النصب العلني لبيت التأمين المصري السعودي

[elkordy2000]

فعلا شركة نصابة بكل ما تحوية الكلمة من معاني لما أدفع 50% من تكاليف الاصلاح للسيارة فهذا هو النصب بعينة , الموضوع بأختصار شديد اني قمت بتأمين لدي شركة بيت النصب قصدي بيت التأمين المصري السعودي من سنتين ولم اقوم بعمل اي اصلاحات خلال تلك الفترة الحمد لله , لكن طبعا الشوارع المصرية لا تخلوا من ترك بصماتها علي السيارة من حين لأخر شوية خرابيش علي تجاريح وبعض الاحتكاكات البسيطة مع شرخ في أحد الفوانيس ( علي فكرة العربية لانوس 2 2009 ) , طبعا ذهبت لشركة التامين لعمل مقايسة اصلاح وخصوصا اني مقبل علي تجديد وفحص فقلت اعملها واخلص بدل غلاسة المرور اثناء الفحص
وفعلا ذهبت الي الشركة وكتبت في اخطار الحادث تلفيات اثناء السير والوقوف حسب ما قالي البية الموظف , وقال لي حضرتك ابعت السيارة الي مركز الاصلاح وعندنا بعض الورش في منطقة الحرفيين , قولت كويس اهي جنب مني وسهلة المهم سلمتها للمركز والشركة ارسلت المهندس المبجل للفحص والمعاينة وطبعا انا مش موجود اثناء المعاينة وواضح انهم بيتعمدوا كدة لانهم عارفين العميل هيعترض علي التقييم وطريقتة , البية عمل المقايسة علي أن كل حتة في العربية حادثة شكل يعني الجنب اليمين حادثة لوحدها والشمال حادث اخر وخرابيش الاكصدام حادث ثالث وشرخ الفانوس حادث منفصل لوحدة رابع , وطبعا كل دة علشان يلبسك مبلغ التحمل اللي هو 250 جنية عن كل حادث , لأ واية المفأجأة الكبري أن بيحاسبك بالحتة يعني هيرش العربية للأجزاء التالفة فقط مش كل العربية أو نصف سفلي مثلا , يعني من الاخر تمشي بعربية مشكلة حتة فاتحة وحته غامقة وحته فيها معجون ولو مش عاجبك كمل باقي الاصلاح والرش من جيبك طبعا اضطريت ادفع للورشة 500 جنية زيادة عن تقرير البية بتاع المعاينة علشان اكمل باقي الاصلاحات والرش
طبعا تقرير البية كان تكلفتة 2000جنية في حين ان المفروض سدادة 2500 جنية وطبعا اضطريت ادفع الفرق يعني هامشي بالعربية ملطشة بوية , المفاجأة الثانية بقة لما جيت استلم الشيك وجدت قيمتة كام 1200 جنية اول عن أخر والباقي ضربوا علية تحت بند حادث أول وثاني وثالث من الاخر أذا كان عاجبك يعني دفعت 1300 جنية من جيبي والاسم العربية متأمن عليها فعلا شركات التأمين في مصر أكذوبة كبيرة ...., شركات التامين بتظهر علي حقيقتها ساعة المصايب
انا بقول اسم الشركة علشان الناس تاخد بالها ( بيت التامين المصري السعودي ) شركة نصصصصصصصصصصصصصصصصصابة
واللي مش مصدق ممكن ارفع لة صورة الشيك ومعاينة الاصلاح والاستقطاعات
اللهم بلغت اللهم اشهد

[ahmed el gendy]

الله يخرب بيت النصب وكل النصابين نفسي اعرف امتي البلد دي هتنضف من الشركات دي بقي ربنا يرحمنا منهم

[احمد على 1999]

متابع ....................
اصلى مأمن معاهم
بس اللى فهمته من وصف حضرتك ان فعلا التلفيات ديى كلها مش فى يوم واحد يعنى على مر الزمن
فلو افترضنا ان كان كل حاجة من دول اتعملت فى ساعتها كنت برضه حتدفع مبلغ التحمل عن كل مرة

[الصقر_الجارح]

لا حول ولا قوة إلا بالله..ربنا يعوض عليك يا استاذ elkordy2000,

يعني لو كنت عملتها برا في اي ورشة مكنتش هتدفع المصايف دي كلها.

حسبي الله ونعم الوكيل في الشركات دي,

كل يوم نسمع عن نصب شركات التأمين على ناس كتير,

امتى بقى البلد تنضف من العالم النصابين دول يارب.

[elkordy2000]

المشاركة الأصلية كتبت بواسطة احمد على 1999 متابع .................... اصلى مأمن معاهم بس اللى فهمته من وصف حضرتك ان فعلا التلفيات ديى كلها مش فى يوم واحد يعنى على مر الزمن فلو افترضنا ان كان كل حاجة من دول اتعملت فى ساعتها كنت برضه حتدفع مبلغ التحمل عن كل مرة

يعني بالفرض ان حضرتك وانت بتركن حكيت العربية من الجنبين وكمان اتخبطت من الاكصدام الخلفي فرضا يعني ..., عارف حضرتك هيحسب لك كل حكة بحدثة منفصلة يعني هيدفعك 750 جنية ( بواقع 250 جنية عن كل جنب أو خبطة ) مبدئيا دة اولا ...., ثانيا لما يجي يرش هيرش مكان التصليح فقط مش نصف سفلي أو بمعني اخر بالقطعة ( القطعة اللي اتصلحت فقط هي اللي هتترش ) وانت تكمل الباقي من جيبك وإلا هتمش بالعربية حتة وحتة بالذمة دة منطق
انا بصراحة شركة التامين اللي اتعاملت معها كانت مصر للتأمين وبصراحة ماكانتش كدة خالص أول مرة أشوف شركة تأمين بتعد الخبطات وكل خبطة بحادث