[mr_astra]

السلام عليكم ورحمة الله اتفق مع كلام الاخ mmffor مية فى المية وعن تجارب كثيرة جدا المشكلة فى العمرة انك بتتعامل مع متغيرات كتيرة اولها قطع الغيار من بساتم وبنوز وجلب بيلات وسبايك وصبابات وجوانات والى اخرة ...... لو ربنا كرمك وعرفت تجيب الحاجة اصلى اوريجينال يعنى مش يابانى وخلاص يبقى قطعت ثلث المشوار ( واشك انك تعرف تجيب الحاجة اوريجينال ) تيجى بقى بعد اما الميكانيكى يفك المكونات ويبعتها عند الخراط طبعا اللى مش هايكون من اختيارك والميكانيكى يؤلك انه متجرب وبودى شغلى عندى كولة لو واحد ميكرون زيادة فى الخرط يبقى العمرة بالسلامة انت متخيل ان فى مصر ماكينة تقدر تعمل كدة واللى بيشغل الماكينة فاهم انة يقدر يعمل كدة وعموما لو ربنا كرمك وجبت قطع غيار اصلية وكرمك تانى والموتور بتاعك راح عند خرط كويس يبقى قطعت ثلثين الطريق ..... نيجى بقى للميكانيكى اللى هو طبعا مش بيمد ايدة فى حاجة وعامل فيها استشارى ومشغل معاة صبية اللى يسبلك مسمار مهوى واللى يربطلك صامول غلط واللى ينسى يركب حاجة وكل دة وارد والله العظيم مش من خيالى يعنى والله هاتشوف العجب وساعتها هاتعرف احنا لية عربيتنا بتعمل حوادث اكملك؟ ماشي واللى ينسي يركب سلك سينسور الحرارة واللى ينسي يربط وش السلندر بمفتاح عزم طبعا حضرتك الوقت دة كولة متمرمط عند الميكانيكى واتهريت مشاوير روح يا بية هاتلنا دى وتبقى لسة راجع يؤلك هتلنا حاجة تانية واما ترجع ترجع الاولانية لانها مش عاوزة تركب يا بية مش نفس الموديل وطبعا وهما بيفكو الموتور وبيركبوة الامر ما يسلمش من وش فانوس يتكسر او ردياتير يتخبط واااااااااارد كل الحاجات دى وبعدين ربنا كرمك بقى وكلة تمام والموتور دار تيجى سيادتك تركب العربية تلاقى الكراسي كلها حتى الكنبة اللى ورة مليانة زيت وشحم طب اية اللى جاب الزيت على الكنبة اللى ورة اةةةةةةة اصلهم كانو حطين شوية حاجات من الموتور جوة الصالون ابقى وديها المغسلة يا بية بعشرين جنية صدقنى هاتتقلك كدة بالظبط ..... فى مشكلة تانى مقبلانا دلوقتى اية هى التليين هاتعد انت تلينها ولا هما يدوروها شوية ويبطلوها شوية وخد بالك دى اهم من الخراطة نفسها ازاى تلين الماكنة ..... وصدقنى بعد كل دة انت وحظك يا تصيب يا تخيب ومتهيالى حظك مش هايطلع حلو مع قطع الغيار والخراط والميكانيكى ....صعب .... تعالى بقى نشوف التكلفة تقريبا نفس سعر الموتور الاستيراد اللى شيل الحمام حط الحمام شغلانة كدة 4 ساعات وخلصنا على كدة اما تبيع الموتور القديم وتركب استيراد الفرق بنهم مش كتير خاللللص