[Injection]

فلتر الهواء هو من أهم مكونات الموتور الفرعية, وبدونه يتحول موتور العربية الى معركة يلتحم فيها التراب بالزيت ضد أجزاء الموتور الداخلية, ويبدأ التجريح فى جدران السلندر, وتركه لمدة طويلة بدون تنضيف أو تغيير زى سد الشكمان جزئيا بالظبط هيؤدى لأستهلاك بنزين عالى وضعف فى أداء الموتور وحالته أثناء الدوران عامة.



مش ده موضوعنا, فلتر العربية الأصلى بيتسد بسرعة خارقة نظرا للتراب اللى مالى الجو, وكذلك مثيله الرياضى, وللحفاظ على أستهلاك كويس للبنزين وأداء جيد للموتور لابد من تنضيف الفلتر على الأقل مرة كل شهر أو مرة كل أسبوعين (للحفاظ على مستوى الأداء, لكن ممكن تسيبه وتنضفه وقت ما أنت عايز).

الفلتر الأصلى:-

فلتر العربية الأصلى بيبقى مكانه فى صندوق أسود داخل حوض الموتور,مربوط بمسامير أوغالبا مغلق بكليبسات سهلة الفك والتركيب, كل ما عليك هو فك الكليبسات بأيدك ورفع الغطاء لفوق وخلع الفلتر من مكانه, أما للعربيات الكربراتير فالفلتر بيبقى موجود طبعا جوه العمة.



الفلتر ممكن تنضيفه بعدة طرق, وكل واحد ودماغه بس الطرق كالتالى, ممكن تنفض الفلتر بأيدك وخلاص, أو تنضفه بمكنسة كهربائية, أو حتى تغسله بمياه عادية وتنضفه كويس وتسيبه ينشف, بس مبنصحش بكده علشان الفلتر الأصلى مش معمول علشان يعاد أستعماله ويتغسل (بس ممكن), ويستحسن يفضل تنضيفه أما باليد أو بمكنسة أو بلاور, أو حتى بضغط الهواء فى أى بنزينة أو محل أطارات.

الفلتر الأصلى بينصح بتغييره ((بره)) كل 15000 ميل والناس الفهيمة بره بتنضفه كل فترة وتركبه تانى, هنا طبعا الجو مختلف والفلتر لازم يتنضف على الفترات السابق ذكرها ويتغير على فترات قريبة كصيانة دورية, وأنصح بتغييره مع فلتر الزيت.

فلتر الهواء الصينى والسيموتا والمشروم:-



ودول أكثر الأنواع أنتشارا, وممكن تنضيفهم بأى طريقة, أنا بنضف الفلتر فى جردل مليان مياه وصابون, وبيطلع بلاوى, فيه ناس بتنفضه باليد وخلاص, الأغلبية بتنضفه بضغط الهواء عند عجلاتى أو فى بنزينة, بس عامة الفلتر ده ممكن يتغسل بأى طريقة, وأنا بنصح بغسله بالمياه علشان يرجع زى الجديد.

والفلتر مبيتخلعش من بعضه, أوعى تحاول تخلع الراس من عليه أو السلك, أنت جبته كده ولما ترميه هيترمى كده

الفلتر ده الناس المحافظين شايفين أن مسامه واسعه وممكن تدخل تراب للموتور, فاللأحتياط ممكن تحط على الفلتر wd-40 أو زيت موتور أو زيت باور, علشان يحجز التراب الصغير, بس زيت الموتور تقيل حبتين, و wd40 متهيألى هيطير بسرعة, فزيت الباور حل وسط (بس wd40 بيعمل شغل عالى برضه)


فلاتر K&n :-

فلاتر k&n ممكن تتنضف زى أى فلتر تانى, بس الشركة عاملة طريقة خاصة لتنضيفها كالتالى:-

بيتم رش السائل المنظف الخاص-k&N- على الفلتر, ويترك لمدة 10 دقائق عليه ثم يغسل بالمياه العادية ويترك حتى ينشف فى الهواء, بعد كده يتم رش الزيت الخاص-k&N- عليه ويتم تركيبه مرة أخرى.



وده لينك بالصور من موقع الشركة http://www.knfilters.com/cleaning.htm

وطبعا مبتعملش كده كل شهر, قول مثلا كل شهرين تلاتة أو حسب الموصى به من الشركة.

وطبعا ياريت بعد ماتعمل كده تفك البوجيهات وتنضفها حتى لو بفوطة, ولو خبرة فى الميكانيكا تحاول تظبط "الخلوص" بتاعها كويس وتركبها تانى أو تعمل العملية دى عند الميكانيكى.

وياريت لو أمكن تفك خرطوم الفلتر من مدخل الهواء air intake أو البوابة, وتنضفها على السريع بمنظف كاربراتير (جاز فى علبة أيروسول) وفوطة, أو ممكن تودى العربية للميكانيكى وهو يفكلك البوابة وينضفها بنفسه حتة حتة لو متنضفتش بقالها فترة طويلة.



وبكده نبقى تقريبا نضفنا دورة الهواء تماما.

تجربة شخصية: أنا مركب فلتر سيموتا صينى بعد ما الفلتر البرتقانى الكبير أتهرس (قصة طويلة), وكان بقاله حوالى شهرين متنضفش وشكله شوارع (خلوا بالكوا أنى مركبه تحت حوض الموتور عند العجلة), و الموتور كان مكتوم وصوت الفلتر كان غريب, تم خلع الفلتر وتنضيفه بمياه بس على السريع, ونشفته وركبته تانى, الموتور بقى مرتاح أكثر وأستجابته أتحسنت بكتير, وصوت الفلتر رجع زى ما كان, وتم كسر حاجز ال 150 على الرابع على طريق المنصة باللانوس وتقطيع كرولا على نفس الطريق وتقطيع لانسر تانية على طريق المطار (تقريبا صاحبها قلبه خفيف) الكلام ده الساعة 7 الصبح طبعا.
وكل عمرة وأنتم طيبين