#561
|
![]()
أم حسين (اعتقد دى كنيتها /شهرتها)
دى ست محترمة معدية ال55 سنة تقريبا بتيجى من الزقازيق كل يوم وبتشتغل عاملة نظافة فى محطة بنها وطول النهار شغالة بجد واجتها د ولا الشباب الصغير ومعاها عمك ابو ابراهيم اونطجى وحلنجى (راجل كبير برضه لكن يكنس ورقتين ويقعد فى آخر المحطة ويدخن ولما أجد موسوعة فى مواعيد قطارات السكة الحديد الداخلة والخارجة من بنها ولا انسانة بتخدم الركاب لله كده زى أم حسين يعنى ابقى سامع صوت القطار واجرى على النفق (محطة بنها 6 ارصفة يربط بينهم نفق )ومش عارف القطار فين ومعايا ناس كتير داخلة تجرى فى النفق معايا ومسمعناش صوت ناظر بنها لانه بيعلن قبل دخول القطار ب5 دقايق كاملة وهنا تشجينا ام حسين بصوتها الجميل (هو صوت تخين جدا لكن جميل لانه بينقذنا ) وتنادى وتقول القاهره رصيف 3 الاسماعيلية رصيف 4 ومنوف رصيف 6 شدوا.. حيلكو شوية يابتوع القاهرة القطار واقف من شوية وكلنا فى نفس واحد تقريبا متشكرين ياحاجة...... متشكرين ياحاجة وموسوعة بجد ولانها حفظتنى ولانى الراكب الوحيد اللى مش عارفة تمسك له طريق فبقت تسألنى رايح فين طنطا 199 جاى تسلميلى ياحاجة ربنا يخليك يابنى والله كلكم اولادى وبحب اعمل اى حاجة اساعد بيها الناس ربنا يكرمك ياحاجة بنت حلال والله انت بتشتغل ايه اشمعنى اصلك الراكب الوحيد اللى ملوش خط سير او قطار معين يركبه كلهم حفظت اشكالهم ومواعيده وعلشان كده كل و احد بنادي على القطار بتاعه الا انت ضحكت وقلت / انا بشتغل فى العطور والله طب ممعاكش اى حاجة كده عينى ياحاجة وطلعت ازازة صغيرة من العينات اللى معايا واديتها لها متشكرة يابنى العفو ياحاجة وجه القطار ومشيت وكتير اركب وكانت تنجدنى بصراحة ابقى بره محطة بنها وسامع صوت القطار ومش عارف ده رايح فين وادخل اجرى وتشوفنى فى النفق تسألنى وانا بـجـرى / على فين بأنفاس متقطعة / مصر 340 رصيف واحد وانا بجرى وعلى آخر نفس طالع منى /تسلميلى ياحاجة والحقه وهو طالع واروح القااها قاعدة على سلم النفق بتريح رجلها تشوفنى ازيك ياابنى الله يخليكى ياحاجة ازيك وازى الاولاد نحمد الله كلهم اتجوزو ماعدا واحد مصر يشتغل فى شركة محمول يابلاش هههههههه اشمعنى ياحاجة مرتباتها عالية وقاعد فى البيت مستنى؟؟؟؟ اه تصور ربنا يفرجها عليه امين يارب مين اللى جاى 930 ده مكيف ومعاييش الاشتراك نسيته النهاردة يعنى هدفع 10 جنيه لحد مصر بدل 175 قرش استنى 28 ادامه كتير حوالى ساعة الاربع والا اقول لك 962 زمانه جاى اطلع على رصيف واحد فاضل عليه ربع ساعة تقريبا ياسلااااااااام ياحاجة كان تايه عن بالى 962 متخافش يابنى السكة الحديد كلها هنا وتشاو على دماغها ايـــــــــــــــه ده ه ه ه ه ايه فى ايه الجملة دى بتاعتى م انا سمعتك مرة بتقولها سلام ياحاجة ومنعتنى النيسان انى اشوفها وخصوصا بعد م ركبت غاز بقى مشوار العربية ارخص من السكة الحديد وشفتها من حوالى اسبوع زى ماهيا لم تتغير وداخل اجرى وكالعادة رصيف 3 بسرعة وفعلا رغم انى كنت رايح رصيف واحد لكنها نـقـت السريع وكان متأخر لجل حظى وكان واقف على رصيف 3 ومكنتش اعرف الله يمسيكى بالخير يا أم حسين |
#562
|
![]()
اتوبيس مطروح
