طريقة عزل صدر وارضية السيارة (دايو لانوس) . بالتفاصيل والصور

[مصطفى-حسن]

قبل ما ابدأ فى شرح طريقة عزل صدر وارضية العربية
لازم انوة الى ان الموضوع دة هو نهاية مواضيع تفكيك صالون السيارة بالكامل
وكان المفروض انى احطهم ورا بعض بالترتيب
بس جة موضوع فلتر التكييف وتنضيف التلاجة فى النص ( بالنسبة للناس اللى متابعة)
فهما دول اللى وقفوا تسلسل المواضيع

والهدف الرئيسى من التفكيك كان عزل صدر وارضية العربية بالارما فلكس الايطالى 9 مم عزل صوت وحرارى
وعشان انفذ الموضوع الموضوع دة
او عشان تنفذة انت
هتلتزم بترتيب الفك فى المواضيع اللى انا عملتها دى

1 -قطمة الدركسيون http://www.**********.net/Nile/342016-a.html


2 -لوحة العدادت

http://www.youtube.com/watch?v=AiaOHNniMCQ

3 - التابلوة http://www.masrmotors.com/vb/showthread.php?t=111811

4 -وحدة التكييف
http://www.masrmotors.com/vb/showthread.php?t=115410

ودى الخامات اللى انا استخدمتها









بعد ما هتخلص كل الفك اللى سبق هتكون العربية بقت بالمنظر دة


كدة مش هيفضل عندك غير الدواسات (بنزين - فرامل - دبرياج )
اسهل دواسة فى الفك هيا البنزين يليها الدبرياج ( اصعب قليلا) يليها الفرامل (صعبة جدا )

وفكرة الفك عشان تبقى متابع معايا وفاهم هيا انى هفك الدواسة من جوة
لكن هسيب باقى المنظومة بتاعتها من برة
يعنى ببساطة هسحب الدواسة من المنظومة اللى هيا شغال فيها
مش هفك الدواسة كلها بالمنظومة

نخش على اول واحدة
دواسة البنزين ودى اسهلهم

الاول هتلف البكرة دى يمين وبعدين تحرر الواير منها


وبعدين هتخش جوة العربية
تشد الواير بتاع البنزين رقم 1
وبعدين تفك الصامولتين 12 اللى هما رقم 2 و 3
هتلاقى الدواسة نزلت فى ايدك



نخش على دواسة الدبرياج
الاول هنفك قربة المية ونرفعها من مكانها (صامولتين 10)



وبعدين هنفك المسمارين ال 12 دول



وهندخل جوة العربية
مفيش حاجة ماسكة دواسة الدبرياج غير مسمار املس فى نهايتة تيلة صغيرة
وصامولة 12 راكبة من فوق اللى هيا دى



هتفكها طبعا
وهتسحب التيلة بذرادية او بنسة بوز صغير
وبعدين هتسحب المسمار الاملس
هتلاقى الدواسة طلعت فى ايدك
والدراع اللى جاى من الماستر العلوى زى ما هوة فى مكانة زى كدة







كدة مش فاضل غير ارخم دواسة على الاطلاق وهيا دواسة الفرامل
الاول هتفك الصامولتين رقم 2 و3 من صدر العربية
لان اللى انت شايفهم دول هما راس المسمار
بس خلى بالك قبل ما تبدأ الفك الدواسة دى رخمة قوى
او بمعنى اصح مكان الصامولتين صعبين قوى
هتضطر توسع لنفسك بانك تفك كام حاجة صغيرة من صدر العربية فى المكان دة عشان تعرف تشتغل
ومش هيتفكوا غير ببيبة 12 او لقمة



بعد ما هتفكهم مش هيفضل غير المسمار رقم 1 هتفكة
ونفس اللى انت عملتة فى دواسة الدبرياج من سحب التيلة والمسمار الاملس
هوة نفس اللى هتعملة فى دواسة الفرامل
وهيبقى دة الشكل الرئيسى فى النهاية


طبعا فى الاول اشتغلت تنضيف وغسيل بالنزين لحد ما بقى صدر العربية نضيف جدا وزى الفل



وبعدين جبت فرخ ارما فلكس بيجى مقاسة 1 فى 2 متر
وبدات ارسمة على صدر العربية وافرغ مكان كل مسمار وكل خرم عشان لما ارجع اثبت كل حاجة مكانها تبقى سهلة



