القصة التي ابكت العالم قصة كفاحي مع ال 128

المشاركة الأصلية كتبت بواسطة dego_story انا مستنى مستنى كل القصص بتاعت العربيه العسل دى ptmnlo123per145 منور ياكروزير وحكايات العربيه عمله شغل عالى ان شاء الله هيكون موضوع مكسر للسنة دى كمل كمل .......

تسلملي يا ديجو وهكملك بقا بقيت الحكاية باسلوب سيد ابو حفيظة علشان محدش يزهق وينام مني

[atifasia]

حقيقي هي عربية لو نفدت من الماتور مش هتنفد من السمكرة ولو نفدت من الاثنين مش حتنفد من الكبالن وفي الاخر لازم تتضحي بيها علشان تنفد بعمرك

[lover4ever8989]

انا عيط عليك دا انتا اجرك عند ربنا كبير
انا كمان ليا قصه مع 128 ولدى جبهالى وانا فى 3 ثانوى علشان يشجعنى على المذاكره قبليها كنت بسوق عربيه ولدى الفولفو 340 عربيه خطيره وقويه جدا شوف بقى لما تكون بتركب فولفو وبعده تركب 128 تحس انك راكب علبه كبريت المهم قعدت معايا شهرين قرفتنى فى عيشتى مبتجريش وكل يوم عند الصنايعيه ومش ثابته ومافيهاش تكييف وانا كنت مستعر منها المهم فضلت ورى ابويا لحد لما غيرهالى وجبلى هيونداى اكسيل موديل 1995 حسيت انى راكب عربيه بصراحه لاكن 128 بينى وبينها قصه عداوه كبيره لانها واخده وضع غير وضعها الى محبب الشعب المصرى فيها هوا سعر قطع غيارها وسعرها برضو بس من ناحيه عربيه فهيا لا تندرج تحت اسم عربيه وشكرا على قصتك الجميله واسلوبك الرائع

المشاركة الأصلية كتبت بواسطة atifasia حقيقي هي عربية لو نفدت من الماتور مش هتنفد من السمكرة ولو نفدت من الاثنين مش حتنفد من الكبالن وفي الاخر لازم تتضحي بيها علشان تنفد بعمرك

اه والله ده اللي حصل معايا كل ما اسد فيها فتحه تتفتحلي فاتحه تانيه اخلص من شغل الميكانيكا يطلعلي الكهربا اخلص من الكهربا يطلعلي السمكره اخلص من السمكره يطلعلي العفشجي والدايره شغاله مبتقوفش

بعد ما خلصنا من مشوار الصعيد وعدت علي خير ندخل بقا في الجزء الخامس من حكايتي مع الكتكوته


انا في الفترة اللي فاتت ديه كنت صرفت ما يقرب من 7000 جنيه تصليح وتغير حاجات في العربية وكانت اكتر حاجه تخنق ان الكاوتش عندي لا كان بيتخرم ولا بينام بيضرب سلك علطول مفيش تفاهم المهم


ابتديت افكر بقا في بيع العربية علشان اجيب حاجه زيرو وواحد صاحبي قالي روح سوق الجمعه وشوف الدنيا بتقول ايه قولت هروح السوق ومش هبيع العربية باقل من 24000 جنيه علي اللي عمالته فيها

اللي شاف فيلم بوحه لما راح يدبح الخروف وهوه بيقول انا هاخد 180 جنيه لحد ما وصل ل 20 جنيه انا كنت كدا


روحت واول واحد جالي قالي فايدتها كام ديه قلتله مفيش فوايد عندي لاني طبعا مش عارف يعين ايه فايده اللي بيقولو عليها ديه المهم اكتشفت في الاخر ان فايدتها كام يعني اخرها كام

المهم قولتله 24000 جنيه لقيته بصلي من فوق لتحت ومشي وكل اللي قولتلهم علي سعرها عمل نفس الحركة الدنيئة ديه المهم لاقيت العربية مش معدية 13000 جنيه وناس كتير قالولي بيع قولتلهم ده عند امه يا ادهم

المهم ناس شارو عليا اني ابدلها بعربية جديدة واقسط الباقي قولت امين

في معرض قريب مننا قولت اروح اشوف الدنيا بتقول ايه وخدت واحد معرفه معايا وكانت معرفه سوده المهم لقيت موجود شاهين موديل 2001 قولت عنب اوي كدا

جه صاحبها وطلع نقيب في الجيش المهم من هنا لهنا خلصت علي اني هديله ال 128 واخد الشاهين واقسط 500 جنيه لمدة سنتين واديله 15000 كاش فوق العربية خلاني مضيتله علي وصل امانه بالمبلغ الشهري بعد طبعا ما اللي معرفتي ده ما فرز العربية قدامي حته حته وصاحبها قالي العربية بتلين معمولها عمرة ولسه مغير الكرونه وخلاص لقينا العربية ميت فل وعشرة قولت مفيش مشكلة وفعلا مضيتله علي وصلات امانه وخلاني كمان بصمت وكنت مخنوق من حتة البصم ده بس قولت مش مشكلة الواحد نيته خير ومفيش داعي للقلق المهم

