فوبيا شراء السيارات المستعملة

[امير المدينة]

انا حاليا عندي مرسيدس 78 تمساحة كل ما ادفع عربون لشراء سيارة اخرى يروح عليا لاني باختصار بارجع في البيعة وبيحصلي حالة من الحنين غريبة تجاة المرسيدس ومش عارف اعمل ايه انا خسران 500 ج وزيهم لسة من كام يوم وربنا يعوض عليا

[svneleven]

فيه حل جميل. انت تشتري عربية من غير ما تبيع المرسيدس و تجربها و تستعملها كام شهر. عجبتك بيع المرسيدس. ما كانش بيعها و المرسيدس موجودة.

[ياسر يوسف]

مش حتعرف تركب غير المرسيدس فاما تتمسك بها او تحدثها بمرسيدس اخري

[ahmed_eng2001]

المشاركة الأصلية كتبت بواسطة ياسر يوسف مش حتعرف تركب غير المرسيدس فاما تتمسك بها او تحدثها بمرسيدس اخري

بالرغم من انى مش من ملاك المرسيدس .... الا ان كل الى اعرفهم من مالكى المرسيدس .. يأكدوا على المعلومة الى حضرتك ذكرتها

و بعدين بيكون فيه علاقة تعود بينك و بين عربيتك الى بينك و بينها عشرة ... و طالما مش مطلعة عينك و مغلباك ... بتحلى فى عينك لما تيجى تبيعها ده امر طبيعى جدا

ربنا يوفقك للى فيه الخير

[zing0]

نسيبى ركب 128 و مازدا و بيجو 504 و بيتلز و مرسيدس
من كل دول مفيش حاجه عجباه غير المرسيدس و الفولكس - الألمانى يعنى
و فعلاً بقاله فوق الـ20 سنه يغير موديلات مرسيدس بس قديم و يحاول يعلى الموديل فقط, انما تقولى سيراتو و لا النترا و لا غيرة, سيبك الألمانى لو حالته حلوه يبقى تنسى.
و هأقولك على حاجه مش موجوده فى أى عربية تانيه
الألمانى عموماً و المرسيدس بالأخص متروحش بيها للصنايعى غير بمزاجك
الكربراتير مش مضبوط و البوجيهات مهببة و المكنه بيتغيرلها زيت مرة كل 20/25 ألف كيلو و مرة أكتشف انها بتسخن طلع مفيهاش مياه خالص (الخراطيم كلها فاضية), و ماشى بيها و العفشة مخلعة , فى الآخر طلع فيه جزء مكسور و عادى.
صحيح أسعار قطع الغيار نار يا حبيبى نار و إلى حد ما نادرة (ناس متخصصه فيها مش أى محل قطع غيار) بس فعلاً الغالى ثمنه فيه
ربنا يباركله و يباركلك و يباركلنا كلنا
قصدى أقول: لا مقارنه بين المرسيدس و أى عربية تانية بشرط الحاله