جرى ع الميكانيكى تانى ومعانا الكنترولر وبندعى يارب يكون اتصلح
طبعاً الميكانيكى كان بينفخ ومش طايق نفسه الراجل كان بيعمل سرفيس خفيف يقوم الزبون (عامل نفسه فزلوك) ويفتح فى العربيه شغل تانى وامبارح كان السبت واكيد عايز يروح ياجز بقى ... وما ادراك ما هو يوم السبت وليلة السبت للصنايعية
المهم جرب يا جدع شغل يا جدع العربيه دارت
بس كان شكل العربيه (متلتة) قولت لصاحبى قالى لاء بس ده يمكن علشان العمة والفلتر مش راكب
قولتلة لاء يابنى شكل رجة الموتور وصوتة مش طبيعى
طنشنى ...
((( على فكره احنا غالباً بنتشغل بايدينا مش شرط نستنى الصنايعيى يعنى )))
هوب جه الباشميكانيكى صاحب الورشة
بصراحة معلم من اول بصة قال العربيه متلته
روحت واكل صاحبى على قفاه طبعاً وقولتله علشان تبقى تسمع كلامى من اول مرة
طب يا جدعان نشوف فين الربع اللى مش شغال
فكينا سلوك البوجيهات واحد واحد لحد ما ليقنا الفردة اللى مش بتطلع كهرباء
كده يبقى الموبينة كمان باظت
صاحبى : لاء يمكن السلوك
راح جاب طقم سلوك وجرب تانى هى هى
((( علماً ان الموبينة ممكن تختبرها لوحدها بس هو مكانش مقتنع او مش عايز يصدق انه لبس فى موبينة كمان )))
المهم كنا شاكين برضو فى ان الكنترولر متصلحش كويس وان كان الباشميكانيكى كان اكثرنا وثوقاً فى انها الموبينة
المهم انا كانت رجلى وجعتنى من اللف ريحت شوية وسبتهم يجربو وفى الاخر رسيو على انها موبينة
طيب بكام ياعم الحاج
الصينى لقيناها اول حاجة ب 200 جنية
واللى بيتقال عليها الاصلى ب 450
الميكانيكى قاله جيب الصينى ومشى نفسك وصاحبنا مصمم يجيب الاصلى
جاب الاصلى
جرب الاصلى
تمام بس العربيه متلتة برضو
قولنا يمكن الموبينة مش تمام نلحق نروح شارع دمشق نجيب واحدة نضيفة
جرى على شارع دمشق وكانت الساعة داخلة فى 11 و بليل
المهم لقينا محل تمام فيه شاب تمام التمام عمل معانا واجب وادانا الموبينة نجربها ونركبها قبل حتى ما ندفع تمنها
طلع يا جدع العدة جرب ركب ظبط تمام
العربيه دايرة تمام بس انا حاسس انها لسه متلته وهو برضو شايف انها طبيعية عادى
المهم دفعنا تمنها (الاصلى) ومشينا
بكام الاصلى ب 500
والصينى عنده كان بيبيعها ب 185
اخدنا العربيه ورحنا على الميكانيكى
بص على العربيه قالنا ديه متلته لسه
قفا تانى لصاحبى والميكانكى نفسه هب فيه لما قعد يقاوح معاه وقاله لوسمحت اقعدو بقى وسيبونى انا اشوف شغلى
كبسه جامدة بس الراجل عندة حق باقله ساعات سابينا شغالين فى العربيه وهو عايز يروح بقى
طبعاً انا مكنتش حضرت موضوع تركيب طقم الرشاشات وهما لما ركبوها مخدوش بالهم انها كانت متلته من اول ما ركبوها قبل حتى الكنترولر ما يبوظ
(((( وديه واحدة من اهم قواعد تحليل المشاكل انك لازم تكون دقيق الملاحظة فى كل خطوة سواء تركيب او فك)))
ففى الاخر جرب يركب الرشاشات القديمة وفعلاً التتليته راحت
وبكده بقى دافع 500 جنية موبينة
و 250 تصليح كنترولر
و 45 طقم سلوك بوجيهات
و 50 مصنعيات
والمشكلة الاصلية مازالت موجودة
والبوجيهات والفلاتر وباقى الحاجات ديه احنا اللى ركبناها بايدينا اصلاً !!!
يعنى دفع 800 جنية فى مشكلة واحدة بس
طبعاً خلصنا الهم ده كله على الساعة واحدة تقريباً
وروحنا متنكدين ومروحناش لصديقنا الصدوق التانى
.......... يتبع