والمرة دى جاى من مطروح فى اتوبيس 2 بالليل والسواق طلع بينا تحس راكبين اتوبيس 315 (ابو زعبل او القلج مش فاكر/ تحرير) سواقينه مجانين لانهم دايما متأخرين والواحد طالع زى الصاروخ والاتوبيس غالبا مكسر (المعلومات دى عمرها اكتر من ييجى 20 سنة لكن للتشبيه فقط وفعلا طلع الاتوبيس من مطروح ولا شبابيك ولا اى حاجة فين التكييف يااسطى بغباء يحسد عليه /بايظ ماهى الشبابيك دى مش عاملة حاجة لانها معمولة على اساس ان الاتوبيس مكيف وايه الحل مش عارف وكان الاتوبيس زحمة جدا موسم صيف بقى وهما مركبين زيادة عن العدد يعنى فعلا تحس اتوبيس 315 بتاع القلج وشوية شباب غالبا طلبة استلموه وقعدو يقولو نكت خايبة ويضحكو عليها لوحدهم عينة من نكتهم الخايبة مرة سواق اتوبيس طلع من مطروح من غير تكييف ههههههههههههه مرة سواق اتوبيس طلع من مطروح نسى التكييف فى البيت هههههههههههه مرة سواق اتوبيس بنسأله التكييف فين قال عطلان ههههههههههههه وهكذا مجموعة نكت كلها اسخف من بعض والدنيا ضلمة وهو صبر عليهم لحد م وصلنا حتة مقطوعة قبل الضبعة بشوية يعنى بعد مطروح وانت جاى بحوالى 150 كيلو وراح واقف فرامل جامدة ااااااااييييييييييييييء ايه ياعم فى ايه بصوت جهورى يشبه اعلان الحرب ايام الناصر صلاح الدين والناس دى /العيال اللى مش متربية دى تسكت علشان نعرف نشتغل ونسوق أم الاتوبيس ده طبعا الدنيا ضلمة كحل (بضم الكاف) ولسه هتسحب من لسانى لقيت اللى جنبى مسكنى وقال / أثبت ( بلهجة ميرى /زىالجيش) رايح فين هنـفـضه وآجى يبقى عايزنا نبات هنا ازاى هيقول عطلان هتقدر تعترض ؟؟؟؟ وعيش هنا فى الضلمة دى لقيت عنده حق وسكتت على مضض ( يعنى وانا متضرر بالبلدى) شوية ووصلنا عند الريست وسمعنا صوت خبطة ترااااك وحاجة بتتجرجر ورانا نزل ولقيته بيجيب حاجة ويرميها فى شنطة الاتوبيس فى ايه فقال بلا اهتمام / بسيطة الشكمان وقع وشلناه خلاص ههههههههههههه بيتكلم عن الشكمان كأنه جزء زيادة فى الاتوبيس ليس له قيمة وبعد شوية كــتـــاااااااااااااااااا ااااااااااار جدالانه كان قلل سرعته بعد موضوع الشكمان ولقيت يافطة مكتوب عليها القاهرة 50 كيلو قلت يافرج الله باقى على البوابات 18 كيلو هاااااااانت انا بصبر نفسى طبعا واذا فجأتن ترااااااك ايه الصوت ده نزل وطلع خير بسيطة المساعد انكسر يادى النيله هو كل حاجة بسيطة مفيش حاجة من اللى حصل ده جامدة خااالص ولما هيا بسيطة مبتجريش ليه مردش عليا وواحد من الركاب قال معلش تعالى وهدى نفسك وفوجئنا بان سرعة الاتوبيس قلت جدااااااااا الى اقل من 10 كيلو فى الساعة م تجرى يااسطى م انا بجرى اهو انا وبغيظ / طب متجريش طالما كده بتجرى احسن نتمسك رادار ولقيت ان كل م تيجى زلطة صغيرة تحت الاتوبيس الاتوبيس يتهز جااااامد ولقيت ناس طلعت مصاحف وبتقرا قرآن وانا قعدت ادعى ربنا انه يسترها علينا و ده مصر يكمل المشوار ووصلنا بالسلامة الى التحرير عن طريق المحور طبعا مسافة 50 كيلو فى 5 ساعات بالتمام والكمال ووصلنا بالسلامة وببص ف وشه لقيته احمررررررررررررررررر ايه ده ياعم قال الحمد لله وصلنا بالسلامة طيب م كنت بعتت جبت حد يصلحه واحنا فى الطريق وخصوصا انك قريب من القاهرة مفيش يابيه واحنا اللى بنشيل الطينة بعد كده ارفض تطلع بالاتوبيس هيركبه غيرى واتحول انا للتحقيق ايه الاستهانة بحياة الناس د ى |
#563
|
![]()
ربنا يديها الصحه ام حسين ويكتر من امثالها على الرغم من عدم وجود احد بالانسانيه دى دلوقتى
