انا من الاغلبية الصامته وعايز اتكلم

[تامر ديزل]

انا مقدر تماما ان المصطلحات دي من كتر ما سمعناها بقت مكعبله بس قولي اعمل ايه اذا قولت تيارات اسلامية وانتقدت بعض تصرفاتهم الناس هيفتكروني باتهجم على الدين
عشان كده اخترت مصطلح يميني
هقول يميني والحدق يفهم
على فكرة يميني مصطلح سياسي اوروبي يرمز الى التيارات المحافظة اوذات الخلفية الدينية زي المسيحية او اليهودية

[تامر ديزل]

ماتيجوا نتخيل الشعب المصري حاليا ونتخيلهم في بلد صغيرة قرية مثلا بيحكمها قوة الفاسدين راح مجموعةشباب اقترحوا على اهل القرية انهم يرحلوا او مجموعة رمزية من القرية ترحل تشتغل مثلا في القاهرة تبني مستقبلها وتتتخلص من سلطة الفاسدين وظلمهم وراحوا جابوا اوتوبيس 50 راكب مثلا وقالوا يللا نسافر
السفر هنا رمزيا يعني التقدم بالبلد لقدام
راح مجموعة ظباط جيش من اهل القرية قالوا احنا جايين معاكم علشان الحماية في الطريق والحمايةلما نوصل بس بشرط نقعد قدام جمب السواق وياعم مش هنسوق شوفوا واحد منكم يسوق بس احنا هنقعد جمبه نوريله السكه ظباط بقى هنعمل ايه
شباب من اللي مسافرين قالوا لا يقعدوا ورا ومالهومش دعوة بالطريق ومايتدخلوش الا لما الامور تحتاجهم يا اما مش راكبين
شباب تاني هنقول يمينيين بلاش اسلاميين علشان لا نثير الحساسيات قال وماله يركبوا فقدام المهم نخلينا جمبهم او وراهم علطول ومن جاور السعيد يسعد
شباب ياعيني شقيان شايل شنطة هدومه وعدته على قلبه وبيدور على مكان جوا الاتوبيس قدام ورا المهم نوصل
والفاسدين واقفين تحت فاهمين انه لو الاتوبيس ده طلع سلطتهم انتهت خالص فلازم يخلوه ميطلعش
لو قلنا الاتوبيس يطلع من غير الشباب المعترض نبقى ظلمنا نفسنا لانهم كفاءات ومحتاجينهم في السفرية دي ولو قلنا للظباط ارجعوا ورا مش عارفين رد فعلهم ايه
ولو فضلنا كده نتكلم ومطلعناش الاتوبيس ده السفرية دي الفاسدين هما المستفيدين ومازالو بيمصوا في دمنا علشان كده مافيش حاجه اتغيرت لاننا قاعدين نتكلم مين يقعد قدام ومين ورا
وانا هاطلب من الزملاء شوية طلبات معلهش بعشمي يعني
ما حدش يقولي يافلول الفلول هوا اللي معطل الاتوبيس ومش عايزه يطلع انا من الشقيانين اللي عاوز يقعد في اي حته المهم نطلع
وياريت كل واحد يرد عليا هوا معايا في الاتوبيس ده ولا لأ
ولو لأ طلباتك ايه علشان تيجي معانا
طيب سؤال لو السواق يعني اخترناه من الرافضين ممكن تطلعوا معانا ؟
طيب لو السواق يميني او واحد شقيان زي حالاتي وبيقولكم السكه طويله واكيد هنريح بعض وكل واحد هيسوق شويه تيجوا ولا برضه لأ
طيب تسوقوا انتو وتقعدوا مع بعض قدام واللي يقعدوا ورا بظروفها ؟
ايه رأيكم ؟

[تامر ديزل]

احترس من الفلول
الاول مين هوا الفلول ؟ الفلول في المعجم هم المهزومون والمنكسرون، ومفردها فل، وكانت العرب تقول فل السيف بمعنى انكسر طرفه، والمفلول هو المنكسر
يعني الفل هو شخص كان يستفيد من الفساد في عهد مبارك وانكسر بانكسار مبارك او فقد استفادته يعني المفروض انه مافيش منه خوف
طيب .... امال الفاسدين والمرتشين والموظفين الضلالية منعدمي الضمير آكلي المال العام الحرام اللي مازالوا بيمارسوا اجرامهم دول نسميهم ايه
وليه التركيز على الفلول وسايبين دول مع انهم اكتر ومازالوا بينهبوا ويدمروا ويمصوا دم الشعب ويعطلوا مصالحنا
فيه ملحوظه غريبه انه كلمة الفلول ليها اكتر من تفسير في الشارع السياسي خد عندك الفلول في رأي شباب الثورة والليبراليين هو : الفل الحق هو من يؤيد مبارك ثم يهدأ ليؤيد المجلس العسكري واحد تاني قال : كلمة سر الفلول هيا الاستقرار + دفع بسكلته الانتاج ودي اشارة الى ان مؤيدي الاستقرار هم من الفلول وانك علشان تنفي التهمه عنك لازم تعترض على كل شئ وتثور على كل السلطات
ناس تانية قالوا الفلول هما اللي بيعملوا الفتن وعاوزين يولعوا البلد والفلول هما اللي عايزين يوقعوا المجلس العسكري
وما حدش بقى عارف اذا كان هوا ولا انا ولا انت ولا المجلس ولا الحكومه الموجوده دلوقتي فلول ولا لأ
تقعد تنبح في صوتك ياعم المشكلة مش فلول المشكلة فينا احنا
لازم نتغير
ما فيش فايده كل واحد زانق له فل وعمال يفل فيه ومشيله مسئولية التخلف اللي احنا فيه

