تجربتي مع السي فور

[ashraflotfy1]

الأخوة الأفاضل أعضاء الجروب المحترم و خاصة منتدي السيتروين، أحب ان اشارككم تجربتي مع السي فور
سيارتي التي كانت سيارتي و بعتها الحمد لله كانت سي فور مو 2006 اوتو بدون بانوراما و كانت عاملة 75000 كيلومتر فبريكة عدا بعض اجزاء من الخارج و اول يد بتاعة واحدة ست. انا اشتريتها عن طريق كونتاكت كارز و كانت عند ڤيلا في التجمع الخامس و كانت بحالة ممتازة و كشفت عليها و كانت تمام عند أمير و چوزيف و اتكلت علي الله و اشتريتها ب 75000 جنيه و صاحبها ماسك في السعر و كانت العربية عاجباني آوي ولم استطع مقاومتها خاصة بعد القراءة عنها علي المنتديات المختلفة و شكلها الحداثي المميز و الشياكة الفرنسية.
المهم روحت لميكانيكي بتاع سيتروين في عين شمس خلف حديقة العرب حيث يوجد الكثير من ميكانيكية و ورش و محلات بيع قطع الغيار الجديد و المستعمل للسيتروين.
ماطولش عليكم عملت صيانة و غيرت فلاتر و زيوت و تربيط عفشة و غيرت حساس تحت دواسة الفرامل لان الكروز كونترول كان فاصل و مدي Error و دفعت مبلغ معقول و فعلا أسعار قطع الغيار كانت معقولة جدا و كله كان أصلي و مشيت الأمور تمام.
لكن شوية كدة و المية بتنقص روحت للميكانيكي قاللي الرادياتير وحش و عاوز يتغير طيب غير بكام يا عم الڤاليو الأصلي 750 و غيرت تيل خلفي و كمان مساعدين خلفي و تمام التمام و ادفع يا حبيبي و انبسط ماشي لأجل العيون الفرنساوية و الطعامة الفرنسية كله يهون خاصة انا روحت فرنسا و درست شوية هنال بتاع سنة في مرسيليا و بتكلم فرنساوي كويس يعني مفيش بعد كدة.
شوية و وانا ماشي في صلاح سالم و الأمور حلوة لقيت دبة و خبطة قوية في العربية و لقيت رسالة خطأ بتقول Gear Box Faulty و الفتيس مش عاوز ينقل و الموتور داير المهم كلمت الميكانيكي قاللي ونش و حمل الأمورة الفرنسية و شرفني روحت و أخدت الأمورة و روحت ايه قاللي التورك كونڤيرتور بتاع الفتيس اتكسر طيب ليه قاللي نصيب طيب ايه الحل عمرة فتيس طيب اشتغل يا أسطي جميل و صلح.
تاني يوم كلمني تعال العربية خلصت و دفعت 3700 بالزيت اللي لوحده تمنه 750 جنيه و مشيت تمام. طبعا نسيت أقول ان كان فيه دبة في الفتيس في النقل من الاول للتاني و عرفت ان ده عيب شائع في السي فور 2006 و البيجو 307.
أطول عليكوا بعد شهر نفس الموضوع حصل بالمللي لكن الفتيس يروح عامل دبة و ينقل علي التالت يعني تعشق من N الي D ينقل علي التالت مباشرة روحت للباشا الميكانيكي ايه ده يا چيمي قاللي لازم نفك و نشوف المهم طلع نفس العيب و صلحه ببلاش و دفعت تمن الزيت بتاع الفتيس الكيلو بتاعه 125 جنيه. تمام السيارة تمام و مشيت و شوية بعد فترة المية بتنقص ليه ماحنا غيرنا الرادياتير طلع ان العيب من التكييف السخن بيسرب ميه داخل الصالون و العربية تنقص ميتها و تسخن طيب ايه الحل قاللي بتاع التكيفات نلغي السخن بتاع التكييف او نجيب اللوحة اللي موجودة عند الكونسول ناحية رجل السواق. بيني و بينكم انا قرفت من العربية دي و زهقت و زاد الطين بلة و انا ماشي في شارع الهرم و عند النفق و فجأة سواق تاكسي فيرنا أمامي فرمل فجأة فلبست فيه في الأكصدام بتاعه نزلت أشوف فيه إيه لاقيت الفاجعة ......................... .........
الكبوت بتاع السيتروين الفرنسية الأمورة في خبر كان و الفانوس الشمال انتهي و الشبكة في البايباي. قولت أشوف الفيرنا و لاقيت كارثة ......................... .. و لا كأن فيه حد لمسه أصلا كأن أنا هوا و نسمة عليلة عدت علي إكصدام سيادته. قولت الحمد لله و كانت العربية دائرة تمام و مشيت بيها لحد ورشة في الحرفيين محترمين جداً جداً و اشتريت كبوت تايواني جديد لان الأصلي ألومنيوم لا يصلح و كمان فانوس ديبو تايواني ابو موتور و شبكة جديدة و ركبت و دهنت الكبوت بالاكصدام بالرفارف الأمامية و دفعت 4000 جنيه كله تمن المشتريات و الدهان و رجعت زي ما كانت بالمللي و بعدين بعتها و خلصت منها الي البد.
الدرس المستفاد من القصة المأساوية:
1- الفرنساوي ضعيف جدا كصاج و بودي
2- المواتير و العفشة و الصالون و الخامات الفرنساوي تمام اوي
3- الفيس الفرنساوي زبالة و اي كلام و مالوش لازمة أصلا
4- قطع غيار السيتروين موجودة و سعرها كويس و أفضل من الكوري و الياباني
5- سعر البيع زفت زفت زفت انا بعتها ب 63 الف بالعافية
6- السيتروين غير إعتمادية في مصر و العفشة ناشفة شوية و بالمقارنة مع الاسكودا فانتازيا معايا حاليا طبعا عفشة الاسكودا برقبتها لكن سحب السيتروين احلي و أقوي. صالون السيتروين أشيك و أريح في القعدة من الفانتازيا. استهلاك البنزين في السيتروين عالي عالي و الفانتازيا برقبتها. النظام الصوتي في السيتروين احلي تم الفانتازيا لكن ميزة الفانتازيا انه MP3. صاج و بودي الفانتازيا أفضل ميت مرة. قطع غيار الفانتازيا أرخص و اكثر انتشارا.
الخلاصة السيتروين اشتريها زيرو و لما يخلص ضمانها بيعها و حتخسر نص تمنها ده لو عرفت تبيعها أصلا لكن الفانتازيا قصة أخري لينا عليها كلام كتير
أرجو أنكم تكونوا استفدتم من التجربة بتاعتي و الوداع يا سيتروين او اي فرنساوي و مرحباً بالألماني و الايطالي لأنهم أفضل بمراحل لأني معايا جراند بونتو 2010 عظمة علي عظمة الي جانب الفانتازيا الرائعة شكلا و مضمونا: