة من أحلى أعضاء في المنتدى
و سامحوني على قلة الكتابة اليومين دول لأن عندي حالة زهق من العربيات مش عارف ليه
المهم
الحمد لله الحمد لله عمري ما عملت حادثة بالعربية و أنا سايق من أول ما اتعلمت السواقة و كل الخرابيش اللي حصلت في أي عربية ركبتها كانت وهي واقفة أو حد تاني سايقها
ودي مش شطارة مني دا ستر من ربنا
بس حاحكيلكم على حادثة أليمة حصلت معايا في عربية والدي
كان معايا عربية والدي ( دوجان 1994 ) و كنت ساعتها في تانية كلية ( حوالي سنة 2000 أو 2001 مش فاكر بالضبط ) و كنت باذاكر عند واحد صاحبي و كنا سهرانين لحد وقت متأخر المهم كنت مروح حوال الساعة اتنين بالليل و صاحبي طقت في دماغه يجرب يسوق العربية و ياخذ لفة ( زيرو ) و على الرغم من اني مابحبش أبدا حد يسوق عربيتي ولا أسوق عربية حد بس ساعة القدر يعمى البصر , وافقت على مضض و الحاح من صاحبي , وكان بيدعي ان هو سواق من زمان و كان بيسوق عربية واحد صاحبه في المصيف ( على فكرة ساعتها ماكانش معاه رخصة ولا عنده عربية )
المهم
ركب العربية و جاب الأول و بدأ يلف في الشوارع الضيقة حول بيته , و أنا أيدي على قلبي و الايد التانية كانت على فرامل اليد
لاحظت ان هو مابينقلش و ماشي على الأول بس و صوت الموتور بيعلى قلتله ماتنقل يابني واللا مش عارف
قاللي لأ طبعا عارف بس هو فين الدبرياج , مش هو دة اللي على الشمال برضه
طبعا مالحقتش أندهش أو استغرب لأنه عند تاني ملف حاول يضرب فرامل ضغط على البنزين و الشبشب في رجله علق معاه و هوب طاخ طيخ طوخ مش عارف ايه اللي حصل لاقينا نفسنا فوق رصيف و داخلين في حيطة و عربية متغطية أكلنا وشها كله تقريبا
المهم باقي الحكاية مفجع و أليم خصوصا إن الساعة كانت حوال تلاتة الفجر و الراجل طبعا نزل مخضوض
و بالمناسبة العربية بتاعته كانت مرسيدس و كان متمسك باصلاحها في التوكيل , و ابنه كان بيلعب كمال أجسام و كان متزرزر جدا و كنا حاناخد علقة محترمة
و طبعا صاحبكو شال الليلة لأن صاحبي زي ما قلتلكو ماكانش معاه رخصة يعني كان حايروح في حديد
المهم الموضوع رسي على ثلاث ألاف جنيه و تأنيب مستمر من والدي ووالدتي لأن هما كانوا متأكدين أني مابركبش حد عربيتي , بس القدر
الحمد لله

[احمد بدر1978]

تانى حادثة
كنت فى رمضان قبل الفطار كان ورايا مشوار ضرورى لمصر كان معايا وقتها تويوتا عيون وعلى الطريق الصحراوى لاقيت ترلا الى سايق بيتطوح انا قلت امسك شمال عشان قول ما يطلع اسحب انا لقيتة قفل الشمال قلت اروح يمين قفل اليمين قلت اصبر شوية لما اعرف اخرة اية لسة حهدى واضرب فرامل لقيت الباشا قفل السكة وعرض العربية دخلت فى الدوبل اللى ورا والعربية لفت ونزلت تحت التريلا وقابل خبطات من اللى جايين ورايا تقريبا خمسين عربية انا فقت فى المستشفى بعد اربع ايام ربنا كتبلى عمر جديد عشان اتعرف على احلى منتدى
اتارى الباشا كان متلخبط فى السكة وواخد الفتحة بالشبه
الحادثة دى مات فيه 7 افرادا نا اللى نجدنى انى لما خبطت فى الدوبل الورانى للتريلا ان رجعت كسرت الكرسى بتاعى فنام الكرسى
بالنسبة للعربية اللى اتبقا منها الكنبة والرفرف الشمال خلفى والفانوس الخلفى شمال والكرسى اللى جنبى بس بعت العربية دى ب 7الاف جنية
و للحديث بقية

[POSH3ER]

اول حادسة لية كنت ماشي بعربية 132 و كان قدامي ميكروباص و مرة واحدة لقيتة وقف لحقت الدنيا ع اخر لحظة و طلعت جنبة ام جاي عشان يأكدلي غباءة فتح الباب و انا كنت يعتبر لازق فية هوب خدت الباب بتاعة و طلعنا رحلة و المهم هو الي كان بيزعق لما الناس كانت هاتقوم تاكلة مش انا

التانية كنا ع السؤيع و قدامي و احدة ست كنت ماشي ف الحارة الي ف النص فادتني اشارة يمين قمت طالع ع الشمال بتاعها و بعد م الكبوت بتاعي كلة كان جنبها جت عليا ف الشمال و عربيتها لفت و ستر ربنا انها ما اتقلبتش بيها (كنت اول مرة اشوف حد يدي اشارة يمين و يجي شمال)
لسة فاضل كتير

[احمد بدر1978]

المشاركة الأصلية كتبت بواسطة POSH3ER اول حادسة لية كنت ماشي بعربية 132 و كان قدامي ميكروباص و مرة واحدة لقيتة وقف لحقت الدنيا ع اخر لحظة و طلعت جنبة ام جاي عشان يأكدلي غباءة فتح الباب و انا كنت يعتبر لازق فية هوب خدت الباب بتاعة و طلعنا رحلة و المهم هو الي كان بيزعق لما الناس كانت هاتقوم تاكلة مش انا التانية كنا ع السؤيع و قدامي و احدة ست كنت ماشي ف الحارة الي ف النص فادتني اشارة يمين قمت طالع ع الشمال بتاعها و بعد م الكبوت بتاعي كلة كان جنبها جت عليا ف الشمال و عربيتها لفت و ستر ربنا انها ما اتقلبتش بيها (كنت اول مرة اشوف حد يدي اشارة يمين و يجي شمال) لسة فاضل كتير

هوة دة اسلوب الستات فى سواقتهم التموية تيجى يمين وتديك اشارة شمال
خداع استراتيجى