تجربتى مع مياة الردياتير
انا احب اضيف تجربة حصلت معايا ف موضوع ميية الردياتير . العربية عندى ماروتى 2007 شاريها كسر زيرو عاملة 15000 كم بس كانت مركونة و من باب النظافة صفيت ميية الردياتير و عملت غسيل للدورة و تمام التمام . طبعا كنت جايب جيركن ميية خضراء من كارفور دا اول نوع جبتة و مليت و ظبطت الدنيا تمام . المشاكل اللى حصلت بعد كدة سخونة زائدة جدا للموتور و خصوصا ف السرعات العالية و لما افتح الردياتير الاقية فاضى المهم تابعت لما وصلت البيت و لاحظت حاجة غريبة جدا لما تكون العربية باردة تماما و افتح غطا الردياتير تحس انك بتفتح ازازة بيبسى يعنى لازم تسمع صوت فسسسسسس اثناء الفتح المهم دققت النظر و السمع ف الفتحة و لقيت زى فوران بسيط بيحصل وصوت زى متكون حاطط بيبسى ف كباية و بتبقلل مع العلم الردياتير عندى نضيف جدا و حتى لون دهان المصنع الداخلى لية زى الفل عربية لسة 15000كم المهم طبعا عرفت ان الميية فيها حاجة غلط و زى ما سمعت كتير من الاخوة عن لسانهم او لسان بتوع الردياتيرات نفسهم ان الميية الخضرا بتاكل الالومنيوم بس مكنتش اعرف المعلومة دى الا لما عملت بحث و لانى دايما بستعمل نفس النوع ف العربيات السابقة بدون مشاكل الا اللانوس لانها كانت نازلة بميية زرقا اصلا . المهم فضيت الميية تانى مش هستنى لما الاقى الردياتير بقى بودرة ههههه . جبت نوع تانى ميية خضرا برضوا و نفس الحوار حصل تانى هوة هوة . زى ما قلت بعد البحث ع النت اكتشفت موضوع الالوان و نوعية كل لون لنوع الردياتير انا بقول الكلام دا للى بيقولوا دا مجرد الوان و نفس المواد المضافة بس لأ مش مجرد الوان دى تركيبة و كل لون بتركيبة المهم تانى مرة مع تانى نوع ميية خضرا نزلتها تانى و غسلت كويس الدورة و حطيت ميية عادية مؤقتا . رحت اشتريت جركن ميية اسبانى لونة بمبة اللى بيسموة احمر و حطيت منة بعد تصفية ميية الردياتير و ظبط الدنيا طبعا لاحظت فرق كبير اولا السخونة عادية زى الطبيعى و الاهم انى لما افتح الردياتير عادى جدا بفتح غطا مش زجاجة بيبسى و دققت النظر و السمع مفيش اى صوت فوران او بقاليل و انتهت المشكلة على خير بعد ان غرمت 2 جيركن ميية خضرا و المم ان الميية اللى نزلتها من العربية كانت خضرا بس الغريب زى متكون مخففة لان خضارها فاااااتح قوى بس الحمرا حطيت منها عادى بدون تخفيف و مفيش مشاكل خالص . المهم اللى حصل دا الفايدة منة ان فعلا كل لون لة خواصة و تركيبتة الخاصة و مش كلة زى بعض زى الاخوة بيقولوا و الله اعلم
|