ارشيف الاستراحة 2010

[khaled_1993m]

لا مش للدرجة دي بس اصلي كنت في اسكندرية و كنت مخنوق فقلت اتمشي بالعربية

[AbOnOrA]

والله يا انجكشن انت رايق وموضوعك جامد بجد

بص يا سيدى التمشيه بالعربيه من 3 - 4 صباحاً لحد 5 - 6 فى القاهرة شىء رائع فعلاً لاكثر من سبب
اولاً بتهدى الاعصاب فعلاً وممكن تبقى فرصة تفكر فى حاجات كتير او حتى متفكرش فى اى حاجة وتفضى دماغك
ثانياً تشم شويه اكسجين نضاف وتستمتع بمشاهدة البلد وشورعها فاضيه ونظيفة غالباً
ثالثاً تستمتع بالسواقة خاصة والعربيه ماشيه مستريحة والموتور منعنش من نسبه الاكسجين ومروحة الريداتير واخدة تعسيلة لانك ماشى والهواء البارد فى وش العربيه طوالى بدون توقف والفتيس مرحرح على الاخر من قله النقل والمشى على غيارين ثالت ورابع او رابع وخامس لو طريق طوالى

انا شخصياً بحب اعمل كدة كتير ساعات اكون راجع من مشوار متاخر فاخود لفة كدة قبل ما اروح او اخد اطول طريق للبيت وساعات انزل مخصوص اخد صلاح سالم لحد القاهرة القديمة والف فيها شوية وارجع تانى وساعات حتى انزل امشى بلا هدف او اتجاة ويبقى مشى للمشى فقط
قليل لما بجرى بالعربيه فى الوقت ده لكن غالباً بحب امشى على غيارات عالية ومحسش بالموتور ولا صوت العربيه واستمتع بالهواء والطريق وبس

لكن الحلو دائما مبيكملش وزى ما فيه مزايا ومتع كتير فى المشى فجراً فيه عيوب ومشاكل برضو

اولاً ممكن ربنا يرزقك بيوم يكون فيه شدة ولا حاجة وتلاقى نفسك داخل فى كمين وضابط ولا امين بايخ يهرى العربيه تفتيش كانك مخبى مفاعل نووى فى العربيه وممكن لو الرخصة فيها حاجة ولا فيه فامية ولا ممعاكش مثلث ولا طفاية ولا اى حاجة من بنود الغلاسة اياها تلاقى نفسك عرضة للابتزاز ويا اما تدفع يا اما عيش بواخة معاهم لحد ما الكمين يتفض

ثانياً ممكن وانت ماشى بتجرى على اساس ان الطريق فاضى او حتى ماشى على مهلك وسرحان فى ملكوت الله ربنا يرزقك بواحد من لاعبى نيد فور سبيد يطلعلك من تقاطع ولا شارع جانبى وياخدك بالحضن بعربيتة (لاقدر الله)

ثالثاً ممكن لو انت بتجرى برضو ربنا يرزقك بنفس الشباب بتوع نيد فور سبيد ويطلع يجرى وراك ويسخنك لحد ما تلبسو مع بعض فى عمود او تنطو من فوق كوبرى (احدكما او كلاكما) لاقدر الله برضو

رابعاً ممكن ربنا يرزقك بعصابه من عصابات التقليب اليلى ودول منتشرين اوى بقالهم فترة وليهم اساليب كتيرة بداية من موتيسكلات او عربيات تزنق عليك او تفتعل معاك خناقة تنزل تتخانق يروقوك ضرب ويقلبوك انت والعربية او فى الشوارع الهادية اكتر يحطو عائق على الطريق تنزل تشيله او تقف تلاقيهم طلعو عليك وبرضو نفس النتيجة

واخيراً لو لاقدر الله العربيه حصل فيها اى مشكلة صعب جداً تلاقى حد يلحقك او يساعدك او يزق معاك او تلاقى واحد صاحبك صاحى يجيلك او ميكانيكى يحرك ايدة من تحت الغطاء علشان يرد عليك

علشان كده انا بفضل دائما لهواه التريض بالسيارات انهم يراعو النقاط التالية
1- يكون وضعك القانونى سليم والعربيه مش متفيمة او فيها اى حاجة تستدعى رخامة من اخوانا البعدا

2- متجريش بليل على اعتماد ان الدنيا فاضيه لان كل الناس غيرك فاكرة كدة برضو وممكن فى اى لحظة تلاقى واحد طالعلك من اى حتة باقصى سرعة فلازم تكون منتبه برضو

3- بناء على رقم 2 برضو متخليش اى حد يسخنك على الطريق ويخرجك من الفسحة الجميلة اللى انت عاملها لنفسك وتشد معاه او ترتكب حماقة تندمو عليها بعدين

4- امشى دائما فى طرق عامة وكبيرة ومنورة كفاية لتجنب احتمالات التحرش بيك فى مكان مقطوع

5- اتاكد ان عربيتك سليمة وفى افضل حالتها مش تمشى بعربيه فاتحة بقها وبتتلكك علشان تعطل لان العطلة فى وقت زى ده هتبقى بايخة اوى

بعتذر للاطالة وبشكرك مرة تانية على الموضوع الجميل ده

[Injection]

ده أنت يابونورا كملت الموضوع, أطالة أيه بس.
بس أنت كده هتخوفتنى من النزول, حرامية وشغل تيتو وبتاع, مش كفاية الحكومة الموفرة اللى بتطفى عواميد النور علشان فواتير الكهرباء بتاعة الشارع والواحد بيمشى بالبركة.
طب تصدق أنى كنت بنزل أجرى جمب القصر بتاع الحدائق على رجلى الساعة 3 بالليل والشارع مفيهوش غيرى وعساكر القصر الغلابة.
بس الموضوع فعلا بيروق الدماغ وبيخلى الواحد فى عالم تانى.

ومقلتلناش برده موقف الحكومة فى البيت أيه؟

[lol64]

موضوع جميل ياانجكشن بس لو انا نزلت وانا فى القاهره فى وقت زى ده عشان اتريض هاطلق بعيد عنك

[Injection]

المشاركة الأصلية كتبت بواسطة lol64 موضوع جميل ياانجكشن بس لو انا نزلت وانا فى القاهره فى وقت زى ده عشان اتريض هاطلق بعيد عنك

هههههههههه, يبقى أنت من الفئة الأولى.

أوعى تزعل ياباشا بهزر معاك.