الصيانة الدورية العربية الانوس الخليجي موتور 1600 بالاسعار

[Cat Lover]

السلام عليكم ورحمة الله وبركاته

انا حبيت اشارك معاكو تجربتي مع العربية الانوس الخليجي
انا اشتريت العربية دي من سنتين والحمد لله ماشية معايا زي الفل وبسافر بيها الواحات كتير والحمد لله مش مقصرة معايا خالص ... انا حبيت اشارك بكيفية الصيانة الدورية للعربية ولو نسيت حاجه ممكن حد يكمل معايا :
في نوعين من الصيانة (صيانة قصيرة و صيانة طويلة )
ناخد الاول الصيانة القصيرة وهي كالتالي:

1. تنضيف دورة المياة كل 3 شهور في اي بنزينة وتكلفتها بتكون تقريبا 25 جنيه.
2. تنضيف البوابة وحساس التسخين بالاسبراي المنظف كل 3 شهوروتكلفته تقريبا من 25 الى 35 جنيه. ( العلبة بتستخدم اكتر من 5 مرات)
3. تنضيف فلتر الهواء كل شهر تقريبا نظرا لظروف الاتربه في البلد . وده بيتعمل عند اي حد بتاع كاوتش او في اي بنزينة وما بيتكلفش حاجه خالص.
4. التأكد من مقياس الزيت و منسوب المياة و زيت الفرامل مرة كل اسبوع للتأكيد .
5. تغير فلتر الزيت مرة ومره ( تغير الزيت مرة بالفلتر و مرة من غير الفلتر). الفلتر تكلفته من 25 الى 40 جنيه.
6. الكشف على زيت الفتيس في نفس وقت تغير الزيت . للتأكيد.
7. تربيط عفشة كل 3 شهور وتكلفتها تقريبا 25 في موبيل.

تاني حاجه بقى الصيانة الطويلة :


دي بقى بتكون بالكيلومتر ( انا بعملها كل تقريبا من 25000 الى 30000 كيلومتر) وهي بتكون كالتالي:
- تغير طقم سيور ويتكون من :

• سير الكاتينة بتكلفته الاصلي GM ب 240 جنيه والكوري بيعمل من 60 الى 75 جنيه.
• سير دينامو وتكلفته حوالي 25 جنيه.

• سير تكييف وتكلفته حوالي 25 جنيه.

- تغير فلتر البنزين ( حوالي 40 جنيه).
- تغير فلتر الهواء ( حوالي 25 جنيه).
- تغيير طقم البوجيهات ( تكلفته حوالي 55 جنيه).
و المصنعيه بالنسبه للصيانة الطويله عند ميكانيكي نضيف بتكون تقريبا من 100 الى 150 جنيه .


و إ ن شاء الله العربية تفضل معاكو نضيفه و ماتقصرش معاكوا .. ولو حد عنده اي افكار تانيه يا ريت يكتبها عشان الكل يستفيد .

[hyundai 2005]

تسلم الايادي يا كبير وعلي فكره العربيه اللي معاك اوروبي وليست خليجي ما فيش دايو اسمها خليجي اللي معاك اوروبي فيها 2 ايرباج و ebs وجنوط مروحه اسبور وعداد rbm والكاسيت الكبير وغالبا لونها ابيض او فضي او زيتي صح ؟

[Cat Lover]

تسلم يا باشا على المشاركة ... انت اصلي على فكرة بس هي مش فيها ايرباج ولا EPS ولونها ابيض :fun_ 36_3_11[1]:

[sherifabden]

الف مبروك ياباشا
وعلى فكرة اللانوس عامة عربية ممتازة ومحترمة جدا واصيلة بس حافظ عليها وهتعمر معاك

[YahiaAshraf]

موضوع متميز
تسلم ايدك