فيرنا ام لانوس ام لوجان افيدوني ارجوكم

[osama-x]

المشاركة الأصلية كتبت بواسطة sherifabden انا احترت جدااااا بين التلات عربيات دول كل عربية فيها ميزة تخليها حلوة لكن بعد كده اكتشف عيب مقرف فيها انا يهمني ان العربية تكون كالاتي : 1 عالية عن الارض ودي اهم حاجة لان المنطقة بتاعتي مليانة جبال مش مطبات 2 الشنطة تكون واسعة 3 الكنبة الخلفية تكون واسعة جداا 4 تكييف قوي جداا 5 كاسيت وسماعات ممتازين 6 قطع غيارها متوفرة 7 ثابتة جدا ع السرعات العالية لاني بحب اجري بالعربية واقفل العداد 8 فرامل تكون قوية 9 تكون فيها وسائل امات تحمي السيارة من السرقة والركاب من الحوادث 10 مريحة في السفر لاني بسافر كتير 11 استهلاك بنزين معقول هل المواصفات اللي فوق موجودة في انهي عربية ؟؟؟ اللانوس ام اللوجان ام الفيرنا ارجوا الاجابة من الاعضاء المحترمين وشكرا

1 اللوجان اعلى واحدة و دي اكتر ميزة فيها بالنسبه لشوارعنا اللي عايزة الحرق
2 اللوجان 510 فرنا 390 لانوس 322
3 لوجان
4 تقريبا تكييف اللوجان نفس الفيرنا واعلي من الانوس بس طبعا بعد التليين
5 مش هفتي فيها لاني مش بحسبها بالديسيبل وتقريبا زي بعض و ممكن لو مش عاجبك ركب ساوند سيستم ب 3000 و عيش يا برنجي
6 الفيرنا و الانوس قطع غيارها ممكن تلاقيها عند بتاع الصيدلية و اللوجان قطع غيارها حلوة و مش غالية و مع انتشارها اللي بيزيد كل يوم هترخص اكتر
7 الفيرنا و الانوس لو هتفكر تعدي 130 شيك على الابواب و اقفل الشبابيك علشان ممكن تتحدف بره العربية اللوجان ثابتة ل 185 و ممكن تعدي بس بلاش السرعات العالية قوي دي لسلامتك انت و الحواليك مع اني مش بمشي بالنصيحة دي بس بلاش و ربنا يهدينا
8 بردو مش هفتي في دي لاني مش عارف
9 اللوجان وساده هوائية للسواق الفيرنا و الانوس مفيش
10 نفس كلام رقم 7
11 اللوجان 7.9 لكل 100كم الفيرنا 20 لكل 100كم!! الانوس 6.4 لكل 100كم

من الاخر كده لوجان و اشتري دماغك و ربنا يديك خير العربية اللي هتجيبها و يبعدك عن شرها

[luckyman]

انا مجرب الفيرنا واللانوس لكن اللوجان صديق ليا معاه واحدة وبيشكر فيها
المواصفات اللى حضرتك عايزها مش موجودة فى ولا عربية بس اعتقد اكثرهم قربا لطلبك وجودة هى اللوجان هذا والله اعلم وبالتوفيق

[tham1010]

مفيش عربية فيها كل حاجة أنت عاوزها. وبالأخص أنك مختار 3 عربيات مش غالية قوى إذا لا تتوقع أن يكون فيها كل حاجة. لو عاوز حاجة كويسة يبقى فولكس فاجن ( بولوا أو جولف) ولكن تعمل حسابك على 140 الف وأنت طالع..

لو الحال على القد يبقى أحسن الثلاث عربيات التى قلت عليها هى لوجان ولكن قطع الغيار غالية...

