المشاركة الأصلية كتبت بواسطة NicEgypt
استاذى العزيز مرسيدس .
بالنسبة لموضوع راس اكتروس .. فعموما انواعهم كتيرة جدا
سواء مرسيدس اكتروس .. او اسكانيا .. او رينو وهى ارخصهم على فكرة
او المان .. لو عملنا قائمة بالارخص سعراَ سواء جديد او مستعمل والاعلى سعراَ
هتلاقى الارخص سعراَ خالص ف القائمة من تحت الريـنو .. علماَ ان فية منها فتيس اتوماتيك وارخص تخيل ؟
والاعلى سعراَ مرسيدس اكتروس .. بالنسبة للرأي طالما ناوى تجيب راس بس .. الراس مشاكلها قليلة
طالما هتجيب راس حالتها كويسة سواء مستعملة او جديدة ..
ثانيا : علشان ارد على حضرتك بأستفاضة اكبر ومعلومات اكتر .. لازم حضرتك تحدد باقى معلومات زى مثلا
الراس حضرتك عايز موديلها قريب ولا بعيد ؟ جديد ولا مستعمل .. هوضح سبب سؤالى
لان ببساطة الجديد من اول موديلات 2000 وما بعدها كلة شغال كمبيوتر وخصوصا الاكتروس فية شاشة اعطال
LCD وفيها ABS حتى الازاز الكهربا بالكمبيوتر .. فيها اوبشنز مش موجودة فى ملاكى موديل 2000
اي عطل ف الحاجات دى الكمبيوتر بيظهر علامة وبيكتب السبب وفى بعض الاعطال الكمبيوتر بيوقف عمل العربية
بالكامل لوجود عيب ف حساس مثلا .. او اي شيئ اخر يعنى شيئ تافه يتطلب من حضرنك الاتصال بالوكيل .
وطبعا الوكيل بيكشف بكمبيوتر مشابة لكمبيوتر السيارات الملاكى وعلى اساسة هتدفع ياما كتييير ياما بسيط
فلازم حضرتك تقرر لو عايز تكنولوجيا جديدة وسيارة مريحة وكمبيوتر اعطال .. يبقى موديلات اول 2000
وتتوقع اي حركة منها ... انما عايز حاجة مفهاش الكلام دة يبقى عليك وعلى الاقدام وتشوف حالة نضيفة
النقطة الثالثة : الديل .. حضرتك عايز الديل يكون اية ؟ بمعنى .. لو هتشغلها ف نقل المعدات الثقيلة يبقى كـساحة
يبقى هتحتاج ديل كساحة .. لو هتشغلها فى نقل المأكولات والاطعمة وخلافة .. يبقى ديل تـلاجة ودى فيها منها انواع
كتير ومشاكلها كتيرة جدا .. لانها ببساطة فيها تكييف تلاجة بماركات كتيرة منها كاريير .. وماتور التلاجة بيعطل
فى حالة عدم الاعتناء بية .. وكذلك بيكون لها 2 بطارية غير بطاريات الراس خالص وليها دينمو خاص بيها
ولها عيوب ومميزات ... بعد كدة فية ديل مقطورة اللى هو حاليا قطعة واحدة بس لان المرور منع المقطورة
ودى بتشيل طوب وحاجات مختلفة .
بعد محضرتك تحدد وتختار من الحاجات دى .. هقول لحضرتك هل المهنة دى شغالة فعلا وتوكل على الله ام لا
مثال اخير .. لو حضرتك اخترت ان العربية هتشتغل فى نقل المعدات الثقيلة .. يبقى كدة ديل كساحة
وهنا مشاكل بالجملة .. اولاَ هتحتاج كاوتش كتير لان الديل بياكل الكاوتش خصوصا لو العفشة مش مظبوطة
بالاضافة ان مهنة نقل المعدات الثقيلة شغال فيها الالافات .. والشغل اساسا فيها مــريح .. لان ببساطة الاستثمار
قليل جداَ والعرض اكبر من الطلب ( العرض من سيارات النقل .. اعلى من طالبى النقل ) . فكر كويس واحسبها
وهساعدك بأذن الله وبفضل من الله بأخذ القرار المناسب
|
بالنسبة لموضوع الديل .. فعلا برة فية موضوع ان الديل خاص بالشركة وعلية "اللوجو بتاع الشركة واسمها"
بس دة ينطبق على شركات الاغذية والمنتجات الغذائية فقط لا غير .. وشركات البترول كمان بس
غير كدة باقى السيارات والانشطة زى مصر تمام ..
بالنسبة لمصر .. فية شركات " قـلـيلة " منها شركات بترول معروفة " بدون ذكر اسماء "
علشان ميبقاش اعلان لهم .. عندهم ديول فقط وحضرتك عليك الراس بس .. وهنا بقى ميزة
حضرتك طبعا سألت نفسك اكيد لية هما بيشترو ديل بس ومش بيشترو راس
يعنى اللى يخليهم يشترو ديل ترلة .. يقدرو ببساطة يشترو راس ويبقى عندهم سيارة كاملة وسواق
كمان ومش هيتحتاجو لحد وهينقلو حاجتهم بنفسهم .. الرد على السؤال وهو الميزة وهى :
ان الراس بتحتاج صــيــانة اكتر من الديل .. لان الراس فيها ماتور وزيوت وصيانة وخلافة
غير كدة محتاجة سواق كمان لة مرتب ومصروفات .. وجاز وغسيل ... وكل ما يخص بالصيانة
انما الديل صيانتة خفيفة جدا وغالبا بيكون كاوتش فقط .. حتى الترخيص بتاعة سهل جداَ
وبالتالى الشركة بتوفر مصاريف عمالة وهى السواق .. بالاضافة لمصروفات الصيانة ومشاكل الراس
المختلفة .. اللى ممكن توصل لعمرة كاملة .. والعمرة في العربيات دى مش زي الملاكى خالص
انسى 2000 ج دى وخمسة لعمرة ملاكى .. بالاضافة ان لو قدر الله حصل حادث الديل امرة سهل وغالبا بيكون سليم فى اغلب الحوادث .. انما الراس دى لها فيلم تانى خالص .
ودى الاسباب الرئيسية للامتلاك الشركات ديول فقط وليس لعدم خبرتهم او لبخلهم بشراء راس مع الديل
ادعوا الله ان اكون وفقت فى الرد على استفسارتك وتكون فادتك . ولو عايز فعلا تدخل ف الموضوع دة
يبقى تخليك فى شغل شركات البترول والتلاجات .. غير كدة انسى تماماَ .. سواء كساحات او مقطورة
او غيرة دول سوقهم مريح جدا .. ويوم ميشتغل بيضربو بعض ف الاسعار بطريقة غريبة لدرجة ان مشوار قريب العميل يقولك 500 ج كأنة مأجر ملاكى بالظبط . ورايي طالما خبرتك بسيطة ف الموضوع دة يبقى بلاش منة احسن
واضح كده ان حضرتك أكتر واحد هنا فاهم فى الموضوع ده
و طبعاً ده بيترتب عليه اننا نطلب منك انك تعمل موضوع يشمل كل حاجه عن حكايه النقل و التريلات و الكلام ده لأن الموضوع للإفاده العامه فرصه نلاقى حد فاهم يكتب فى الموضوع ده