بيكانتو ولا لوجان ؟

[Sarah_88]

السلام عليكم
ان شاء الله انا ناوية اجيب عربية في حدود 85 الف....و محتارة ما بين اللوجان و البيكانتو المانيوال.
برضه كنت مترددة في الأول بينهم و بين الاسبيرانزا M12 بس قلت بلاش الصيني و خلينا في المضمون
سمعت كلام ان الرينو الباور بتاعها تقيل و قطع غيارها غالية
و في نفس الوقت البيكانتو ضيقة من جوة و مش عربية كويسة لو هسافر بيها

فيا ريت لو حد عنده فكرة انهي ممكن تكون احسن و تعيش اكتر و تكون عفشتها كويسة و تستحمل لأني بمشي في طرق مكسرة كتير...اه و تكييفها يكون كويس برضه و سهلة و مريحة في السواقة

مع العلم ان انا اصلا كنت بسوق نيسان صني 2002 و هي عربية هايلة بصراحة بس قدمت بقى و عايزة اجيب غيرها فهنبيعها ان شاء الله

[محمد اوبل]

السلام عليكم اولا مفيش عربيه كامله طبعا ولكل عربيه مميزات وعيوب ولازم الانسان يحدد المتطلبات الاهم بالنسبه له فى العربيه عشان ميحترش كتير انا كان معايا هيونداى i10 مانيول وبعديها بيكانتو 2013 اوتوماتيك وجربت اللوجان باختصار البيكانتو عجبتنى جدا ومميزاتها : جوه البلد ممتازه جدا تكييف ممتاز باور اكتر من رائع نعومه وسحب وابعاد العربيه ممتازه فى زنقه وسط البلد والركنه سهله جدا وشكل شياكه وعصرى تابلوه جميل عفشه جيده وثبات معقول لحد 130 اما العيوب :صالون صغير وخصوصا فى الخلف لانه فى الامام جيد شنطه صغيره جدا صاج متوسط التحمل او خفيف الحوض ضيق لو فيه شغل فى المحرك وثبات متوسط فى السفر على سرعات عاليه وقطع غيار غاليه نوعا ما وسعراالبيكانتو مرتفع من وجهه نظرى
اللوجان المميزات : صالون واسع ومريح , شنطه كبيره جدا , العربيه مرتفه عن الارض فممتازه فى المطبات (تحيا مصر) , عفشه جيده ومعقوله فى شغلها , سعر منافس , سعر قطع الغيار بين متوسط ومرتفع ,
عيوب اللوجان : تكييف متوسط الاداء , باور تقيل نسبيا , تصميم عادى جدا وتابلوه عادى , صوت محرك مرتفع , اداء متوسط على محرك 1600 , ثبات متوسط فوق130
ورأى الشخصى والله اعلم لو معظم استخدامك داخل البلد ولوحدك البيكانتو ممتازه اما لو سفر ومعاكى ناس وشنط او تحميل ومطبات اللوجان افضل وده رأى الشخصى والله اعلى واعلم وربنا يوفقك للى فيه الخير

[احمد على 1999]

البيكانتو جودة و اداء اعلى بس اصغر
لكن حكاية السفر فعادى جدا انا معايا i10 تعتبر اقل من البيكانتو و فى السفر كويسة جدا جدا فاكيد البيكانتو افضل

[AbOnOrA]

الباور التقيل مش عيب بالعكس كل الاوروبى تقريباً كدة حتى البى ام وده علشان تكون ثابتة اكتر وعامة بالرغم من تقديرى للبيكانتو كعربيه جميلة وعملية واقتصادية لكن اللوجان افضل للاستخدام الاسرى او السفر والافضلية هنا للسعة الداخلية والراحة

[abdelrahmn010]

كيا بيكانتو شكلها شيك و جميله