خد عربيتي وانا خدت عربيته وفي اليوم ده خدت معايا واحد صحبي معاه شاهين من 15 سنه وطلعت في اليوم ده الاسماعليه علشان الين الماتور وصحبي راكب معايا قالي في ونه عندك جامده اوي قالي العربية ديه الكرونه بتاعتها عايزه تتغير وكانت ديه اول صدمه قولتله يا عم ده صاحبها قالي انه مغيرها قالي لا كداب المهم قبل ما نطلع بالعربية لاقيت الاستبن بتاع العربية ضارب سلك مش عارف ايه حكاية الكاوتشات معايا المهم مرضتش امشي بالعربية غير لما اغير الكاوتش ده علشان لازم يبقي معايا استبن وانا ماشي المهم اشتريت فرده وركبتها استبن وطلعت علي طريق الاسماعليه وصاحبي صدمني بحوار الكارونه ده وجه في بالي اني اطلع علي واحد سمكري حبيبي الصبح اخليه يبصلي علي العربية لاني الشك لعب بعقلي وقد كان السمكري قالي شاسيه العربية واكله الباروما والعربية ديه كانت شغاله تاكسي قبل كدا ووراني مكان الشنطة اللي كانت محطوطه علي السقف من فوق وقالي العربية محتاجه يتغيرلها العتب كلها للببان لان واكلها البارومه بردك والمصايب نازله ترف عليا والعربية طلعت ملاكي كفر الشيخ ومكنتش اعرف اني هحتاس علشان انقلها من هناك لهنا وقولت مش مشكلة اجي علي نفسي واعملها واديني لبست واللي كان كان


المهم في نفس اليوم لقيت صاحبها بيتصل بيا بيقولي انتا مديني ال 128 البطاريه جايبه ربعين انتا تقابلني وتديني البطارية اللي في الشاهين واول ما سمعت الكلام ده وانا في زهول تام قولتله انتا بتتكلم في بطارية ماتيجي تشوف عربيتك اللي فيها عيوب الدنيا كلها وابتدت المشاكل مع اوسخ انسان شوفته في حياتي واتعاملت معاه


ابتدا يهددني بوصلات الامانه ان لو مغيرتلوش البطاريه هيبهدلني بوصلات الامانه ديه المهم قولتله ربنا يسهل يحلها الف حلال ده كان كمان مديني العربية عامل زجاج كهربا للبابين الامامين بس وكان بايظ وروحت صلحته علي حسابي

وادي ال 128 واللي عامله فيا لا عتقاني وهيه معايا ولا بعد ما سبتها بردك

المهم قالي انتا تقابلني النهارده علشان تسجلي ال 128 في الشهر العقاري قولتله اوكيه وقابلته واديته الورق ولقيته مره واحده سرخ في وشي وقالي ايه ده كله اتاري العربية معمولها 4 توكيلات وانا كنت الخامس قالي علشان اعمل تسجيل باسمي لازم ادفع 1000 جنيه ولاقيته بيقولي انتا اللي هتدفعهم عليا انا قولتله ده عند امه يا ادهم ده لما تشوف حلمة ودنك ابتدا يهددني تاني بوصلات الامانه قولتله انسي ولا مليم وربنا في اليوم ده كان بيحبني جدا لقيته من نفسه بيقولي خلاص ترجعلي عربيتي وخد عربيتك قولتله يا ريت قالي بس هتدفع الشرط الجزائي قولتله ليه هوه انا اللي عايز ارجع العربية قالي انتا اللي مش راضي تتدفع ال 1000 جنيه قولتله انسي رجع تاني يهددني بوصلات الامانه

المهم والدي قالي ارميله الشرط الجزائي وخد عربيتك ووصلات الامانه وسيب الباقي عليا قولتله طيب وفعلا ابن الحراميه طلع شقته فوق ولقيته جايبلي من 15000 جنيه 13950 قولتله في 50 جنيه قالي ما انا شحنت بطاريتك وغيرتلها مايه ودول تمن المصنعيه وابن الحرام خد مفتاح عربيته وطلع بيها وكانت فيها حاجه ال 128 والاستبن اللي لسه شاريه المهم مرضيش يرجعهم وقالي اعلي ما في خيلك اركبه ولاقيته مرجعلي عربيتي الدركسيون مكسور


المهم حسبنت عليه وعلي ال 128 وخدت العربية ركبتلها دركسيون جديد ومشيت المهم والد مسبهوش الا لما اخره ترقيه وروقه في القياده عنده ودلعه اخر دلع بس بردك مش هنسي اني اتنصب عليا يجي في 1500 جنيه تمن استبن وتصليح زجاج والشرط الجزائي والكلام ده

ربنا ينتقم منه وطلع المعرض كان مماين مع معرفتي الزباله ده وخلاه يدبسني في العربية ديه وطلع الظابط ده بيتعامل مع المعرض ده في عربيات وشقق كمان


المهم كانت اوسخ فترة عدت عليا لاني كنت علي كف عفريت بسبب وصلات الامانه ديه بس الحمد لله خدتها وحرقتها ومن ساعتها حلفت اني عمري ما همضي علي وصل امانه تاني لو هتتقطع رقبتي

في حاجه نسيت اقولكم عليها ان ربنا عماه عن التوكيل بتاعي لانه مكنش توكيل كان عقد مسجل باسمي المهم روحت رخصت العربية باسمي في المرور وقطعوا كل التوكيلات اللي كانت فيها ومدفعتش غير 60 جنيه تقريبا مش 1000 جنيه زي ما كان بيقول

وديه كانت اول نصبه عليا في ال 128 ونكمل كمان شوية من الشغل علشان رايح الشغل دلوقتي ومبروك لكل الاهلاويه