انا لله و انا اليه راجعون الكوبلن طلع سئ جدا و الخامة بتاعته طلعت مغشوشة و التاجر النصاب بتاع الحرفيين عرفت انه مزور الاختام بمكنة ليزر و جايب الكبالن الصينى بيبيعها على انها اصلى
ان شاء الله انا هجيب جوز كبالن على بعضه عشان اللى راكبين عمرهم خلاص و هروح انفخ التاجر ده على الكوبلن الضايع اللى باعهولى و هنفخ الميكانيكى هو كمان
المهم نيجى بقى للجزء الثالث من الموضوع و هو التريجر
افكركم احنا خلصنا الانفرتر و خلصنا التربو و تجميعه و اتكلمنا نعرف ازاى بيركب على الموتور انهارده بقى هنتكلم عن التريجر
التريجر يفرق ايه عن الزرار العادى الزرار العادى بيعمل اون و اوف بمجرد الضغط عليه مباشر كده بدون او واسائل حماية او دوائر الكترونية - التريجر بيكون فيه ريلاى و دايرة الكترونية و بريس الحمل هنا بيكون على الريلاى لكن الزرار بيكون الحمل عليه كله
التريجر اللى احنا هنعمله ان شاء الله تريجر لاسلكى لسببين السبب الاول انك متخرمش اى حاجه فى التابلوه و السبب التانى انك لما تاخد التريجر من العرابية فى جيبك محدش هيقدر يشغل التربو و بكده تحمى اولادك او اخواتك او اى حد غيرك بيستخدم العربية صغير فى السن من انه يجرى بيها او يستخدمو غلط هيفضل الموضوع ده للمحترفين
طيب التريجر ده ايه المكونات اللى هنحتاج ليها للتريجر ده
1- دايرة لاسلكى مفتاح واحد بتاعة عربية لعبة ( اصبرو و شوفو اخر الجزء ده هيكون ازاى )
2- شاحن ولاعه يكون بايظ او مستغنى عنه
3- ريلاى 10 امبير
4- شوية اسلاك و صباع شمع لحام
5- هنحتاج نستخدم كاوية لحام و كاوية تقطيع بلاستك و شاسيهات
6- هنحتاج ريجيليتور 7812 ده هنستخدمه فقط لو البطارية عندك بيتغير فولتها عن 12 فولت بتعرف ده بالافوميتر
دلوقت هنقص الجزء الزيادة من الريموت زى ما فى الصورة A و هنفرغ جزء من قاعدة الريموت C و هنفضى شاحن الولاعة من اللى فيه و هنسيب السوسته و المشبك الجانبى المشبك سالب و السوسته موجب و هنوصلهم على دايرة الريموت مكان البطاريات B
هنلحم سلكة نحاس و نعريها مكان الانتينا فى دايرة الاسلكى و نلفها تحت القاعدة بعد ما نلبسها فى شاحن الولاعة
هنقفل شغلنا بشمع اللحام و يكون اللحام كويس و ايدك خفيفه و ناعمه و تخبى الجزء الخلفى بحتة فيبر فى الاخر هيكون شكل التريجر كده تحطه فى الولاعة و تشغل التربو تشيله من الولاعه و تروحه معاك التربو مش موجود و كمان ممكن تطبق الفكرة دية على دايرة الكونتاكت و تخلى العربية ما تدورش غير بالطريقة دية لكن ده مش موضوعنا الاساسى دلوقت
دلوقت بقى نيجى للجزء اللى بيلخبط شوية الدايرة اللى فكناها فيها هيصة اسلاك خلينا نفهمها واحده واحده
فى مجموعة بتدخل كهرباء تشغل الدايرة ( دية هتاخد كهرباء من البطارية او من الريجيلاتور لو البطارية بتغلط )
و مجموعة كانت بتشغل موتور العربية اللعبة ( دية اللى هتركب على الريلاى )
و مجموعة كانت بتشغل لمبه العربية اللعبة ( دية هنخليها كده لوحدها عشان هنستخدمها للسينسور بتاع امبير التربو و ممكن لو مش هتركب امبير تعمل بيها حركات زى دايرة صوت تبرمجها تقول سوبر شارجر او باور تربو لكن بلاش مظاهر و خلينا فى البريفورمنس )
مجموعة الكهرباء لونها احمر و اسود
مجموعة الريلاى لونها احمر و اخضر سلك بيكون تخين
مجموعة اللمبة لونها بيكون الاتنين اخضر
هنجيب الريلاى و بأستخدام الافو هنعرف انه ناحيه ملف و انه ناحيه سويتش و هنلحم سلكتين على رجلين السويتش فى الريلاى لونهم اصفر ليه اصفر هشرح قاعدة الالوان فى اخر الموضوع دية معلومة اثرائية مش اساسية دلوقت
هنلحم على ملف الريلاى سلكين الاحمر و الاخضر مش هيفرق معاك الاتجاه لأن التريجر رايح جاي فكده كده هتشغل الريلاى بالاشارة او عكسها
شوف الصورة
هنحط بين الريلاى و الكارت حتة بلاستكه و نلزقهم بشمع لحام على بعض
و بعدين تعالو بقى للتوصيل
دلوقت احنا عندنا فى السوبر شارجر خارج رجلين بعد تركيب الانفرتر رجل موجب و رجل سالب
و عندنا فى كارت التريجر خارج اربع رجول رجلين صفر من الريلاى و رجل موجب و رجل سالب و طبعا اعتبرو الرجلين الخضر اللى قولت عليهم للسينسور مش موجودين خالص دلوقت
هنعمل ايه فى التوصيل السالب كله الرجول السود كلها هتتجمع مع بعض و نطلع بسلكه طويلة اسود هتاخد من البطارية لما نركب
الموجب بقى رجل صفرة من الريلاى هتمسك فى موجب السوبر شارجر و رجل صافرة من الريلاى هتمسك فى موجب كارت التريجر و يخرج منها سلك اصفر مش طويل اوى عشان لسه هيركب عليه الفيوز وقت التركيب على البطارية
و نلم ده بشكارتون و نلصق الكارت على السوبر شارجر و منغفهوش
متنسوش فى رجل زارقة بتاعة الانتينا دية لما هنختبر الحاجه بتاعتنا هنربطها فى الانتينا بتاعتها لما هنيجى نركب هنحط الانتينا بتاعتها جوه كبوت العربية هقولك ازاى متستعجلوش على رزقكم
ده الكارت و هو راكب على السوبر شارجر
كده احنا جاهزين من غير السينسور السينسور بقى هنشتغله كمان يومين على رواقه لأننا هنعمل سينسور للأير فلو مش للكهرباء يعنى من الاخر هنعمل سينسور يقيس مقدار الهواء الخارج من التربو و نعمل عداد مخصوص ليه و نعيره على حسب التربو عشان نكون فاهمين كل حاجه بتحصل حولينا ازاى
على فكرة الموضوع على ما يجى يوم التركيب هيكون ضاع وسط المنتدى و لو حد عنده نصيحة بخصوص تاجر محترم لكبالن الفولكس يبعتلى فى رسالة خاصة