ألهاكرز

[المناور]

بما انك شارى النسخة دى فأنت من حقك يا أبو نورا انك تفتح تيكت فى موقع vb وتقولهم على المشاكل وتطالبهم بحل .

ونفس الشىء فى السيرفر المستضيف كلم الناس فيه علشان هما المفروض يصلحوا اى bugs موجودة بشكل دورى .

وكمان المشكلة بتاعة تغيير الصفحة الرئيسية دى قديمة قوى وكان حلها بسيط على حسب ذاكرتى .

وبالنسبة لتحديث اصدار المنتدى فهو بسيط وسهل وماعدش بيعمل مشاكل زى زمان هو القرف بس لو الهاكات اللى انت حاططها كتير بيتهيألى لازم تشيلها قبل التحديث وترجع تحطها تانى .

وربنا يوفقك

[AbOnOrA]

يا باشا الدعم بعد السنة الاولى بفلوس والابجريد بفلوس برضو

وتحديث الاصدار يستلزم تغيير اغلب الهاكات بنسخ متوافقة مع الاصدارة الجديدة كمان الستايل والقوالب بتاعته لازم تتعدل او بالاحرى تتلغى خالص وتتعمل من اول وجديد على النسخة الجديدة

عامة احنا شغالين فى غلق اغلب الثغرات المستخدمة حالياً وفى باكب يومى بيتاخد من كامل محتويات الموقع حتى لو فجرو السيرفر باللى فيه فيه سيرفر تانى نرفع عليه الباكب

[المناور]

أنا عارف حكاية السنة دى وكنت فاكرك لسه فيها ، طيب يا ابو نورا معقول تقعد بالنسخة اكتر من سنة انا اللى اعرفه ان vb لما بيطلعوا نسخة جديدة بيقولوا على الثغرات اللى كانت فى النسخ القديمة التى تم حلها وده بيساعد المخترقين على معرفة الثغرات اللى بيها بيخترقوا الناس اللى لم تطور بعد .

لو عايز رأيى أنا شايف ان تطوير المنتدى إلى احدث اصدار احسن بالنسبة لك لانه حايريحك من الثغرات واغلاقها واللى لعلمك مش حاتخلص والنسخ الجديدة بقى فيها شوية مميزات ظريفة للهاكات وغيره واسرع كمان .

كمان الشكل الخارجى والكماليات على جمالهم إلا ان المضمون اهم بالنسبة لى يعنى انا بدخل المنتدى ده مش علشان شكله ولا هاكاته أنا بدخل علشان الناس اللى فيه والمعلومات اللى بستفيدها وروح الإخوة الموجودة بين الأعضاء .
يعنى انت لو غيرت للشكل الافتراضى وطيرت الهاكات أنا مش حاقول لأ مش حادخل المنتدى تانى ، لأن فى مقابل الشكل التقليدى حلاقى المنتدى شغال معايا علطول ووقت ما احب ادخله الاقيه ، انما ايه فايدة الشكل الحلو والمنتدى بيقع لساعة أو اتنين كل يومين تلاتة من شوية عيال عبط ؟

عندى اقتراح ليك مش عارف ينفع ولا لأ ايه رايك لو قمت بشراء النسخة الجديدة ثم ترفعها على السيرفر بأى اسم جديد وتربطها بقاعدة البيانات ثم تقوم بكل التطوير عليها من هاكات وستايل وكل ما تحتاج بيتهيألى الحكاية دى بتنفع وأنا فاكر ان واحد زميلى عملها فى منتدى قبل كده .

أو ممكن لو موضوعك حايطول اعمل سيرفر local على جهازك بالاباتشى مثلا وارفع عليه النسخة الجديدة ومش لازم تبقى مشترى النسخة الاصلى هات أى واحدة من المضروبين لان دى نسخة شخصية وجرب عليها الهاكات والاستايل وكل اللى انت عايزه وبعد ما تستقر الأمور وتطمئن اشترى النسخة وارفع عليها كل اللى انت عملته .

[المناور]

مبروك التطوير يا أبو نورا ان شاء الله تحس بفرق التطوير والدعم .

والعيال العبيطة اللى كل شوية كانوا بيضربوا المنتدى يخبطوا راسهم فى الحيطة .

[المفكر]

أبو نورا
الشكر مش كفاية للمجهود الرائع
أنا عارف إننا بنتكلم بس وحضرتك بتبذل مجهود في التعديلات
ألف شكر ليك
ويارب المنتدى يرتاح من الهاكرز الفاضيين لينا