استفسار من اهل الخبرة ... طمنوني ربنا يريح قلبكم

[hossamhussein0]

السلام عليكم و رحمة الله
اشتريت عربية مرسيدس عيون E200 موديل 1996 ... و عندي استفسارين

الاول
لاحظت عليها ان لما اجي ازود علي السلانسيه الموتور بيقطع لما عدد لفات المحرك بيوصل 3000 لفه عارفين انتو الصوت اللي بيظهر لما حد بيزود بنزين بغشم و تحس ان الموتور بيقطع في الاخر هوه ده نفس الصوت بالضبط بس الفكرة انه بيظهر علي 3000 لفه فقط..

هل ده حمايه للموتور مثلا انه بيفصل عند عدد اللفات دي و لا ده عيب في العربية و هل اذا كان فصل حماية للموتور ممكن تعديله (اخليها عند 4000 او 4500 لفه مثلا) ؟؟ يعني هل ليه رجلاش مثلا.

اما في المشي انا مبقرص علي العربية و العربية اوتوماتيك كمان و بالتالي الفتيس بيغير علي 2500 لفه حتي مع التسارع فمش عارف لو هناك ضرورة للتزويد عن 3000 لفه هيعمل كده برضه و لا ايه النظام .

الثاني
من اسبوع تقريبا صادفني عيب غريب حصل معايا و انا ماشي و كنت لسه طالع من ملف و ببطئ شديد و مرة واحدة و بدون مقدمات العربية قعدت تبكبك من الموتور و تدي مدافع من الموتور و مش قابله زياده بنزين خالص و السلانسيه بيرتل جامد وكل لما احاول ازود بنزين تزيد الفرقعه .. المهم سايستها و مشيت سلانسيه علي سرعه 20 كم علشان كنت مضطر "في شارع كله معسكرات جيش و مينفعش اقف" و بعد حوالي 250 - 300 متر اتظبطت لواحدها و مشيت زي الفل و جريت بيها تمام و من ساعتها روحت بيها كذا مشوار و كله تمام ؟؟ مش عارف ده كان ايه ناس بتقول عيب بنزين و دي اعراض بدء تلف الطلمبه و ناس بتقول عيب كهرباء و ممكن يكون موبينه او سلك بوجيهات او بوجيهات نفسها و العربية دي قطع غيارها غاليه جدا و مينفعش فيها انك تغير حاجه قونطه بدون داعي و المشكلة كمان ان العيب اختفي فبالتالي انا لو غيرت قطعه غيار مش هيه اللي عاملة المشكلة مش هيبان معايا و ممكن لا قدر الله العيب يظهر تاني و تعملها معايا بالليل او في حته مقطوعه او طريق سفر و ساعتها هتبقي حوسه
في انتظار تعليقات و اراء ذوي الخبرة او مالكي العربيات المشابهه علي النقطتين دول حتي يطمئن قلبي

[AbOnOrA]

مكنة العربية ديه مش مظبوطة ومينفعش فيها تخمين زى ما قولت صح ولا اى ميكانيكى روح لحد متخصص مرسيدس يكشف بالجهاز ويشوف مسجلة اعطال ولا لاء وغالبا هتلاقيها مسجلة وكشف الكمبيوتر مش حكاية ولو مركز متخصص مرسيدس مش هيغير حاجة الا وهو متاكد العربية ديه فيها ظبط كمبيوتر وحساسات كتير وغالبا حساس هو اللى بيبرجل كده ويلخبط الدنيا ويرجع تانى
موضوع كمان انها تفصل على 3000 ده اكيد مش طبيعى وعامة الموديل ده مشاكلة كتير ومينفعش ميبقالكش ميكانيكى تتابع معاه صيانتها والا هتصرف كتير اوى فى اللف والدوران مع كل عيب وهى مشاكلها كتير

[hossamhussein0]

