|
|||||||
| نادى الاطباء خاص بالموضوعات الطبية التى يضعها المتخصصون خدمة لباقى الاعضاء |
 |
|
|
أدوات الموضوع |
|
|||||||
| نادى الاطباء خاص بالموضوعات الطبية التى يضعها المتخصصون خدمة لباقى الاعضاء |
|
|
|
أدوات الموضوع |
|
#1
31-10-2011, 02:07 PM
|
|||
|
|||
اساطير شائعة جدا في طب الاطفال .. نزلات البرد
السلام عليكم ..
و كل عام و انتم جميعا بخير .. النهاردة هاتكلم عن اكثر الاساطير و الاخطاء شيوعا بخصوص نزلات البرد .. او الانفلونزا .. او دور الزكام .. و علشان اللي مقراش الموضوع اللي قبل كده انا اسمي د/ وائل .. اخصائي الاطفال و حديثي الولادة .. و نشوف الاخطاء .. 1- ده دور برد عادي جدا .. انت مكبرة الموضوع ليه .. طبعا نزلة البرد من اكتر الالتهابات شيوعا في الاطفال ..و الطبيعي انه بيجي للطفل من 4-5 مرات في السنة.. حطهم جنب ال 5 مرات بتوع التهاب الحلق و احسب انت بقى  ..و نزلة البرد مرض فيروسي ناتج عن الاصابة بفيروس الانفلونزا اللي ربنا خلقه علشان يورينا عظمة قدرته في اصغر مخلوقاته .. كائن صغير جدا جدا جدا لا يري الا بالميكرسكوب الاليكتروني و مدوخ علماء و اطباء العالم كله .. و ده لسببين .. اولا قدرته الرهيبة على الانتشار .. و ثانيا قدرته الاكثر من عجيبة لتغيير و تحوير شكله و خصائصه للانتصار على المصل المضاد له .. و علشان كده مصل الانفلونزا بيتغير سنويا .. و كل لما نغيره .. الفيروس بيتحور و يغير نفسه هو كمان في مطاردة متعبة جدا من اكتر من 50 سنة  و نزلة البرد في معظم الاحوال مرض خفيف و self - limited او بيجي و يروح لوحده و بدون اي علاج و بالاخص المضادات الفيروسية .. و في 80% من الحالات مالهوش اي مضاعفات .. و مع ذلك موش لازم ناخده بالبساطة دي .. اولا لانه ممكن يؤدي الى مضاعفات كثيرة منها التهاب الاذن الوسطى و التهاب الجيوب الانفية و التهاب الشعب الهوائية و الالتهاب الرئوي و غيره .. و حاجات تانية كتير ربنا يبعد المرض عن اولادنا جميعا .. و ثانيا لانه اعراض البرد ممكن تكون مقدمة لحاجة جامدة زي الالتهاب الرئوي او النزلات المعوية -لا قدر الله - و لسه مفيش حاجة باينة .. و عموما اعراض البرد المعتادة هي ارتفاع بسيط في درجة الحرارة ( لا يزيد عن 38.5) و رشح و عطس و ممكن سعال و كسل عام و شعور بالام في العظام .. فلو سمحت .. اذا ظهرت اي اعراض او اي علامات غير كده زي الم بالاذن او ارتفاع شديد في درجة الحرارة او سعال مستمر او مغص او صعوبة في التنفس توجه الى طبيبك فورا .. و بالنسبة للاطفال اللي بيعانوا من ازمات الربو الشعبي - حساسية على الصدر - دور البرد معناه اعلان حالة الطوارئ .. لانه ممكن دور البرد يبقى سبب في حدوث الازمة .. 2- ادوية البرد .. الولد عطس عطستين .. الحقه بدوا البرد علطول .. للاسف ادوية البرد احنا بنديها لاولادنا زي البونبوني كده  احذر .. احذر .. احذر .. ادوية البرد .. و خصوصا للاطفال اقل من سن سنتين .. معظمها له اعراض جانبية خطيرة .. و مشكلتها انه اعراضها الجانبية موش بتبان في وقتها .. و ياما حذرنا .. و ياما محدش سمع كلامنا .. و اخيرا الحمد لله وزارة الصحة فاقت و اجبرت الشركات المنتجة للادوية دي انها تكتب عليها " ممنوع للاطفال اقل من سن ست سنوات " ..  