المشاركة الأصلية كتبت بواسطة kimof911

أنا شاريها بقالي سنة و شهرين اهه و الحمدلله ماشية معايا زي الفل...
انا عامل حتى الآن 30 ألف...معدل كبير شوية على سنة بس طبيعة شغلي بتخليني اقطع مسافات كبيرة يوميا...
بصراحة بنصح بيها أي حد عايز يشتري عربية زيرو في حدود 60 ألف...مفيش وجه مقارنة بينها و بين أي حاجة تانية في فئتها...الألتو...الباندين و...شيري ...jac

استهلاك البنزين في السفر حوالي 14 كيلو متر لكل لتر
و في وسط المدينة حوالي 9 كيلو متر لكل لتر
سافرت للساحل الشمالي حوالي 330 كيلو بتفويلة واحدة...ما فولتش في نص الطريق بفضل الله

العربية بشكل عام مستواها مرضي جدا لي و لأسرتي الحمدلله...كشكل حلوة جدا...كمساحة داخلية ممتازة...الشنطة الخلفية بتاخد شنطة سفر محترمة و معاها هاند باج واحدة
العفشة متوسطة...مش ناعمة اوي زي ال f3 و لا ناشفة...لما بتاخد مطب و لا نقرة بتحس بيه

الكماليات ممتازة...الكاسيت ...التكييف...الزجاج الكهرباء....مفيش عندي فيهم أي مشاكل

الموتور سحبه معقول على 1000 cc 3 سليندر....بتجيب 100 في حوالي 19 ثانية ( رقم حلو جدا على نوع و حجم الموتور)...
أقصى سرعة وصلتها كانت 150 على وادي النطرون - العلمين و كان الثبات ممتاز فعلا...أبعاد العربية ممتازة....تصميم تويوتا و ثبات رائع جدا حقيقي على المنحنيات و حتى في لحظات الطوارئ بفضل الله كانت مش بتعوم...

عيوبها الأساسية...بتتخدش بسهولة جدا...غالبا هاشوف ينفع تاخد وش دوكو تبع التأمين و لا لأ على اخر السنة ان شاء الله..

واطية شوية على الأرض فلو فيه 5 راكبين في العربية ( 2 ادام و 3 ورا) لازم تحرص اوي في المطبات عشان ما تحكش...


أخيرا أنصح أي حد بجد عايز عربية في حدود 60 ألف ب f0
ممتازة حقيقي