الفيسبا البستم كام استفسار كدة منتظر اجابتها من اصحاب الخبرة :)

[alaa@virus]

السلام عليكم يا شباب
واحشنى والله من ايام العربية ال 126 الى طلعت ايمانى
المهم يا شباب الواحد اتخنق من التكاتك والمهرجانات والزحمة والعطلة واديك فى الارض مش عارف واية وسقف اية .
المهم انا قررت اجيب فسيبا ومش موتوسيكل لازم فسيبا لانى بكره الموتوسيكلات .
قررت اجيب فيسبا بسم ومش ناوى على صباب لعدة اسباب اعتقد كلنا عارفينها .
المهم كنت عاوز اعرف
هل هى منجزة فى المشاوير ولا لا ؟
موفرة فى البنزين ولا لا ؟! يعنى مثلا التانك اد اية ويعمل كام كيلو فى المتوسط ؟
سعرها مستعمل يبدأ من كام ؟ والموديلات المتاحة اية ؟
الترخيص ازاى وسعر الضريبة كام ؟
وهل لو سجلتها بأسمى لازم ارخص من الاول ومصاريف التسجيل ونقل الملكية كام ؟
ولازم شهادة مخالفات زى العربية ولا لا ؟!
واية موضوع المارش ده وده بيزود من تمن الفسيبا ولا لا وبيزود قد اية واية لازمتة ؟
وهل الفسيبا دى فيها اوتوماتيك واية لازمتة برضة ؟ وهى فيها غيارات اصلا ولا لا ؟
ده لحد دلوقتى

[محمدقابل]

الاخ علاء تحياتى اليك والى كل اعضاء منتدانا الجميل
هنبدأ من البداية اولا انا عندى عربية وفسبا باجاج موديل 2000 فى نفس الوقت
وطبعا فيه مشاوير للسيارة ومشاوير للفسبا يعنى الاسرة يبقى السيارة وسط البلد ( وما ادراك ما وسط البلد) يبقى الفسبا او المشاوير القصيرة وطبعا منادى السيارات بيبقى فى قلبه رحمة عليك واحيانا ما بياخدش فلوس خالص (أى والله ) لانك غلبان زيه مش زى اصحاب العربيات ولاد التيت الاغنياء دول

طبعا مش هاقولك ان الفسبا فى مصر برغم انجازها للمشاوير بس عيوبها لو لابس خوزة بيبقى شعرك منكوش كدة ولو مش لابس خوذة بيبقى وجهك مكفهر ومغبر ولو مسحت وشك بمنديل بتلاقى المنديا لونه بنى
نيجى بقى للمهم
بالنسبة للتوفير فى البنزين فهى كانت بتمشى حوالى 30كم للتر الواحد
والتانك بتاع الفسبا بتاعتى 5.5 لتر تقريبا وطبعا بنزين 80 رسمى ياباشا
بالنسبة للسعر فانا مش متابع حاليا تساوى كام
وان كانت الفسبا الصباب فى وجهة نظرى اكثر توفيرا للوقود واقل سعر فى المستعمل
بالنسبة للترخيص والضريبة فكل ده بشوية قروش بسيطة ما تقلقش بعدين الفسبا معظمها 150 CC قطيعة هو واسمه
بالنسبة لموضوع التسجيل باسمك فهى تعامل معاملة السيارة قانونيا
بالنسبة للمارش طبعا المارش بيزود السعر يعنى انا كنت جايب الفسبا جديدة سنة 2000 من غبور ب5400 جنيه المارش والعادة كانت ب 5000 ولكن بعض الميكانيكية بيقولك المارش بيبوظ الموتور ازاى مش عارف ولذلك ممكن ناس تخاف من المارش وسعرها يبقى قليل
بالنسبة لموضوع الفتيس ف الفسبا كل موديلاتها نقل يدوى مش نقل اسيوط ههههههه الاوتوماتيك منها بيبقى صينى فر منه فرارك من الاسد حيث لاقطع غيار ولا ميكانيكى يعرف يصلحه

[alaa@virus]

تسلم لى يا باشا الل يبارك لك ..
دنا طلعان عينى من المواصلات جداااااا
بدفع فلوس وبتاخر وبتعب
للمتابعة
بس انت كنت جايبها جديدة ب 5000 جنية ؟؟ ازاى دى دلوقتى تقريبا اضعاف الرقم ده !؟

[محمدقابل]

انا جبتها سنة 2001 ب 5400 باجاج مارش وهى بالنسبة لسعرها دلوقتى فسعرها ما زادش كتير بسبب الصينى ومنافسته الشديدة ورخص سعره

[alaa@virus]

والبجاج دى الى هى الهندى مش الهندى الايطالى LM البستم صح ؟