اخيرا انتهت الحيرة -- قررت اشترى النترا 2012 ان شاء الله

[samehnoshi2000]

المشاركة الأصلية كتبت بواسطة ahmedatif متشكر جدا لكل الردود انا خلاص الحمد لله هروح اجيبها من معرض المصرية اللى فى كلية البنات وهستلمها بكره ان شاء الله حد عنده اى فكره هستلم ايه او المفروض ابص على ايه قبل ما امضى اقرار الأستلام

الف مبروك مقدما بس هل المصرية حيدهالك بنفس سعر الوكيل ولا فى اوفر برايس؟؟ و كام؟؟

[ahmedatif]

لأ ده انا حصلى حوارات كتير على ما استلمت-- انا كنت خلاص هجيب من المصرية زى ما قولتلكم ب 124.5 وده ااقل سعر لقيته -- المهم واحد صاحبى بالصدفة قالى انه عارف حد فى سمير ريان وكلمه عشانى ولقيتها 124 فقلت تمام -- رحت ودفعت مقدم الحجز وشوفت اللون وكان سكرى (كريمى) بس ده كان بليل فقلت بلاش خلينا للصبح احسن روحت الصبح عشان اخلص واستلم لقيت المراية الشمال فيها خربوش والصراحة بينى وبينكم موافقتش ومكنش فيه عربيات تانى فقلت واضح انى هرجع استنى تانى فى نفس التوقيت مندوب المصرية كلمنى وقولتله الصراحة انا لقيت سعر ااقل من عندكم وكمان الوان احسن قالى قولى انت عاوز لون ايه وهجبهولك بنفس السعر قولتله لو عندك سماوى يبقى تمام المهم اخر يوم كلمنى وقالى السماوى قدام المعرض اهو تعالى استلم فى اى وقت روحت امبارح بليل وخلصت واستلمت الحمد لله
بعد لف كتير بقى انصح كل اللى عاوز يشترى العربية دى:
1- مطلوبة جدا جدا جدا والتوكيل مش قادر يغطى كمية الطلب دى ومنهم المعارض الكبيرة زى سمير ريان والمصرية وابو غالى والقرش
2- العربية سعرها هيعلى طول ما الطلب بالشكل ده اللى يلاقى سعر قليل ولون عاجبه يجيبه فى اسرع وقت انا فى ظرف ليلة كان فيه تلات عربيات عند سمير ريان روحتله الصبح لقتهم اتحجزو وبعضهم اتسلمو
بالنسبة لأنطباعى عن العربية بقى احب اوضح ان انا كنت راكب بيجو قبلها بس سوقت سيراتو وكورولا مشاوير بسيطة كده فممكن ميكونش حكمى دقيق لكل الناس
انطباعى الأول:
1- العربية عالية فى قعدتها واريح من كرسى السيراتو ( انا جسمى مليان شوية فالكرسى كان واسع ومريحنى)
2- نور التابلوه مريح للعين اكتر من السيراتو واشيك من الكورولا
3- العربية واسعة ماشاء الله اكبر من السيراتو
4- العفشة بتاعتها انعم من سيراتو بس وتقريبا زى الكورولا
5- الباور كهربا خفيف جدا اخف من السيراتو وخصوصا جوا البلد فى الزحمة وكده
6- الراديو و يو اس بى ممتاز والسماعات جميلة وصوتها نقى
7- فى الأول حسيت ان مش حاسس بأبعاد العربية وده لأنى العربية قصيرة من قدام ومن ورا بس بالتعود لقيتنى افضل
8- التكييف الصراحة اكتر من اتنين ساقع جدا ومحاولتش اعلى عن كده
9- اللون السماوى فعلا من اجمل الألوان عليها انا حاسه درجة مختلفة عن السماوى بتاع العربيات التانية
10- تفويلة التنك كلفتنى حوالى 85 جنيه بنزين 92 يعنى حوالى 47 لتر
11- متهيألى لازم احط فرش جلد للأرضية لأن من كتر التراب هيتبهدل لأن فرش الأرضية موكيت والمصرية ادونى دواسات موكيت برضه هدية
12- طبعا لما جيت استلم جربت كل حاجه وفهمت كل لمبة فى التابلوه وبصيت على البويا من بره كمان شبر شبر.

بس كده لو حد عنده اسئلة بقى ياريت يقولى المنتدى ده ساعدنى كتيير وانا تحت امركم واسمحولى انا هكتب البوست دى برضه فى منتدى تانى عشان برضه ساعدنى كتيير

ودعواتكم ليا واسف للأطالة

[ahmedatif]

المشاركة الأصلية كتبت بواسطة samehnoshi2000 الف مبروك مقدما بس هل المصرية حيدهالك بنفس سعر الوكيل ولا فى اوفر برايس؟؟ و كام؟؟

لأ كله اوفر برايس يا استاذ سامح والتوكيل مفيش تسليم دلوقتى خالص وقالى كمان اسبوعين ومش اكيد والمعارض كله قال انها هتغلى وفى التوكيل 123 فقلت الحق اشترى اللون والفرق مش كبير بدل ما استنى وفى الأخر تغلى وملاقيش اللون

[esam_ayad]

ألف مبروك يا باشا.علي فكره انا منوفي برضو زيك<<<المنايفه منورين المنتدي يارجاله>>>
ربنا يباركلك فيها وانا عايزك لو سمحت تكتب لنا عن انطباعك عن النترا الرائعه.انا ناوي أجيبها كمان تلات أربع شهور كده علشان استفيد بسنه جمارك _انا شغال في الكويت_ فأرجو منك سرعة الرد.وشكرا لك

[mando_car]

المشاركة الأصلية كتبت بواسطة esam_ayad ألف مبروك يا باشا.علي فكره انا منوفي برضو زيك<<<المنايفه منورين المنتدي يارجاله>>> ربنا يباركلك فيها وانا عايزك لو سمحت تكتب لنا عن انطباعك عن النترا الرائعه.انا ناوي أجيبها كمان تلات أربع شهور كده علشان استفيد بسنه جمارك _انا شغال في الكويت_ فأرجو منك سرعة الرد.وشكرا لك

الجمارك ملهاش علاقة بالكوري

------
صاحب الموضوع . فات تقريبا 6 شهور معاك العربية ربنا يباركلك فيها يارب ويديك خيرهاو يكفيك شرها .
لكن بصراحة حاسس اني اختيارك كان صح ؟ ولا لا ؟؟