[تامين سيارات]

المشاركة الأصلية كتبت بواسطة CARDIO السلام عليكم . انا لسه جديده فى موضوع التامينات . و عوزه احكى عن تجربتى و ياريت حد يفيدنى . لما دخلت شركه التامين بعد ما قلت السلام عليكم لقيت اللى بيرحب بيه و بيقوللى تحت امرك يا فندم قلت له انا عوزه اعمل كذا و كذا و كذا عادى ما هو واحد شكله شغال فى المكان المهم بعد ما جاوب على اسالتى . قلت له طيب ممكن لو اى مطبوعه بالكلام و البنود اللى حضرتك قلتهالى علشان الى فى البيت يشاركونى الاختيار . و ذهلت من الاجابه . مفيش يا فندم . قلت له طب اى عقد مش ممضى ابص فيه كده عشر دقائق مع نفسى و ارجعهولك يا عمو . طبعا عمو اثرت فيه و قاللى و الله زى مانا شرحت لك كده هو انا حضحك عليكى ! الحقيقه معرفتش ارد على عمو كان نفسي اقولله على اساس ان احنا كنا فى الحضانه مع بعض ده انا حتى نسيت اسمك و ممكن لو شوفتك تانى فى الشارع معرفكش !!! المهم حاولت افهمه ان المنطق بيقول ابص قبل ما ابصم قصدى امضى فرد رد هاااااايل و قاللى انك اول متقدمى الطلب و تدفعى القسط ( واخديتللى بالكوا انتوا ) تبقى تاخدى العقد و تقرايه براحتك !!!!! و طبعا لانى مخلصه الابتدائيه من زمان ابنعم كانت من ام 5 سنين بس مقتنعتش ! حتى طريقه حسابه للقسط بيقعد يضرب على الاله الحاسبه و بعدين يرد عليه . طيب ممكن تبصصنى معاك يا عمو اعرف الحسبه ازاى ؟ يقوللى تقريبا كذا فى الميه . تقرييييييييييييييبا يا خراااااااابى و هو انا لما حاجى ادفع القسط حدفعه برضه تقريبا ))))))))) المهم بعد التجربه العجيبه دى و اللى حسستنى انى فى بلاد الواك الواك كان لازم اسال . حد عنده اى تفسير لاى حاجه انا كتباها ؟ الاهم من كده ان الشخص ده طلع اسمه وسيط تامينى او منتج . لكن احساسي الاكيد ان مكنش فى الى شفافيه خاااااااااالص . حد يقوللى ده توصيفه الوظيفى ايه ؟ و كمان سؤال . هو انا مينفعش اتعامل منى للشركه على طول ؟ من غير ماحد يعمل نفسه ولى امرى . انا معنديش مشكله خالص انه ياخد عموله اذا كان حيقدم لى خدمه . لكن حد يسمسر عليه و مالهوش لازمه لا . شكرا . و فى انتظار اى مساعده لافهامى الموضوع ده .

السلام عليكم
شوفى يا استاذة المسمى الوظيفى مستشار تامين
و فى ناس بتبقى لسة فى بداية الطريق محتاجين تدريب و يفترض ان يكون فى مدير يوجة الاستاذ الى انتى اتكلمتى معاة بيشرف علية من ناحية المعلومات الفنية لوثيقة السياره او اى نوع تامين

موضوع السعر محتاج شوية توضيح يوجد مسمى السعر الصافى او نسبة التامين و هذة النسبة سهله اى حد يحسبها لانها ثابته لا تتغير
و يضاف الى هذة النسبة التامينية مصاريف الاصدار و دى عدة بنود
1- دمغه نسبية
2- رسم اشراف
3- ضريبة
4- مصاريف اصدار متنوعه
و هذة النسب متغيرة و لكن بنسبة بسيطة جداا حسب نوع السياره و الدمغة و التعريفة الضريبية التى تفرض على السياره
و لكن المستشار الخبرة عارف او حافظ النسبة المقررة على نوع السياره لتعدد التجربة فى الاصدار
بمعنى اخر ممكن كان يحسب يقولك مثلا 3560 و الوثيقة تطلع ب 3550 او اعلى 3580 هذا مثال يوضح معنى كلمة تقريبا الى قالها

اما موضوع كذا فى المئة دة راجل بيهزر اكيد يا هوة مايعرفش لان ال1% يفرق كتير او حتى ال 2 فى الالف

نيجى بقى لموضوع انك عاوزة تتعاملى من نفسك للشركة منتهى الغلط ليييية ؟

لان مستشار التامين هايفيدك كتير اوووى لو لا قدر الله حصل حادث و هايوفر عليكى اخطاء ممكن تدخل فى ضياع تعويض ليكى بعدم معرفة فى كتابة محضر او امور فنية تخص تعويضات السيارات فاالمفروض يكون ليكى مستشار تامين بس طبعا يكون جيد فى المعلومه و مدرب جيدا

موضوع الامانه :::::::: لو حضرتك حسيتى دة لابد انك تنهى المقابلة فورا بس ممكن فى حاله التسرع انك تظلمى حد و اخيرا فى عقد لابد حضرتك يكون فى قراءة جيدة للشروط و الاستفسار عنها

موضوع العموله :::: حق مكتسب للمدرب لان حضرتك هاتاخدى خدمة غير ان السعر مش هايفرق خالص فى اذا كان فى مستشار تامين ام لا

المطبوعات :::: موجودة فى اى شركة و متوفرة و من حقك الاطلاع عليها حتى لو صورة من الوثيقة يكون افضل لبيان جميع الشروط

اخيرا اتمنى ان اكون وضحت لحضرتك الامر و اعتذر عن تصرف زميل لى فى مجال التامين