تمت بحمد الله من أكسنت الى فيرنا

[moh taia]

السلام عليكم

النهارده بعت عربيتى الأكسنت كانت 1500 كامله مانيوال واشتريت فيرنا 1600 موديل 2007 مانيوال انا جبتها من اسكندريه فكان عندى فرصه وانا راجع انى أعيش معاها وحبيت أشاركم الى أنا حسيته

- مبدئيا الحمد لله انا بصراحه مبسوط بالعربيه جدا فيه فرق فى الفخامه الداخليه عن عربيتى تابلوه أحلى انوار أقوى كل حاجه اتغيرت للأحسن ما عدا الباور فضل زى ما كان فى عربيتى حاسس انه تقيل حبتين عن اى عربيه باور تانيه

- العربيه ما شاء الله سحبها ممتاز ولو انى معديتش ال 120 لكن تسارعها عموما جميل حقيقة

- بالنسبه للثبات انا مجربتش لسه على سرعات عاليه بس هيه كانت كويسه جدا معايا فى الحقيقه وده يمكن كمان يكون راجع لأن فيها جنوط 15 بوصه (195 50 15 ) حظى كان كويس فى الموضوع ده

- الفرامل فيها مشكله واتفقت مع الميكانيكى بتاعى انى هروحلو من بكره بدرى ان شاء الله علشان نشوف الموضوع ( فيه حدفه جامده يمين مع الفرامل الجامده تختلف قوتها حسب قوة الفرمله وفيه موسيقى طالعه من العجله الشمال ورا فتقريبا كده المشكله هتطلع ان الفرامل سايبه فى العجله دى والله أعلم

- وتانى مشكله حسيت بيها تقريبا كده هتكون بخصوص الطنابير لأن فيه رعشه فى دواسة الفرامل مع الفرمله ( أكن العربيه فيها ABS )

- طبعا المشاكل الى انا ذكرتها دى ما تعيبش العربيه فى حاجه هيه ببساطه تعيب مالكها الأول انه مكانش مهتم بصيانة حاجات مهمه زى دى

- استهلاك البنزين عالى نوعا ما عن عربيتى الأكسنت وان شاء الله فى أقرب فرصه هفول التانك وهطلع مشوار سفر علشان احسبها بالظبط - الأكسنت كانت حنينه شويه كانت بتعمل 250 كيلو ب 13 لتر بنزين لكن بصراحه فرق الأداء بين الإتنين يستاهل

بس كفايه كده انا اتكلمت كتير زمانى زهقتكم بس يعنى حبيت اشاركم احساسى وعموما أنا بجد فرحان جدا بالعربيه ويا رب العين متطولنيش زى ما حصل اول ما جبت الأكسنت كان بيحصلى حواديت عجب

وان شاء الله هعرفكم ايه الى تم فى موضوع الفرامل و الطنابير ده طبعا لو صدقت توقعاتى

وتقبلوا تحياتى

[hazem_khidr]

الف الف مبروك و ربنا يديك خيرها و يحميك من شرها يا رب
بالنسبه للاصوات المسموعه في الغالب بسبب الجبط الكبير اللي راكب عندك
شوف عفشجي يضبط الليله و يقولك الصح و اعمله
ولو بتمشي في طرق غير ممهده كتير يبقي تركب جنط اصغر من كده علشان تحافظ علي عفشه العربيه

[ميدو ستار]

المشاركة الأصلية كتبت بواسطة hazem_khidr الف الف مبروك و ربنا يديك خيرها و يحميك من شرها يا رب بالنسبه للاصوات المسموعه في الغالب بسبب الجبط الكبير اللي راكب عندك شوف عفشجي يضبط الليله و يقولك الصح و اعمله ولو بتمشي في طرق غير ممهده كتير يبقي تركب جنط اصغر من كده علشان تحافظ علي عفشه العربيه

مبروك عليك
ربنا يديك خيرها ويكفيك شرها

بالنسبة للاصوات المسموعة
زى اخونا الفاضل ما قال لك الجنط الكبير
تفبل تحياتى

حاول تغير الجنط ل 14 هتحس بفرق كبير لان ده الجنط اللي العربية بتتظبط عليه وكل ما حجم الجنط كبر كل ما كان بياثر علي العفشة عندك ونصيحة ظبطها في التوكيل احسن ما حد يلعبلك فيها بره علي الاقل هتكون ضامن ان اللي هيعملهالك هيكون فاهم هوه بيعمل ايه وخليه يبصلك علي الطنابير وتيل الفرامل عندك ولو فيهم مشكلة غيرهم والف مبروك يا برنجي وربنا يديك خيرها ويكفيك شرها والفيراناوية زادو واحد دلوقتي

[Bendary]

الف مبروك - ربنا يديك خيرها ويكفيك شرها
بس ممكن تقولنا اشتريت بكام والعربيه كانت عامله كام كيلو - فقط للعلم بالشئ مش اكتر

-- موضوع العين ده لا مفر منه ، ياريت تتصدق بشئ او تطعم انسان محتاج .
ربنا يباركلك .