وعشان الفرخ دة هيبقى فى صدر العربية يعنى الحرارة كلها
فانا لزقتة ب سيلكون حرارى



طبعا كان فية فراغات فى الاجناب عند الكنترول بتاع العربية
وعند مدخل الضفيرة من الشمال
فبدأت اشتغل بالمقص انى اقص حتة من الارما فلكس على اد المكان بالظبط والزقها
كانت فكرتى كأنى بعمل عزل للهوا
مش عزل للحرارة او الصوت
فكنت بكتم كل حتة وكل ثغرة ممكن يدخل منها الهوا
ودة اللى ادانى النتيجة الممتازة بعد كدة بصراحة

بعد ما خلصت الصدر بتاع العربية كلة واتاكدت ان انا عزلت تمام
قفلت الدواسات تانى بنفس ترتيب الفك
و قفلت الهيكل الرئيسى بتاع التابلوة تانى

وكان فية حتت لسة سليمة من العزل بتاع الفابريكة (الصوف الصخرى )
حطيتها فوق الارما فلكس
وبعدين قفلت التابلوة فوق الاتنين
ودة كان الشكل النهائى









وبعدين بدأت اعزل باقى ارضية العربية بالارما فلكس 9 مم
الدواسة ليمين


الدواسة الشمال



العتب اليمين



العتب الشمال



الدواسة الخلفية




التجويف بتاع فرامل اليد والدبرياج اللى بيبقى ف نص العربية



وكملت عزل لحد اول غطا التنك اللى بيبقى تحت الكنبة الخلفية

وبعدين فكيت السماعات وسلوكها
وعزلت الجزء الخلفى كمان
والتجويف بتاع العجل من جوة





من الاخر عزلت كل حاجة ما عدا الحتة الى بتكون تحت الشلتة بتاعة الكنبة الخلفية
وبعدين رجعت جمعت كل حاجة تانى زى ما كانت
ـــــــــــــــــــــــ

بس هنا انا هتوقف لحظة لان دة نهاية الموضوع
فمينفعش اخطفة كدة
عشن لما حد ييجى يفكر يعمل الموضوع دة
يبقى عارف ازا عملت الموضوع لوحدى وبنجاح

1- كل حاجة كنت بفكها كنت بحط المسامير بتاعتها فى كيس واكتب علية واكتب ترتيبة فى الفك يعنى مثلا
فكبت درج التابلوة .... اروح حاطط مساميرة فى كيس وكاتب عليهم مسامير درج التابلوة خطوة رقم 1 واروح حاططهم كلهم فى كيس بلاستيك
وهكذا

مثلا قاعدة عصاية الفتيس اروح حاطط المسامير بتاعتهم فى كيس وكاتب عليهم مسامير قاعدة عصاية الفتيس خطوة رقم كذا

وكد لما جيت اقفل ملقيتش اى صعوبة خالص
ومفيش مسامير ركبت مكان مسامير

2 - رقمت الفبر بتاع العتب وانا بفكة يمين وشمال

3 - كان فية دفتر صغير كنت بسجل فية كل خطوة بعملها سواء كانت كبيرة او صغيرة او تافهة لان الاعتماد على الذاكرة ممكن يخون

4 - الموضوع دة استغرق معايا 4 ايام شغل متقطعين لانى كنت بعمل حاجة معملتهاش قبل كدة فكنت حريص وصبور لكن لو الزمن رجع بيا الشغلانى دى
كلها فك وتركيب وعزل وتقفيل تاخد معايا شغل يوم كامل من 9 ص الى 12 مساء
.........................

بعد ما خلصت شغل كان لازم التقييم
وانا التقييم هنا هقولة بمنتهى الامانة والمهنية مش عشان انا تعبت يبقى لازم اقول ان كل حاجة زى الفل
لا طبعا
لا دى امانة
ولا دى مهنية فى العمل

التقييم كتالى
1-عزل الحرارة فى الصالون بقى 90% بدون اى مبالغة بمعنى ابسط مفش اى حرارة بتحسها من تحت او من صدر العبية خالص نهائى بمعنى الكلمة

والتكييف بقى باشا بمعنى انى على سرعة 3 فى التكييف فى ظهيرة يوم حار صيفى ممكن اسقع من التكييف فى طريق سفر وانا عارف انك
مستحيل تسقع من تكييف الانوس

2 - عزل الصوت مش هعرف اقيمة بالظبط لانى بصراحة مركبتش عربية لانوس موديل السنة فابريكة عشان اعرف اقيم
لكن هقول على حاجة ابسط
لما تكون راكب العبية ومقفل الازاز بتاعها وماشى على الخامس على سرعة 90 كم
اعلى صوت هتسمعة هيكون صوت الماتور
وبعدية صوت الاسفلت
وبعدية صوت احتكاك الهوا بجسم العربية

