عام الحزن(الثنائى اللى جاب اجلى الوطنى للتنميه - قناة السويس للتامين )

[MIDO-SPICY]

الى جميع اعضاء مصر موتورز المحترمين
محتاج رايكم فى مشكلة وقعت فيها من حلقات مسلسل شركة التامين الخاصه بى ( واللى هقولهالكم بعد كده تفصيليا )
انا كنت مامن عندهم على لانسر 1600 فاضيه مواصفات مصرى
والمواصفات المصرى بتنزل من غير كاسيت
العربية دى عملت حادثه بعد ما جبتها ب 6 شهور وبعد مفاوضات وحوارات شركة التامين تفضلت وهتطلع شيك تعويض بمبلغ 68000 ج
لما رحت اسلم العربية الاسبوع اللى فات سلمتها بدون كاسيت زى ما استلمتها
بس وانا بقلب فى الورق بالصدفه لقيت ان وثيقة التامين طالعة بكاسيت
ولما سالتهم قالولى انهم هيخصموا 2000 ج ثمن الكاسيت
يعنى هيتخصم من ثمن العربية 38 الف فى 6 شهور استعمال وكمان 2000 ج ثمن الكاسيت اللى هو اصلا ماكنش جاى فيها
ياريت يا جماعه لو حد عنده حل يقولى عليه بسرعه علشان الحق اتصرف المفروض ان الشيك طالع كمان 3 ايام

[MIDO-SPICY]

يعنى يا شباب 18 واحد شافوا الموضوع لغايه دلوقتى ومافيش واحد عنده حل لمشكلتى ؟؟؟

[تامين سيارات]

السلام عليكم يا ريت توضح اكتر هل يوجد تحمل اجبارى مثلا 10% فى الوثيقة و لماذا تم خصم 38000 جنية

[MIDO-SPICY]

استاذ عمرو الموضوع مالوش دعوة بالتحمل الاجبارى
دلوقتى العربية بتنزل من غير كاسيت
والوثيقه اصدرت وفيها كاسيت
انا لما سلمت العربيه طبعا سلمتها من غير كاسيت زى ما انا استلمتها من المعرض
عرفت بعد كده من شركة التامين ان مادام الوثيقه فيها الكاسيت فى حالة عدم تسليمى له هتحمل 2 % من ثمن العربيه
يعنى حوالى 2100 ج
ياريت لو عدنك حل تفيدنى

[MIDO-SPICY]