[تامر ديزل]

فيه ترتيب لمظاهرات يوم 9 سبتمبر
بعض الداعين للمظاهرات مسميها ثورة الغضب الثالثة على اعتبار لن الاولى كانت 28 يناير والتانية 8 يوليو وعاملين شوية مطالب نقلتها لكم علشان نتابع الموضوع ده
1- القصاص العادل للشهداء وضمان حقوقهم وضمان الرعاية الكاملة لمصابى الثورة.

2- إقالة حكومة عصام شرف ومحاكمة المسئولين عن التقاعس والتلاعب فى تلك الفترة.

3-إعطاء الوزارة الجديدة كامل صلاحياتها وعدم التدخل فى تشكيلها وفى قراراتها.

4- وقف فورى للمحاكمات العسكرية للمدنيين وإلغاء جميع الأحكام الصادرة من قبل وتحويل القضايا إلى القضاء المدنى والإفراج عن المعتقلين قبل وبعد الثورة وخاصة ضباط 8 إبريل.

5-تطهير القضاء وإقالة النائب العام ورئيس الجهاز المركزى للمحاسبات.

6- محاكمة مبارك بتهمة الخيانة العظمى وتفعيل قانون الغدر, وإعادة بث المحاكمات مرة أخرى تطهير وزارة الداخلية تطهيرًا جذريا وعودة الأمن بكثافة للشارع المصري.

7- تطهير الإعلام وتطويره وإلغاء وزارة الإعلام وتحويلها إلى هيئة مستقلة استقلال الأزهر على أن يكون منصب شيخ الأزهر بالانتخاب وليس بالتعيين .

8- وقف فورى لتصدير الغاز لإسرائيل ومراجعة كافة الاتفاقيات المبرمة معها بما فيها اتفاقية كامب ديفيد .

9- القصاص لقتلة الجنود المصريين على الحدود وسحب السفير المصري من إسرائيل وطرد السفير الإسرائيلى وإغلاق السفارة الاسرائيلية بمصر .

10- حظر ممارسة الحياة السياسية لمدة خمس سنوات على الأقل على قيادات الحزب الوطني

11- حل فورى للمجالس المحلية, وإلغاء مجلس الشورى, وتعديل قانون الانتخابات.

12- مراقبة الأسعار والتحكم فيها بما يناسب ويتوافق مع محدودى الدخل .

13- وضع حد أدنى للأجور 1200 جنيه فى القطاع العام والخاص ,

وأصحاب المعاشات وصرف إعانة بطالة 400 جنيه.

14- التوقف عن قيادة الثورة المضادة ومنع بث الفتن بين طوائف الشعب وبين القوى السياسية واتهام الثوار والمتظاهريين بتعطيل عجلة الإنتاج .

15- إلغاء قانون تجريم التظاهر والاعتصام.

16- وضع جدول زمنى لإجراء انتخابات وتسليم السلطة

[تامر ديزل]

رايي الشخصي في هذه المطالب انها (كولكشن ) او كوكتيل مطالب عامله واحد كان متخصص زمان في عمل شرايط الكاسيت الكوكتيلات بحيث ترضي جميع الاذواق
يعني حته لنقد الحكومه وحته لنقد تدخل المجلس العسكري في عمل الحكومه وحته كده لدغدغة المشاعر الملتهبه بالمطالبه بزيادة المرتبات بدون عمل فعلي وحته عن المحاكمات يعني طبق سلطه بلدي كبير
المفروض يكون مطلب واحد بس اللي هوا اخر مطلب وضع جدول زمني ملزم لانتقال السلطه للمدنيين من خلال انتخابات حره
مش بقولكم كولكشن
مخليين المطلب الجامد للاخر زي ما زمان كانو بيخلوا الاغنية الجامده للاخر او المطرب الجامد لاخر الحفله