والله يا ابو نورا روحت قبل كده لمركز متخصص في المرسيدس خلف قسم عين شمس رشحه لي احد الاعضاء و كان بيقول فيه شعر ... كنت ساعتها عندي مشكله في الزجاج الامامي و المركز ده شامل من كله ميكانيكا و تكييف و كهرباء و عنده كمبيوتر و حاجه فل الفل عارف قالولي ايه .... تجيب مكنتين زجاج امامي و كنترول (مديول) زجاج كهرباء حاجه كده بتاعت 3500 جنيه و كان الكهربائي بتاعهم مش فاضي يوميها و انا الزجاج مقفول و معلق مش راضي يفتح .... المهم روحت للكهربائي بتاعي وهوه ملهوش في المرسيدس و لا التكنولوجيا العاليه دي و صلح الزجاج عارف العيب طلع ايه فيوز بجنيه مهزوز ....

شوفت بقه المراكز المتخصصه اللي بتشتغل بالكمبيوتر بتشتغل ازاي في مصر للاسف و المهم سبحان الله عندهم عربيات قدام المركز بالطابور و اقل واحده فيهم موديل فوق الالفين

علشان يريح دماغه ادفع يا باشا 3500 جنيه غير مصنعيات ب 500 كمان يبقي 4000 جنيه و في الاخر العيب فيوز

[AbOnOrA]

عارفة المركز ده علشان كنت بصلح عربيتى عند منصور اللى قدامة فى نفس الشارع بتاع البى ام وصدقنى النظام واحد فى المراكز اللى من المستوى ده واللى عباره عن ورشة ربنا كرمها وكبرت شوية وديه ليها نظام كالتالى
_ متسيبش نفسك للصنايعيى ابداً لان الصنايعيى نفسه ممكن يكون بيطفش وبيسرق زباين لحساب ورشة تانية تبعة وممكن يكون الصنايعى البريمو طفش وده لسه جاي جديد ووممكن حاجات كتير

_ تروح وانت عارف انت عايز تعمل ايه وتفاصل وتقاوح وتروح وتيجي زى اى ورشة عادى لان زى ما قولنا ديه ورشة كبيرة حبتين مش مركز ولا توكيل وان كان التوكيلات ساعات مبتفرقش كتير برضو

_ لازم تكشف كمبيوتر ولازم تفهم وانت اللى تقرر هتعمل ايه وتشترى ايه ديه بتاعتك عايز تستسهل وتسيب صنايعي يقررلك فديه هتبقى غلطتك انت

مثال فى عربيتى لما جابت فتيس انا مكنتش مصدق ان عربية المانى حديثة تبقى فيها مشاكل فى اساسايات زى الات الجر فركنتها فى الجراج وجبت شاب ابن حلال كدة بالجهاز وكشف عليها وانا معاه يادوب اخدت منه كود العطل واديته 50 جنية وطلعت بحثت عنه ع النت ودردشت فى المنتديات ومع اصحابى واستقريت على حكاية الميكاترونكس فى فتايس ال ZF والشغلانة اياها ديه فروحت اتكلمت معاه على العيب وفاصلت وفهمته انى عارف بتيجي منين ودفعت 3000 الاف فى وقت كان فيه نفس العيب بيتعمل بضعفين وتلاتة الرقم ده

فانت مشاكلك دلوقتى فى المكنة مش فى كماليات او كهرباء ومحتاج ميكانيكى وجهاز ممكن تبداء بالجهاز وتكشف فى اى مكان او حتى تشترى كابل وبرنامج على الاب بتاعك بس اجلا ام عاجلا هتبقى محتاج تصاحب ميكانيكى وانتين وكهربائى واتنين فاهمين فى المرسيدس واديهم ماشيه فيها خاصة الموديل ده بقولك اعطاله كتير

[ahmed_eng2001]

بصفة عامة ... انا موافق ابو نورا على رايه فى الورش دى ... و عاوز اوضح ان اغلب الصنايعية بيفتوا .. و بيجربوا ... و واخدين الصنعة وراثة ... مش عن علم ... و احد حد بيجيب عربية جديدة عليه ... لازم يخبط شوية فى الاول ربنا يوفقك