اصدقائى اصدقاء مصر موتورز
فى البداية عايز اقولكم انكم وحشتونى جدا وانا عارف انى مقصر معاكم جدا جدا وبقالى كتير مدخلتش بس بجد الشغل مبيرحمش
كنت نوهت من حوالى شهرين انى هقولكم على المئاسى اللى شفتها لمجرد انى حلمت يكون عندى عربية بالتقسيط تبع بنك زى ناس كتير قوى فى الدنيا .. عادى يعنى
مش هطول عليكم علشان انا حابب انكم تعرفوا القصه كامله وبجد ماتزهقوش منها لانها هتفيدهم انا شخصيا استفدت بكتييير قوى
لما قررت انى اشترى عربية ابن عمى رشحلى معرض اسمه تايجر موتورز ادام نادى الغابه اللى جمب مستشفى هيليوبلس فى مصر الجديده
الحقيقة هما ناس محترمه جدا وساعدونى كتير فى الاول وملينا ابلكيشن لثلاث بنوك المشرق - الوطنى للتنميه - سيتى بنك .
والحقيقه وافق على طلب القرض الوطنى للتنميه وسيتى بنك وبما انى مش ميال ليهم وقالولى ان الوطنى للتنميه فيه نظام اسلامى قلت اتوكل على الله وفعلا بدانا ننفذ
ولما صاحب المعرض قاللى هتامن فين قلتله ايه احسن حاجه ممكن نامن فيها قاللى ادامك حل من اتنين اما الجمعيه ودى ب 2000 ج فى السنه وقناة السويس 3500 ج فى السنه والصراحه قعد يشكرلى فى الناس من هنا للسنه اللى جايه وبالرغم من ان الفرق بين الجمعيه وقناة السويس تقريبا الضعف انا وافقت على قناة السويس
وبالفعل نفذنا واستلمت العربية ووثيقة التامين فى 22/02/2009
والدنيا طبعا كانت زى الفل . عربية لانسر 2009 - 1600 cc والحياه بييييس
لحد ما حصلت الكارثه .. العربية عملت حادثه
المهم فى يومها بلغت معرض العربية اللى بدوره بلغ شركه التامين ومن هنا بدات رحلة العذاب والضنا
طبعا اخدت العربية على التوكيل علشان مهندس شركة التامين يعاينها هناك ( دا طبعا بناء على توجيهات معرض السيارات اللى انا اخدته بمثابة الاب الروحى فى الموضوع دا نظرا لقلة خبرتى بالمواقف دى ) وبالفعل راح المهندس وعاين هو والتوكيل وطلعولى مقايسة ب 72000 ج .. على فكرة نسيت اقولكم ان اصلا التوكيل علشان يرضى يدخل العربية ويعملها مقايسه مضانى على ورقه بتقول لو هتصلح عندنا مش هتدفع رسوم المقايسه ولو مش هتصلح عندنا هتدفع 1400 ج رسوم المقايسه ..وكل يوم بعد صدور المقايسه العربيه هتفضل فى التوكيل هتدفع 300 ج .. سرقه عينى عينك
طبعا كان رد شركة التامين ان انا ادامى حل من 3
اولا : لاما العربية توتال لوست ويطلعلك شيك بمبلغ التامين
ثانيا : انك تصلح فى التوكيل بس التامين مش هيغطى غير 50 الف بس وانت هتتحمل الباقى وطبعا فى الاول انت اللى هتدفع المبلغ كله وبعد 21 يوم هتاخد شيك ب 50 الف جنيه
ثالثا : نصلحهالك فى ورشه خارجيه ونتحمل احنا قيمة التصليح فيما لا يتعدى برضه 50 الف جنيه ( على فكرة صاحب المعرض واحنا بنختار شركة التامين قاللى انهم عندهم ورشهم الخاصه فى ابو رواش )

ونظرا لانى ماكنتش متوقع الخيه اللى كانوا ناصبينهالى قلت نخليها توتال لوست واخد التعويض ادفع بيه الاقساط اللى عليه والباقى اعتبره مقدمه عربية جديده او هزود على الباقى كلام هايف ودا طبعا لانى كنت دفعت من الاقساط حوالى 7 اقساط

طبعا من الناحيه التانيه البنك مش سايبنى فى حالى عايز الاقساط بتاعته كل اول شهر طيب ياخوانا العربية عملت حادثه وانا متبهدل يقولك مالناش دعوه هى تاكسى علشان تكون هى اللى بتجيب قسطها

المهم نرجع لموضوع التامين .. بعد ما بلغتهم قرارى بالتكهين قالولى هات الورق اللى هتسلمنا بيه العربية ( عقد بيع - وثيقه مخالفات - وثيقة بيانات - جواب مسجل من الشهر العقارى ببيع العربية للشركه وبالمناسبة عقد التسجيل كلف 1800 ج ) وطبعا دا كله علشان يطلع لازم جواب من البنك بفك الحظر واللى اخد لواحده شهر علشان يطلع ..وبعد ما طلع الجواب وطلعت روحى معاه لغايه ما سجلت العربية وبعتهالهم قالولى روح وديها المريوطيه بس بعد ما المكان اللى هناك يفضى واياك العربية ينقص منها حاجه عن اللى كانت فى المعاينه لاما تتخصم من الشيك
واستنيت وعداد الجراج اللى رامى فيه العربية عمال يعد وكمان عداد اقساط البنك عمال يعد
لغايه ما جم فى نص شهر 1 - 2010 قالولى هنوقفلك صرف الشيك .. طيب ليه يا خواننا .. قالولى ان المحضر مشككوك فيه وبعد مشاكل وخناقات مع الاستاذ ممدوح المحترم الموظف بقسم التعويضات بشركه التامين واللى عمره ما رد على موبايله لانه معاه عدتين واحده شخصيه والتانيه بيسكت بيه العملاء . اى حد عايز نمرته علشان يترحم من مشوار المهندسين لمجرد سؤال مش هياخد اكتر من 5 د بيديله الرقم اللى عمرة ما بيرد ولو حد من العملاء رخم وفضل يزن يرد بكل قرف واسلوب سىء جدا