اعراض البرد ممكن تكون شديدة و انسداد الانف عند الاطفال اللي سنهم اقل من سنة بيخلي حياة الطفل مأساة ( لا بيعرف يرضع و لا ياكل و لا يلعب و لا ينام ) و اللجوء الى الادوية دي ساعات بيقى ضروري .. بس يبقى بجرعة محسوبة بالمللي و لفترة محددة و بتعليمات من الطبيب او الصيدلي موش من نفسك كده .. و في معظم حالات انسداد الانف ممكن نستخدم حاجات امان زي ال Otrivin saline drops او Physomer baby spray .. و دي عبارة عن ميه بملح من الاخر و ممكن نستخدم معاها الشفاطة لتنظيف انف الطفل من المخاط .. و ادوية البرد نوعين .. نقط للمناخير و ادوية تؤخذ عن طريق الفم .. و الادوية اللي بالفم اقوى و مفعولها احسن .. و النقط بنكتبها لحالات انسداد الانف الشديدة فقط .. موش في كل الحالات .. و لا يجوز استخدام نقط الانف لمدة تزيد عن 3-4 ايام .. و لا يجوز استخدام الادوية اللي بالفم لمدة تزيد عن 4-5 ايام .. لانه الادوية دي ينطبق عليها مثل اللي يزيد عن حده ينقلب ضده .. و هي ذات نفسها اللي بتزود انسداد الانف .. و يجب وقف هذه الادوية فورا عند ظهور سعال - سواء مصاحب للبرد او ناتج عن التهاب الشعب الهوائية - .. لانها بتجفف الممرات الهوائية ( بتخلى الكحة ناشفة اوي و بتجرح الزور بالبلدي يعني ).. و عموما .. من فضلك .. لو سمحت .. حاول تبعد عن الادوية دي لو ابنك سنه اقل من 6 سنين .. 3- المضادات الحيوية .. زي ما قلت البرد .. مرض فيروسي .. و المضاد الحيوي ده ضد البكتيريا .. يعني موش ضد الفيروس .. يعني موش هيعمل للفيروس اي حاجة .. يعني و لا له اي لازمة مع البرد .. هي موش سهلة كده .. و واضحة جدا .. انما برده في 90 % من حالات البرد الامهات عندنا بتدي المضاد الحيوي .. و تيجي و تقولي انا عارفة ابني كويس .. اول ما يعطس الحقه بالمضاد يقوم الموضوع ميتطورش .. المضادات الحيوية ليس لها اي دور في علاج نزلات البرد .. و لا نعطيها الا في حالة حدوث المضاعفات فقط .. و زي ما طلبت منكم في الموضوع اللي فات .. ترددوا دائما قبل اعطاء ابنكم المضاد الحيوي .. 4- البرد مالهوش وقاية .. لأ طبعا .. دائما و ابدا الوقاية خير من العلاج .. و في حاجات كتير ممكن تعلمها لابنك تساعده على الوقاية .. اولا .. غسيل الايدين جيدا .. ثانيا .. استخدام منديل عند العطس و عند السعال .. و لو مفيش منديل يعطس في كمه موش في ايديه .. الصين عملت بيجامات للاطفال فيها اشكال حيوانات في الكم كل لما الطفل بيعطس فيه الشكل بيكبر علشان يعلموا اطفالهم ميعطسوش في ايديهم  ثالثا .. ممنوع البوس ..خفوا على الاطفال الله يخليكم .. و دي طبعا بنلاحظها جامد في الاطفال اللي بيبقوا مسافرين بره مع اهاليهم .. الام تيجي و تقولي ده طول ما هو قاعد بره و لا بيجيله برد و لا اي حاجة و ينزل هنا في مصر و ميبيطلش عيا .. طبعا .. متوقعة ايه من المبوسة اللي وقع فيها دي  ده يدخل من هنا عند قرايبه و هاتك يا بوس ..