[حازم وجدي]

المشاركة الأصلية كتبت بواسطة sherifabden انا احترت جدااااا بين التلات عربيات دول كل عربية فيها ميزة تخليها حلوة لكن بعد كده اكتشف عيب مقرف فيها انا يهمني ان العربية تكون كالاتي : 1 عالية عن الارض ودي اهم حاجة لان المنطقة بتاعتي مليانة جبال مش مطبات 2 الشنطة تكون واسعة 3 الكنبة الخلفية تكون واسعة جداا 4 تكييف قوي جداا 5 كاسيت وسماعات ممتازين 6 قطع غيارها متوفرة 7 ثابتة جدا ع السرعات العالية لاني بحب اجري بالعربية واقفل العداد 8 فرامل تكون قوية 9 تكون فيها وسائل امات تحمي السيارة من السرقة والركاب من الحوادث 10 مريحة في السفر لاني بسافر كتير 11 استهلاك بنزين معقول هل المواصفات اللي فوق موجودة في انهي عربية ؟؟؟ اللانوس ام اللوجان ام الفيرنا ارجوا الاجابة من الاعضاء المحترمين وشكرا

بص في الاول انت مقسمها نقط وده كويس بس انت كده هاتزود حيرتك عشان الاتي
1- لو في الارتفاع ومساحة الكنبه الخلفيه ومساحة الشنطه يبقى اللوجان
2- لو في التكييف تقريبا كله قريب مب بعضه وان كانت اللانوس اضعهفم
3- الكاسيت والسماعات كلهم عاديين ومفهمش اي اختلاف وتقريبا الكاسيت للفيرنا واللانوس واحد وحسب الكماليات في اللوجان عشان في منها بدون كماليات خالص
4- قطع غيار متوفره الفيرنا واللانوس زي ماتقال يتباع في الصيدليات واسعار اقل مقارنه باللوجان وتوافر لقطع غيار اقل للوجان
5- بالنسبه للجري فانت بتتكلم في فيرنا هي اقوي موتور 106 حصان ويجي من بعده اللوجان 90 حصان ثم اللانوس 85 حصان بس هاتفرق معاك في الشد من الارض لكن TOP SBEED كله هايكون واحد تقريبا
6 - اما بالنسبه للثبات فالفيرنا اقلهم رغم قوتها الجباره على حجمها والحل بيكون انك تجنطها جنوط 14 واللانوس ثابته قوي على الطريق جدا لحد 160و 170 اما اللوجان فانا مجربتهاش على السرعات العاليه فمقدرش احكم على ثباتها
7- فرامل الفيرنا واللانوس لا يعتمد عليهم بالمره اعتقد اللوجان افضل
8- وسائل حماية من السرقه بيختلف على حسب الاوبشن واعتقد كلهم واحد وبتتحكم فيها انت بعد كده
9- وسائل الامان اللوجان بها ايرباج والفيرنا واللانوس لأ
10- الراحه في السفر التلات عربيات جداد ومكيفين وركوبتهم مريحه
11- استهلاك بنزين في التلاته جيد جدا وليس زي ماتقال ان الفيرنا 20 لتر في ال100 كييلو دي مكتوبه في كونتكت كار غلط ولكن الواقع 6 لتر واللانوس اعلى في استهلاك البنزين هي واللوجان بفرق لا يلاحظ

في النهايه لو عاوز تسارع ممتاز وقوة ماتور وسعر اعادة بيع وسهوله صيانه وقطع غيار منتشره واعتماديه في البنزين يبقى فيرنا
ولو عاوز ثبات جيد جدا وسهوله صيانه وقطع غيار منتشره واعتماديه في البنزين يبقى لانوس
ولو عاوز امان اكتر وارتفاع عن الارض واتساع في الشنطه والكنبه الخلفيه يبقى لوجان مع ملاحظه عدم ترتيب الاوبشن زي اماكن ازرار الكهرباء للزجاج ومكان الكلاكس
ويارب متكونش الحيره زادت

[eng/walaaeldeen]

السلام عليكم
المواصفات الى انته عايزها مش هتلاقيها في سياره واحده من الثلاثه
لو عايز نصيحتى ولو عايز سياره تجمع اغلب طلباتك اشتري كيا شوما
والله المستعان