فضيحة توكيل رينو !!!
صباح الجمال علي الاعضاء الكرام
انا هاحكي قصة كده حصلت معايا اليومين دول
عندي ميجان موديل 2006 اشريتها من 8 شهور تقريبا العربية ما شاء الله كل حاجة فيها شغالة بكفاءة ماعدا حساس المطر والاضاءة
المهم من كام يوم كمبيوتر الاعطال كتبلي عن الاستيرنج او العفشة ونورت لمبة السيرفس وتاني يوم سمعت صوت المساعد اليمين ضارب وانا من سكان اكتوبر والناس نصحتني بصقر قريش بس انا استبعدت المكان وقولت اوديها التوكيل بتاع ابورواش وايه المشكلة 400 و لا 500 جنيه زيادة في تمن المساعد عن بره بس اهو توكيل وحاجة اصلي
وحجزت بالتليفون وروحت الخميس 1-10 استلمها مني المهندس احمد موهاب وشرحتله اني عايز اغير مساعد يمين فكتب فتقرير استلام العربية ان لمبة السيرفس شغالة وعفشة امامي يمين وقالي تعالا الساعة 12 الظهر استلمها قولتله تمام
المهم اتصل بيا الساعة 11 ونص والاشتغالات ابتدت
قالي العربية دي معمول فيها شغل برة التوكيل . قولتله انا شاريها قريب واول مرة اعمل فيها شغل
قالي لازم نعمل تقرير شامل قولتله يا استاذ انا عايز اغير مساعد لا غير
قالي لا لازم نعمل التقرير ابو 550 جنيه وانتا اختار عايز تعمل ايه فيها قولتله معلش انا الي غلطت وجيت طيب اعمل التقرير وبرده غير المساعد علشان متعطلنيش قالي اخر اليوم هنكون خلصنا علي الساعة 4 عصرا
المهم اتصلت الساعة 4 قالي لا دي هتخلص يوم السبت لان التقرير طويل اوي وحاجات كتير قولتله يا باشا هادفع حق التقرير واعتبر نفسك عملته وغيرلي المساعد
المهم قالي لا يوم السبت ..........
جيه السبت اتصلت بيه الصبح قالي لا السبت ده صيانة الطوارئ بس قولتله يا عم انتا الي قايلي السبت قالي معلش وكدا طيب يا عم اعتبرني طارئ (هو يعني ايه صيانة طوارئ فقط)
قالي الحد صباحا الساعة 8 هكون خلصت التقرير وبعت لك وانت اختار هتصلح ايه ونصلح بقة
جيه الحد كلمته الصبح 20 مرة مردش ورد الساعة 9 قالي نص ساعة والتقرير يخلص
كلمته 10 قالي نص ساعة والتقرير يخلص كلمته 11 مردش
اتصلت بالشكاوي علي الرقم بتاعهم 16202 ردت عليا الاستاذة مي حكيت لها القصة قالتلي خليك معايا على الخط هكلمهم وابلغك ... قالتلي حضرتك العربية خلصانه وتقدر تروح تستلمها قولتلها مستحيل( كده انا اتاكدت ان ميه اللفت انتشرت في البلد ) قالتلي العربية خلصت قولتلها اصلا انا لسه مشوفتش التقرير المهم بتاع العربية ده قالتلي لا خلصت قولتلها طيب انتي مسؤلة عن كلامك ده قالتلي لا ده كلام الاستاذ ياسر مدير الفرع قولتيلها انا هسالك تاني انا هاروح استلم العربية متصلحة ...قالتلي اه قولتلها لو سمحتي وصليني بالتيم ليدر بتاعك ... طبعا ركنتني على الخط وحكت قصتها وبعدين كلمني استاذ محمد قالي طيب هاوصلك لاستاذ ياسر مدير الفرع المهم حولني حكيت له الي حصل قالي انا مقولتش ان العربية اتصلحت ....
قولتله دي مشكلتكم مع بعض عموما انا مسجل كل المكالمة من البداية (لضمان جودة الخدمة)
قالي العربية اديني ربع ساعة يكون تقرير الصيانة خلص وهنكلمك نبلغك ....المهم (كله بلح)
روحت طلعت علي التوكيل ودورت علي المهندس احمد الي استلم السيارة ولقيته بعد عناء وبعد ما كلمته كذا مرة
واداني التقرير المرفق لصيانة سيارة تمنها 60000 جنيه
طبعا لا تعليق وبدات اتوه قولتله طيب
1- المرايا شغالة بكامل كفائتها كهرباء ليه نغير 2
2- البطارية زي الفل لا شكوى منها ومنورة اخضر وجديدة ليه اغيرها
3- البرابرايز سليم ليه نغيره ...قالي احتمال يتشرخ قدام
4- الكلاكس شغال وتمام ولا بيجيب زيت مثلا قالي معرفش
5- اربع جنوط ليه لا العربية بترف ولا لمست الكاوتشات من ساعة ما اشتريتها ولا الجنوط مخبوطة
6- فوانيس خلفية زي الفل مفهاش خربوس ليه نغير 2
يعني لو العربية كدا مش هتمشي ومش هتدور اساسا
وانا الحاجة الوحيدة الي حاسسها والي كمبيوتر الاعطال قالها عفشة او مساعد امامي
والصراحة مش قادر اتكلم تاني واخدت العربية عليها طينة السنين بقوله ايه ده قالي سيبها ساعتين كمان ممكن نغسلهالك وسابني ومشي
دي بقة فضيحة بكل المقاييس لتوكيل رينو ابو رواش
بعتذر اني كتبت كتير بس علشان ممكن كلامي يفيد حد
وحسبي الله
|