[wael890610]

السلام عليكم ورحمه الله
اهلا بكم
الموضوع انى غيرت المكان اللى كنت بغير فيه الزيت بتاعى المره اللى فاتت واستسهلت ودخلت على اقرب مكان لتغيير الزيت = التعاون اس جى الازرق
تانى يوم وبعد ما خلصت الشغل العربيه قامت بس لقيت لعربيه مش مظبوطه و دخانه بيضه بتطلع من الشكمان بسيطه مش كتير بس قلبى وقع اتصلت بواحد حبيبى قالى دوس بنزين جامد ورا بعض كذا مره وشوف .
سمعت كلامه وشويه كده العربيه اتظبطت والدخانه راحت خالص قولت تمام ونسيت الموضوع
بس قولت ابص على الزيت والمايه لقيت الزيت ناقص نص كيلو = اول مره العربيه تعملها زوتها ومشييت
بعدها باسبوع كده لقيت العربيه متلته روحت للميكانيكى قالى يا باشا فى بوجيه عليه زيت

قولتله حبيبى انت اللى باشا بس عليه زيت ولا مكربننننن
قالى عليه زيت طب والحل طبعا انى اغير البوجيه واعمل حسابى فى نص عمره او عمره كامله حسب ما نلاقى - قالى انت جبت من الاخر اعمل حسابك فى باكو بقه
المهم غيرت البوجيه والعربيه اتعدلت وروحت وانا شايل هم الدنيا
بعدها بيومين العربيه تلتت تانى بس من بوجيه غير اللى اتغير روحت جايب احلى طقم بوجيهات صينى بعشرين جنيه وحطيته فى العربيه وغيرت اللى باظ ولقيته برضه مزيت مش مكربن.
غيرت البوجيهات وانا عامل حسابى ان العربيه هاتفتح بقها وخليت معايا بوجيهات احتياط علشان لو تلتت تانى
المهم عدى دلوقتى شهر ولا جرى حاجه تانى لا شوفت دخانه ولا العربيه تلتت ولا البوجيهات زيتت والعربيه معايا تمام وبتقوم معايا الصبح من اول مارش
حكيت الحكايه لصحابى قالولى احتمال كبير يكون الزيت مغشوش
سؤالى هنا بقه المفروض لو حتى الزيت مغشوش ما يروحش غرفه الاحتراق ابدا
يعنى هل ممكن الزيت المغشوش يعمل كده فعلا
وهل فى امكانيه سهله للتحقق من الموتور
ولو الموتور داخل على عمره هل فى نصائح احافظ بيها اطول فتره ممكنه