سؤال من مبتدئ في السواقه بخصوص السواقه والعربيه((ليجانزا 2002

[romioromio]

الف الف شكر لحضراتكم
معلش يا ريت الناس في المنتدي تستحملني عشان انا سالت كتير وفي كذا موضوع
اصلي جديد بقي وموسوس حبتين وده ارواح ناس برده

[Mohamed Elhasafy]

يا باشا بكرة تسافر و إنت سايب الطارة ... و تقول الحصافى قالى كده و ماصدقتش
نورت المنتدى

[khaled_1993m]

هو ليه الافضل اني اخش علي المطب و انا دايس ديبرياج و بعدين اسقط الحارة المنسبة عن اني امور ؟؟؟!!!

[dr_haitham_ent]

أولا ألف مبروك ع العربية
واعرف ان كل شىء فى أوله صعب
شوية وتعرف دهاليزه و منعرفش نحصلك باذن الله

بالنسبة للقلق و العرق فده عامل مشترك لكل اللى بيتعلم سواقة على كبر
يعنى ماساقشى وهوه صغير أوى
لأن مخزون الخوف والخبرات السلبية السماعية عندنا بيكون كبير قوى
وبياخد كام شهر على مايختفى نهائيا
وكام يوم على مايوصل لدرجة محتملة و تحميك باذن الله من التهور فى الأول

الفنيات بتاعة الكركرة وكدة
نستنى رأى حد خبرة فيها يفيدنا سوا ان شاء الله

[samehsaeed]

بص يا سيدي أنا مش بسوق من كتير بس هقولك رأيي في اللي أعرفه من النقط ديه ولو في أي حاجة مش مظبوطة حد من الإخوة الخبرة هنا في الموقع يبقى يصلح اللي مش مظبوط، بص يا سيدي

المشاركة الأصلية كتبت بواسطة romioromio السلام عليكم انا لسه شاري ليجانزا جديده ومبتدئ الي حد ما في السواقه 1_انا يا جماعه كل لما اجي اخد مطب اكون ماشي علي الرابع مثلا اروح ممور وواكل المطب واروح جايب التاني الاقي العربيه بتكركر زي ما تكون حتنط كده ولما جيت اجرب اهدي خالص عند المطب بس بيكون العربيه فيها سنة حركه يعني موقفتش اروح جايب الاول الاقي العربيه بتتنطنط كده لما ارفع رجلي من الدبرياج ده من ايه يا شباب

1- أولا موضوع إنك كل ما تيجي تاخد مطب تمور ده من وجهة نظري أنت مش محتاج تعمل كده خالص وحقيقة أنا ما شوفتش أي حد بيعمل الموضوع ده ولا حد قالي عليه أساسا مع إني ركبت كتير قوي مع ناس معاها عربيات مانيوال من أصحابي وكنت بخلي كل واحد منهم يعلمني اللي عنده وأنا قاعد جنبه وما حدش قالي على المعلومة ديه خالص وأنا شخصيا مش بعمل كده بس الموضوع برده بيعتمد على كذا حاجة بمعنى
أ- أنت ماشي على الغيار الكام ؟
لو ماشي على الأول أو التاني أو الثالث بس بسرعة مش كبيرة قوي يعني نقول من 50 ل 60 مثلا ده معناه إنك ماشي في وسط البلد يعني مش طريق سريع وده معناه ببساطة إن لو في مطب عندك خيار من 2
1- لو المطب مطب محترم كده وله هيبه يعني 20 سم فيما فوق وواقف شامخ كده في وش أي عربية وأكيد أكيد أنت مش مستغني عن عربيتك عشان تقف قصاده وتاخده على السرعة اللي أنت ماشي عليها فطبعا هتديله احترامه وتهدي على الآخر وطبعا العربية ممكن تنزل سرعتها ل 10 كم أو أقل فأكيد أكيد قبل ما تطلع المطب هتعمل حاجة لازم تعملها وأنا بفضل أعملها دايما وهي إنك تجيب الأول (قبل ما تدخل على المطب أو تطلعه أصلا) وده عشان
- تدخل على المطب وأنت على أهدى سرعة وأكبر عزم- لأن زي ما أنت عارف أن الغيار الأول بتاع أكبر ترس في العربية - وبكده هتتفادى إن العربية تبطل منك مهما هديت من سرعتها لأنها على الغيار الأول اللي هو أصلا مسئول عن تحريك العربية من الثبات يعني من السرعة "صفر" فلو حتى السرعة بقت 5 كم أو 3 كم وأنت نازل من المطب فما تقلقش مش هتقف منك ولا حاجة طبعا ده مثال العربية بتبقى سرعتها أكتر من كده فما تقلقش
- تضمن إن العربية مش هتكركر منك ولا هتنط لأن العربية بتكركر في الموقف ده لأنك بتبقى ممور العربية وفهي كده مش واخدة أي غيار وماشية بقوة الدفع بس ، فلما تيجي تديها التاني لو هي مش على سرعة تنفع تجيب التاني فيها أو بيتجاب بصعوبة يعني لأن سرعة العربية أقل من إنها تاخد الغيار التاني فهتلاقيها يا هتبطل يا هتكركر
بالنسبة بقى لحتة إنك بتهدي خالص زي ما بقولك وإنك لما بترفع رجلك من على الدبرياج العربية بتتنطط ده بيبقى لإنك ممكن تكون رفعت رجلك بسرعة شوية فالعربية بتترج كده لإنها بين إنها بتشاور عقلها تقف ولا تمشي لأنك عارف إنك لو رفعت رجلك بسرعة قوي من على الدبرياج العربية بتنط وتبطل فممكن يكون ده السبب في النقطة ديه فأنت وانت داخل على الطب هات الأول قبليه بمسافة كافية 10 متر مثلا او 5 متر على حسب سرعة الشارع اللي ماشي في وزحمة المكان يعني العوامل المحيطة وحاول ترفع رجلك بالراحة كده من على الدبرياج وواحدة واحدة كده عشان اللي بتحس بيه ده يروح وأنا شايف إن الموضوع شوية تعود بس وهتلاقي نفسك فلة شمعة منورة