المهم بعد محاولات ومناهدات قالولى بص.. انا هنصرفلك التعويض بس كالاتى ..
انت مامن عندنا ب 103 الف جنيه
انا هنصرفلك 80 الف بس
وهنرجع نخصم منهم 10 % التحمل الاجبارى + 25 % من قيمة الاير باج
تبقى الحسبة كلها بعد الخصومات 68 الف جنيه
فقلتلهم تحمل ايه انا الوثيقة اللى معايا مافيهاش تحمل قالولى ما الوثيقه اللى معاك دى طلعت غلط بدون تحمل واحنا بعد كده صلحناها وودناها للبنك بتحمل 10 %
قلتلهم من غير ما تخطرونى قالولى مش مهم

وطبعا ماكنش ادامى غير انى اقبل بالتعويض دا
هتقولولى ليه مشتكتش وليه مخربتلهمش الدنيا .. مش عارف بس ممكن تقولوا عايز اخلص او اتخنقت او خايف ان صرف الشيك كله يقف . مش عارف بس دا اللى حصل

المهم قالولى استنى 21 يوم واحنا هنطلعلك الشيك وطبعا 21 يوم بقوا 31 يوم
ولما ربنا هداهم والشيك طلع لاقيته طالع ب 66 الف بس قلتلهم يا جماعه ناقص 2000 ج قالولى دول بتاع الكاسيت ودا كان فى 28/02/2010 يعنى بعد الحادثه ب 5 شهور
لما انت سلمت العربية سلمتها بدون كاسيت.. فرديت وقلت ان اللانسر المواصفات المصرى بتنزل بدون كاسيت وانا شاريلها الكاسيت ..
فقالولى ان الوثيقه طالعه بكاسيت
وبدات فى دوامه اخرى فى البحث عن ال 2000 ج وخطا الوثيقه للمره التانيه

طبعا من الناحيه التانيه فى البنك انا كنت وديتلهم الشيك اللى طلع وفوق منهم 2000 ج من جيبى اللى ناقصين عشان اخلص بالبنك واتعامل انا مع التامين
لاقيت البنك بعديها ب 5 ايام اتصل بيه واحد اسمه احمد حسن وقاللى انا المسئول عن موافقه فك الحظر وكان المفروض ان الشيك يجيلنا ب 74 الف جنيه ولو انت مدفعتش الفرق انا اللى هتحمله فقلتله مش غلطة هى اللى هتدفعك 6 الاف جنيه بس انا كده مديكم حوالى 18000 اقساط + شيك ب 68 الف ومن حقى قبل ما ادفع اى مليم تانى انى اعرف حاسبينها ازاى .. وحددت معاه ميعاد بعدها بيومين
ونظرا لان ربنا رقنى ببنت يومها فمرحتش فى الميعاد لاقيت بعديها بيومين مدير احمد حسن فى البنك واسمه محمد منير بيتصل بيه بكل عجرفة وبيقولى احنا ماعندناش غلط وعايز تدفع تعالى ادفع مش عايز هفضل اخصم من الشيك الاقساط لغايه ما يبقى عليك 20 الف جنيه.. فطبعا كان ردى عليه بالمثل وحلفت انى مش هعبرهم غير لما اخد بقيت شيك التامين

نرجع بقى لشيك التامين اللى بعد معاناه تفهم قسم التعويضات موقف الكاسيت ولكن لم يتفهمه قسم التقدير الفنى او الدعم الفنى حاجه كده .. طيب دول طريقهم منين وانا اروحلهم .. اسفين ماينفعش عملا تتعامل معاهم احنا هنبعتلهم اخطار وتعالى بعد 21 يوم هتلاقى الشيك
وفضلت كل 21 يوم اروحلهم لغايه يوم 03/08/2010
طبعا ماصدقتش نفسى لما لاقيته طالع ( على فكرة طالع 1800 ج بس لانهم برضه خاصمين منه 10 % تحمل اجبارى )

