اعمل استيكر لعربيتك بنفسك

[ALNAZER]

تقدر تعمل استيكر لصورة طباعة على فينيل و تلزقه على عربيتك فى المكان اللى تفضله كل ده بنفسك ......... ازاى ؟؟؟؟؟؟؟؟؟؟؟؟؟
1 تختار الصورة اللى تعجبك من النت او من جهازك او صورة شخصية لك لاولادك او صورة انت صممتها ايا ما كان
2 تختار المكان اللى هتلزق فيه الصورة ( الكبود - الشنطة - الاجناب - الزجاج الخلفى ) و تاخد مقاسه طول و عرض
3 تروح لاى مكتب من بتوع الدعاية اللى بيعملوا اليفط الطباعة يكون عنده طابعة كبيرة تطبع مقاسات كبيرة ( على فكرة الطابعات بتاعة الدعاية بتستخدم احبار خاصة لا تتأثر بالماء او الشمس ) و تكون واخد الصورة بتاعتك على فلاشة و تطلب منه طباعة الصورة بتاعتك على فينيل ابيض او على فينيل شفاف لان دول افضل لونين الطباعة و الالوان تكون واضحة عليهم ( بس لاحظ ان الفينيل الشفاف لا يصلح للزق على زجاج السيارة لان الصورة مش هتكون واضحة أوى هتكون عاملة كده زى العلامة المائية ) و طبعا تطلب منه الطباعة بالمقاس اللى انت خدته و على فكرة هتلاقى الموضوع مش غالى سعر المتر المربع من 20 الى 30 جنيه شامل تمن الفينيل و الطباعة عليه
4 تستلم الصورة بعد الطباعة و جرى على عربيتك تنضف المكان اللى هتلزق فيه الصورة كويس جدا
5 تجهز بخاخة فيها مية بصابون و تبدأ تفك الورقة اللى على ضهر الفينيل و ترش بالبخاخة على الفينيل من ورا ( الحتة اللى فيها المادة اللاصقة )
6 رش بالبخاخة على المكان اللى هتلزق فيه الصورة على العربية
7 ضع اللفينيل اللى طبعت عليه الصورة فى المكان اللى اخترته على عربيتك و اظبطه كويس بحيث ما يكونش مايل و المحه من بعيد شوية علشان تعرف تظبط صح
8 من اى حد بتاع كماليات اشترى من عنده استيكة و دى قطعة بلاستيك اللى بيشدوا بيها الفاميه بتبقى شبه سكينة المعجون البلاستيك اللى عند بتاع البوهية او ممكن تشترى رول فاميه هتلاقى فيه استيكة جوا العلبة بتاعته دا سعرة 7 جنيه تقريبا
9 استخدم الاستيكة زى ما بتاع البوهية بيستخدم سكينة المعجون لما يشد المعجون على العربية و ابدأ بتفريغ المية و فقاعات الهوا من الصورة ( الفينيل ) و اتأكد انك فرغت كل المية و فقاعات الهوا كويس و لو عندك سشوار يبقى افضل تشغله على السخن و توجهه على جزء جزء و انت بتفرغ بالاستيكة
10 باستخدام كتر قص الزيادات او لو كنت عامل الصورة على جنب العربية واخدة البابين افتح الكتر مكان الفرق بين البابين
و بكده تكون عملت استيكر طباعة لعربيتك بدماغك و ايدك حاجة كده طحن موت و هاند ميد
و الصور دى كأمثلة و اذا عجبكم الموضوع او حبيتوا صور اكتر انا عندى صور و افكار كتييييييييييييييييييييييي ييييييييييييييييييييييييي يييييييييييييييييييييييير

[ALNAZER]

نسيت اضيف اضافة رفيعة لو الصورة هتلزقها على الزجاج الخلفى او زجاج الابواب فبدل ما تطبعها على فينيل انت ممكن تطبعها على ورق اسمه ( سى ثرو ) و الورق دا يسمح بالرؤية من ناحية واحدة فقط يعنى انت جوا العربية شايف كل حاجة بوضوح اما اللى برا العربية ما يشوفش جوا العربية حاجة ما يشوفش الا الصورة المطبوعة على الورق بس و الورق دا بيكون مخرم خرم صغيرة جنب بعض و هتلاقيه فى مكتب الدعاية و الاعلانات و اليفط بس سعره بيكون اغلى من الفينيل يعنى المتر المربع من 40 الى 60 شامل الورق و الطباعة

[reda310]

فكرة جميلة موضوع حلو تسلم ايدك
او لو مش هتعرف تعمل كل دا كفايه تختار الصورة على الفلاشة ومكتب الدعاية يعملك كل حاجة
مشكور

[محمد اشرف]

فكره جميله تسلم يا غالى

[eng/walaaeldeen]

السلام عليكم
مجهود مشكور
الله ينور عليك
والله المستعان