خالته و جدته و عمته و خاله و ولاد خالاته و اي حد معدي في الشارع و حاجة جميلة ..  :ROFL_C~118 :رابعا : مصل الانفلونزا .. فعال جدا .. و هتحس بفرق .. و احسن وقت ليه هو شهر 9 .. و علشان يبقى فعال بجد .. لازم كل العيلة تاخده .. ايوه .. الاب و الام و جميع الاطفال اللي سنهم اكتر من سنة .. خامسا : ادوية تقوية المناعة زي Emmulant و الحاجات دي .. لا يوجد دليل علمي قوي على انه الادوية دي بتزود المناعة فعلا .. و انا شخصيا لا احبذها .. و برده مفيش دليل قوي على انه فيتامين سي بيقي من البرد او بيخفف من اعراضه .. و ان كنت انا واحد من الناس اول ما بيجيلي برد بجيب 10 كيلو يوسفي و اعيش وسطيهم  ..و في اكتر من دراسة جادة اثبتت انه شوربة الفراخ فعلا بتساعد على تخفيف اعراض البرد .. و كده انا ابقى خلصت .. و اخيرا .. نكاد ان نزعم انه لا يوجد انسان على وجه الارض و لم يصبه البرد .. البرد مرض فيروسي خفيف بيروح و يجيي لوحده .. الراحة في السرير و الشوربة و السوائل الدافية هي اهم علاج فيه .. بلاش ادوية البرد و المضادات الحيوية عمال على بطال .. و عند ظهور اي اعراض غريبة .. من فضلك توجه الى الطبيب فورا .. و لو الموضوع عجبكم انتظروني في الموضوع القادم عن التهابات الاذن .. و مستعد للاجابة عن اي سؤال او اي استفسار .. و تقبلوا سلامي جميعا 
__________________
Dr.wael el7yran
|
|
#2
31-10-2011, 02:17 PM
|
||||
|
||||
رد: اساطير شائعة جدا في طب الاطفال .. نزلات البرد
تسلم ايدك الغالية
 جزاك الله خيرا 
__________________
سبحانك لا علم لنا الا ما علمتنا
|
|
#3
31-10-2011, 07:36 PM
|
||||
|
||||
|
رد: اساطير شائعة جدا في طب الاطفال .. نزلات البرد
والله مجهود ممتاز كفاية انك سايب لنا وقت من وقتك وفعلا لك الاحترام والتقدير بس سؤالى بالله عليك يا دكتور انا عندى 25 سنة اعاانى واعانى واعانى واعانى من مرض اسمة التهاب حاد ومزمن فى الجيوب الانفية
جربت كل الادوية مفيش فايدة دكاترة قالتلى اعمل العملية وانا شفت انها كذا واحد مجبش نتيجة معاة العملية فدكتور الله يكرمة وصفلى قطرة اسمها اوتروفين اخدها تريحنى جدا ولا كانى فى اى حاجة الكلام دا من 7 سنوات كدة وانا بستعمل القطرة بعد معاناة من المرض بس بقيت مع الوقت استعملها مرة مرتين سنة مثلا بقيت استعملها ثلاث اربع مرات والوقتى ممكن استعملها اقل حاجة 4 مرات وممكن خمسة كمان لكن مش اكتر من كدة اوتروفين دى عبارة عن مية وملح ومواد تانى دا كلام صيدلى ولما ذكرت حضرتك فى الموضوع افتكرت يعنى سؤالى بقى هل القطرة استعمالها يؤثر عليا فى المستقبل زى ادمنها او انها متعملش مفعول بعد كدة وهل فى حل للموضوع دا اى حاجة ولو بالاف الجنيهات وشكرا لييك جدا على فكرة اناا عارف انة مش تخصصك بس انت ممكن تكون سبب فى الموضوع وربنا يكرم
|
|
#4
31-10-2011, 08:34 PM
|
||||
|
||||
رد: اساطير شائعة جدا في طب الاطفال .. نزلات البرد
 موضوع ممتاز جداً ومكمل للموضوع السابق جزاك الله خيراً بقدر افادتك ومعلوماتك القيمة اللهم اجعله فى ميزان حسناتك  
__________________
|
|
| أدوات الموضوع | |
|
|