المهم جريت بيه على البنك علشان اعرف فاضل عليه كام واخلص واذا بهم الاقيهم نفذا تهديدهم وبياخدوا من الشيك كل شهر القسط وبدل ما كانوا 6 اللاف بقوا 14 الف

طيب ازاى تاخدوا اقساط وانا واقف القرض بجواب فك الحظر ... هو كده نظام البنك
طيب ازاى ماعملتوش سداد جزئى ونزلتوا الفوايد على الباقى بعد الشيك .. هو كده نظام البنك
طيب لو مادفعتش هتفضلوا برضه تاخدوا من الشيك ؟؟ ... اه هو كده نظام البنك

وانا اللى الان فى معاناتى مع البنك بعد ان ما نهيت قصة التامين

عام من الحزن .. على فراقى لعربيتى اللى مالحقتش اركبها واستمتع بيها والله وحده اعلم انا جبتها ازاى
عام من الحزن ... على البهدله بين التاكسيات واسلوبهم وبنديراتهم اللى بقت بتكلفنى نص مرتبى شهريا بدون مبالغه رغم انى بقبض كويس والحمد لله
عام من الحزن ... على البهدله بين شركة التامين اللى فى المهندسين وانا ساكن جمب المطار وبين المحكمه لاخذ صوره رسميه من محضر الشرطه بالواقه وبين المرور التابع للعربية والشهر العقارى وبين البنك اللى فى جاردن سيتى
عام من الحزن .. على الفلوس اللى اتصرفت على الموضوع دا بين مواصلات ورشاوى واكراميات علشان اخلص الموضوع واللى بيهم كنت خلصت اقساط سنتين ادام
عام من الحزن.. وانا بين عجرفه أ/ ممدوح المحترم ممثل ادارة التعويضات ووعود الحاج صبحى رئيس قسم التعويضات ومدام مها ممثل الشركه اللى طلعتلى الوثيقه واللى بتقولى كلام عمرها مانفذته واللى كانت اول اللى سوحونى قبل ما تسلمنى لممدوح

ولغايه دلوقتى عام الحزن لسه منتهاش لانى اخيرا توصلت مع البنك انهم هيعملولى تخفيض وهينزلوا المبلغ ل 9 الاف جنيه بس بشرط اسدهم كلهم قبل 2/09/2010 يعنى فى نفس اليوم اللى حصلت فيه الحادثه السنه اللى فاتت

بجد انا اعتلمت حاجات كتييييييييييير قوى من اللى حصل دا ..
1 - اتعلمت انى لازم ادقق قوى فى اختيار شركة التامين ومن قبلها المعرض وامانته
2- اتعلمت انى قبل ما اوافق على شركة التامين لازم اقرا كل بنود العقد وشكل الوثيقه قبل وبعد صدورها بملحقاتها اللى معظم العملاء مابتاخدهاش الا لما يحصل حاجه لا قدر الله وبيكون فيها البهاريز كلها
3- اتعلمت ان لو حاصل حاجه تانى اجرى على الموضوع واخلصه باقصى سرعه علشان موضوع البنك دا
4- اتعلمت انى اختار البنك اللى هتعامل معاه حتى لو مش هركب خالص بدل البهدله اللى انا فيها

واخيرا الحمد لله على كل شىء

انا اسف انى طولت عليهم بس الموضوع دا كان خانقنى قوى وحبيت افضفض معاكم

انا عارف ان كل ممثلى شركة قناة السويس للتامين هيقولوا طيب هاتلنا رقم الوثيقه واحنا هنساعدك.. ادى كل بيانات الوثيقه
اسم المؤمن له : احمد محمد عماد الدين
لصالح : البنك الوطنى للتنميه
بداية التامين من ظهر يوم : 18/02/2009
تاريخ الاصدار : 19/02/2010
معرض : تايجر موتورز لتجارة السيارات
رقم الوثيقه : 311284281
تليفون المؤمن له : 0165534716 - 0103007009

بالمناسبة يا جماعه انا بجد عايز اشكر ا/ سيف لانه بجد اهتم بموضوعى وكان متابعنى فيه باستمرار
وياريت يا جماعه لو حد يقدر يفيدنى فى موضوعى دا بالنسبه للبنك او عنده اى تعليق ياريت يفيدنى