فى الاول كنت بسمع صوت المكنة بوضوح والصوتين التانيين مكنش بسمعهم خالص (صوت الاسفلت وصوت احتكاك الهوا)

دلوقتى بقى صوت الماتور مكتوم خالص وصوت الاسفلت تقريبا مسموع وصوت الحتكاك الهوا بقيت بسمعة لو ركزت معاة

3 - لما تكون ماشى فى طريق فية طينة وتراب بتسمع صوت الطينة وهيا بتخبط فى جسم العربية من تحت ... دلوقتى تقريبا مبسمعهوش


لكن النتيجة النهائية انى كنت راضى تماما عن عملية العزل رغم ان الابواب والسقف والقوايم مقربتش ناحيتهم ودة اللى انا بفكر اعملة بعدين (عزل الابواب والسقف والقوايم )

واى استفسار انا حاضر

[AbOnOrA]

بسم الله ماشاء الله عليك وعلى العربيه بجد تسلم ايدك على المجهود والشرح والصور وكل حاجة موضوع رائع وفى رائى مفيد جداً فى الجو والطرق بتاعتنا ديه وان كان مرعب ان حد يعملة بنفسه بس ممكن اى حد عايز يعملة يروح لمتخصص بعد ما يذاكر الموضوع ده كويس ويبقى عندة تصور كامل للشغل اللى هيتعمل ويعرف يراجع مع الصنايعية تسلم ايدك مرة تانية وجزاك الله كل خير


كنت عايز اسألك الموضع ده كلفك فلوس قد ايه

[ahmed_eng2001]

شغل نضيف جدا ... و تصوير و نقل جيد جدا

سؤال .... ايه هى الخامات الى استخدمتها ... و جبتها من فين ؟ و اسعارها ايه ؟
انت ليه مستخدمتش العازل المفضض ؟ فيه حاجة شبه اللباد .... ممكن نستخدمها ؟

[eng/walaaeldeen]

السلام عليكم
الله ينور عليك ويجزيك خير
بس الخامات اشتريتها منين وبكام
والله المستعان

[مصطفى-حسن]

المشاركة الأصلية كتبت بواسطة AbOnOrA بسم الله ماشاء الله عليك وعلى العربيه بجد تسلم ايدك على المجهود والشرح والصور وكل حاجة موضوع رائع وفى رائى مفيد جداً فى الجو والطرق بتاعتنا ديه وان كان مرعب ان حد يعملة بنفسه بس ممكن اى حد عايز يعملة يروح لمتخصص بعد ما يذاكر الموضوع ده كويس ويبقى عندة تصور كامل للشغل اللى هيتعمل ويعرف يراجع مع الصنايعية تسلم ايدك مرة تانية وجزاك الله كل خير كنت عايز اسألك الموضع ده كلفك فلوس قد ايه

منور الموضوع ياابو نورا
الموضوع كلة على بعضة كلفنى حوالى 500 ج وفاض خامات كمان
بس النتيجة مرضية جدا جدا خصوصا العزل الحرارى

وخلى بالك اى حد ممكن يعملة لو عندة الامكانيات (العدة) وعندة ارادة وغاوى فك وتركيب

المشاركة الأصلية كتبت بواسطة ahmed_eng2001 شغل نضيف جدا ... و تصوير و نقل جيد جدا سؤال .... ايه هى الخامات الى استخدمتها ... و جبتها من فين ؟ و اسعارها ايه ؟ انت ليه مستخدمتش العازل المفضض ؟ فيه حاجة شبه اللباد .... ممكن نستخدمها ؟

العازل المفضض دة الشعبى
واللباد دة بردو شغل شعبى
وانا كنت عايز اعمل شغل على نضيف
الارما فلكس والصوف الصخرى هما دول العوازل اللى على حق ربنا
الخامات جبتها من نجيب الريحانى فى القاهرة
وسعر الفرخ 9 مم 75ج
وسعر الكولة العلبة ب 25ج

المشاركة الأصلية كتبت بواسطة eng/walaaeldeen السلام عليكم الله ينور عليك ويجزيك خير بس الخامات اشتريتها منين وبكام والله المستعان

وعليكم السلام
جاوبت على نفس سؤالك فى المشاركتين السابقتين
فاعذرنى لعدم التكرار
واسعدنى مرورك