ب- شكل المطب أزاي ونوعه؟
(واقف ، عين قطة، كبير ، صغير) وهكذا كل ديه عوامل بتفرق في سرعتك وهل لازم اجيب الأول ولا ممكن اخد المطب بسرعتي عادي لما يكون مطب خفيف كده مجرد اهدي شوية بس.
بس هنا في مصر نادر جدا لما تلاقي مطب مش محتاج تهدي عنده

المشاركة الأصلية كتبت بواسطة romioromio 2_انا ساعات بنسي وامشي وفرامل اليد مرفوعه الاقي العربيه ماشيه عادي

2- لو مشيت وانت ناسي فرامل اليد مرفوعة العربية هتمشي مش هتقول لأ بس هتحسها تقيلة وأنت ماشي وتاني حاجة بعد حبة هتشم ريحة زي شياط كده نتيجة سخونة الفرامل والعجل نتيجة احتكاكهم ببعض وطبعا غلط خالص إنك تمشي وفرامل اليد مرفوعة ولازم تاخد بالك من الموضوع ده عشان ما يعملكش مشاكل كتير بعد كده

المشاركة الأصلية كتبت بواسطة romioromio 3_ساعات بسمع صوت حكه كده او صفاره وانا ماشي وساعات بتروح

3- ممكن تكون الحكة ديه من تيل الفرامل بس لازم تحدد جاية منين والموقف اللي بتسمع فيه الحكة بالظبط وهل بتبقى دايس على الفرامل ولا لأ وكده يعني

المشاركة الأصلية كتبت بواسطة romioromio 4_الاطارات لسه جديده والطريق ناعم جدا بس انا وانا ماشي كانت العربيه بترجرج كده مش عارف ليه هي ثابته بس فيها رجرجه بسيطه كده مش عارف انا موسوس كده ولا في حاجه عايزه تتعدل

4- ما عنديش فكرة عن الموضوع ده بصراحة الناس هنا هتفيدك أكيد بإذن الله أكتر مني على موضوع التنطيط ده، بس ممكن يكون من الطريق عادي أصل ناعم جدا ديه متخيل منها برده شكل الطريق عامل ازاي فما اعتقدش إنك لازم تقلق بس برده استنى نصيحة الناس هنا اللي هم عندهم خبرة أكبر

المشاركة الأصلية كتبت بواسطة romioromio 5_اي نصايح الله يكرمكم انا كنت مسافر بيها انهارده ورجعت عرقان جامد وزي ما اكون مش عارف اخد نفسي

5-
- حاول تبقى هادي وما تقلقش عشان ما تغلطش وتيجي تدوس فرامل تقوم دايس بنزين لا قدر الله ولا حاجة
- امشي دايما في اليمين في الفترة الأولى ديه عشان تتفادى إنك تربك نفسك لو مشيت في الشمال لأن اللي وراك هيفضل يزمرلك عشان تجري بسرعة وممكن تكون أنت مش مستعد للسرعة ديه أو مش متعود عليها وممكن تغلط فهتربك نفسك على الفاضي وتعطل الطريق.
- أول ما تركب العربية اعمل الآتي : ادخل واقفل بابك وبص على المرايات الـ 3 الاتنين اللي في الجنب مفتوحين ولا لأ لو مقفولين افتحهم وبعدين اتأكد إن الـ3 مرايات مظبوطين ، حط مفتاحك في الكونتاكت ودور وبص على العدادات بتاعتك والمؤشرات زيت ، بنزين ، بطارية وهكذا كله تمام، أربط حزامك ، ونزل فرامل اليد وهات الأول وتوكل على الله
- طول ما انت ماشي ركز بس في طريقك وكل 3 ثواني كده عينك تعدي على المرايات بتاعتك وده هيجي بالتدريج ما تقلقش وخليك دايما منتبه - منتبه مش قلقان- لأن الغفلة ليها عواقب مش كويسة وربك هو الحارس

المشاركة الأصلية كتبت بواسطة romioromio 5_اي تركات كده من حضراتكم للسواقه بس للمبتدئين يعني متوسطي المستوي

6- النقطة السادسة ديه بقى هسيبها للناس الخبرة أكيد هيفيدوك أكتر مني

المشاركة الأصلية كتبت بواسطة romioromio جزاكم الله خيرا ورمضان كريم

واخيرا جزانا وإياك أخي الكريم وكل سنة وأنت طيب ويارب أكون أفدتك بشوية المعلومات البسيطة اللي عندي وأتمنى ما أكونش شوشت على أي معلومة عندك وإن كل اللي قولته يكون بإذن الله مفيهوش حاجة مش مظبوطة ولو فيه الشباب الأكتر خبرة مني يصلحوه بإذن الله