__________________
![]() اللهم انزل نورا من نورك عليه اللهم نور له قبره ووسع مدخله وآنس وحشته اللهم ارحم غربته وارحم شيبته اللهم اجعل قبره روضة من رياض الجنة . لا حفرة من حفر النار اللهم أغفر له وارحمه واعف عنه واكرم نزله |
#564
|
![]()
عادة زفـــت
والعادة دى انى دااااااايما متأخر النهاردة مثلا رايح بنها مشوار قريب (45 كيلو ) خد ياواد 27 (3 ونص ) طيب نشرب شاى الاول ونركب (955) 4 الا ربع طب ساندوتش قبل الشاى ونركب 807 (4 وتلت ) ونفضل فى الفيلم الهندى ده لحد م اتاخر واطلع من بيتنا جرى جرى لحد محطة مترو الانفاق بتاعة الزيتون (مسافة حوالى 500 متر ) واقطع التذكرة ودايما كنت الاقى المترو داخل واجرى انط من فوق الماكينة واطلع السلم الداخلى للمحطة جرى وانزل جرى وانط جوه المترو وهو بيقفل ابوابه وعلى م آخد نفسى نكون دخلنا رمسيس وابص فى الساعة الاقيها 4 وربع يادى النيلة فاضل 5 دقايق و4 وتلت على رصيف 20 واخد النفق كله جرى ومحطة رمسيس (مبارك / مش هيفرق الاسم ال2 فراعنة)ماشاء الله كبيــــــــــــــــرة وتنتهى بسلم طويــــــــــــــــــــــ ــــــــــل يطلعك على باب محطة القاهرة والسلم ده لوحده يقطع النفس واجرى واخد رصيف واحد كله بالطول مسافة حوالى 300 متر(لان اخره يبدأ ارصفة 18 و19 و 20 واوصل والاقى القطار طلع و فى نص الرصيف واجرى وراه والحقه فى آخر الرصيف وانط فيه وزحمة جدا ااااااااااااااااااااااااا اااااا واسافرواقف على رجل واحدة لحد بنها واخلص شغل والاقى معاد القطار جه وممكن يكون قطار 30 اخر قطار يقف بنها متجه للقاهرة واخدها جرى وانزل سلالم النفق واطلعها تانى وممكن الاقيه اتحرك اجرى وراه وانط فيه واحيانا كان يتاخر اوصل محطة القاهرة 1 الا ربع بالليل يادى النيلة المترو الاخير زمانه جاى واخد النفق كله جرى وانزل الاقيه واقف فعلا وانط فوق المكن وانط جوه المترو وهو بيقفل الباب وعلى م آخد نفسى تكون محطة الزيتون جات وفى يوم سالنى واحد ظريف من الركاب / انت دايما كده جاى تجرى مفيش مرة تيجى بدرى اناا وانا مقطوع النفس / عادة هباب بعيد عنك يـضحك وتانى يوم نفس القصة رايح طنطا (86 كيلو بالقطار ) ونفس الحكاية وتالت يوم اسكندرية ونفس الحكاية وف يوم علشان اجبر نفسى م اجريش اقسمت بالله العظيم م اجرى ابدا طيب احترم نفسى واطلع بدرى شوية .......انما تقولو ايه عادة هباب متأخر وحلفت ومش عارف اجرى كل م اجى اجرى افتكر اليمين بس بصراحة الواحد كان كله صحة وحيوية لانى كنت ببقى شايل شنطة تقيلة وبجرى بيها والقلب حديد ماشاء الله لحد م جات النيسان وبطلنا جرى وركبتلها الغاز وبطلنا القطار والمترو والنهاردة شميت ريحة قلق فى الشوارع سافرت بالقطار ووصلت بنها زحمة جداااااااااااااااا حمدت ربنا انى مجيتش بالعربية لكن اتمشيت ولقيت القلب بيدق جاااااااااااااااااامد ايه ده..... ايه ده ....ايه ده عجزت والا ايه ياابو خالد فلتسقط النيسان وقررت امشى شوية كل يوم التعديل الأخير تم بواسطة خالدخليفة ; 29-08-2010 الساعة 07:32 AM |
#565
|
![]()
صح يا استاذ خالد
حاول ترجع تمشى على الاقل ربع ساعه يوميا او اكتر عشان صحتك وكل سنه واحضرتك طيب
__________________
![]() اللهم انزل نورا من نورك عليه اللهم نور له قبره ووسع مدخله وآنس وحشته اللهم ارحم غربته وارحم شيبته اللهم اجعل قبره روضة من رياض الجنة . لا حفرة من حفر النار اللهم أغفر له وارحمه واعف عنه واكرم نزله |
![]() |
|
|