على الرغم من ان ربنا ستر مصممين على بيعها

[MANDO09]

سلام عليكم يا اعضاء المنتدى العظيم
هحكيلكم على حاجة حصلتلى من يومين ثلاثة
كنت ماشى بالعربية ومعايا والدى ووالدتى انا من حلوان اصلا كنت رايح العمرانية فى الجيزة المهم ان انا كنت واخد اوتوستراد ونازل من عند الحتة اللى بين الجبلين دى وطاير على 130-140 وقدامى مقطورة زى الفل واللذيذ فى الموضوع انى قاعد اقلبله نور علشان يعدينى ...... فجأة حصل اغرب موقف فى حياتى لقيت العربية بتطلع شرار من الكبوت والعربية هدت ..... وانا مش واخد بالى انها بطلت ... غير لما جيت ادوس فرامل ولقيتها محجرة استوعبت على طول المشكلة انى كنت ماشى فى اقصى اليسار ...... أول ما استوعبت الموقف قمت مدى اشارة يمين وبصيت طبعا على مراياتى ومن ستر ربنا كان الأوتوستراد رايق أوى وماكانش فيه حاجة جاية لغاية اما قمت راكن وكل ده والكبوت بيطلع شرار ومقلكوش الحاجة كانت عاملة ايه
المهم نزلت افتح الكبوت لقيت شرار طالع من البطارية ولا كأنى عند حداد بيلحم ..... أول حاجة جت فى بالى قلت يمكن الغطا بتاع قربة المياة ضرب فدلق ماء على البطارية فعملت كدة ..... دققت واكتشفت الهبل اللى حصل فى العربية
فيه حتة حديدة هبلة كدة بتبقى ماسكة البطارية ومثبتاها اللى حصل انها اتخلعت وجت على قطب من اقطاب البطارية فحصل اللى حصل ..... قمت انا بكل بساطة شايل الحديدة وكدة كدة البطارية مبيتة فى مكانها يعنى ثابتة مش محتاجة حتة الحديدة الهبلة دى وقمت رميها فى شنطة العربية وقمت مدور العربية دارت زى الفل .... بس والدى ووالدتى قاعدين يتحايلوا عليا ارجع البيت والحاجة تقولى ابوس ايدك لف وارجع وانا دماغى والف جزمة انى لازم اكمل المشوار .... علشان عايز اثبتلهم ان العربية سليمة اصلا ولا فيها اى حاجة .... المهم قمت مكمل طريقى ومقلوش الحاجة قاعدة ورا وخلصت المصحف كله قراية .... وانا مش هاممنى ورحت لغاية العمرانية قضينا مشوارنا ورجعنا وجريت برده على 130 وانا راجع ومفيش حاجة بس الوالد والوالدة قاعدين ساكتين طول الطريق لغاية لما رجعنا حلوان وأول ما طلعنا البيت لقيت الضرب نازل من كل حتة
انت بتستهبل مش قولنالك ترجع ومش عارف ايه ...... وانا احلفلهم ميت يمين ان العربية تمام و100 * 100 لا حياة لمن تنادى واللى طلع عليهم احنا اتشائمنا من العربية دى ... شوفلها بيعة ..... وانا ياجدعان ابوس ايديكم العربية بقالها سنة معانا نبعها بعد ماظبطناها ..... وانا بينى وبينكم مكنش فى دماغى بيع العربية خالص غير فى حالة واحدة انى ابدلها بحاجة فرنساوى ..... هى دى الحالة اللى ممكن فيها بس ابيع عربيتى ..... معلش انا طولت أوى بس عايز حد من شباب المنتدى العفاريت يقولى اقنعهم ازاى بان العربية كويسة لأنى مش عايز ابيع دلوقتى لأنى كدة كدة ناوى على لوجان ان شاء الله بعد سنة كمان ...... أعمل ايه بقى ..... مستنى نصايحكم ؟؟؟

[ayman goda]

الف سلامه عليكم جميعا امسك فى عربيتك واوعى تفرط فيها
طالما انت فاهمها وهى فاهماك==علقه تفوت ولا حد===========

[AbOnOrA]

متزعلش منى انا اسلام ابنى لو عمل زيك انا هخلية يبيع العربيه ويركب المترو مش يغيرها بس

فاحمد ربنا انهم عايزين يغيروها بس

يا راجل حرام عليك ده انت اديتهم حصة رعب مركزة على مدى ساعة وزيادة وكمان بتجرى تانى فوق 120

بصراحة حرام عليك بجد انا اصلاً بموت فى الجرى وبجرى فعلاً بس عمرى ما بجرى وانا معايا حد وخاصة اهلى وعيالى

الف سلامة عليكم اهم حاجة والحمد لله انها جت على قد كده و انا شايف ان انت اللى محتاج حد يقنعك تبطل تهور فى السواقة الاول والوالد والوالدة بعدها هينسو اللى حصل

[AbOnOrA]

ياريت تقراء الموضوع ده

بتحب السواقة بسرعة ؟؟

[د.هبه77]

الف سلامة عليك وعلي الحاج والحاجة والحمد لله انها حاجة بسيطة
هي المشكلة انك بس ضغط علي اعصابهم شوية
كان مفروض
طالما هم كانو خايفين اوي كدة يعني وقفت بالعربية وركبت تاكسي بدل الرعب اللي هم عاشو فيه دة
خصوصا ان الاهل لما بيكبرو قدرتهم علي تحمل الاخطار وخوفهم من اي مشكلة بيزيد جدا
ودة اللي خلاهم لما ترجع البيتمن كتر التوتر
عموما حصل خير
بس هي كان حصل منها حاجه قبل كدة يعني خلتهم متشاءمين منها؟
خلي ميكانيكي يشوفها(كدة كدة للاحتياط برضة) واقنعهم انه شافها وقالك ان دي حاجه مش مهمة خالص وان الموضوع عادي وبيحصل وان هو شاف العربية خلاص
لانه كان عيب بسيط (ودي حقيقة)
وان اد اية انت بتخاف عليهم اكتر من نفسك انت شخصيا ومستحييييييييييييل تركبهم عربية او تعرضهم لاي مشكلة او خطر لانك بتخاف عليهم ومع الوقت والتجارب هينسو (بس بصراحة هياخدو وقت شوية - انت خوفتهم اوي-) اصبر انت بس شوية ومتستعجلش ربنا يحفظلك الوالد والوالدة