رد: الصيانات المطلوبة لنيسان 2008 مستعملة
السلام عليكم
انا زيك شهر مايو اللى فات جبت نفس الموديل وكانت عاملة105الف
وبصراحة كانت حالتها كويسة بس استهلاك البنزين كان عالى المهم غيرت الاتى ومش محتاج توكيل لان الصيانة دى اى حد يعملها
بوجيهات ngk يابانى ب 60 جم وفرقت جامد فى الاستهلاك
فلتر هواء لانة كان متبهدل خالص الكورى ب 65 جم
فلتر تكييف اندونيسى ب60 جم وملهوش لازمة وكمان العربية بتنزل من غيرة وفايدتة انك لو بتسحبى هواء من برة السيارة لو حد بيدخن مثلا بس انما انا دايما ضبطة على الدورة الداخلية
سير دينامو وتكييف وسير باور عددهم 2 سير يابانى ب 90 جم سير الكاتينة جنزير مبيتبصش علية الا بعد ال200 الف او اكتر يعنى مش وقتة خالص
تيل امامى ب90 جم كورى وخلفى 100 ماليزى
وطبعا تغيير زيت الموتور والفلتر اساسى الزيت بحوالى 130جم والفلتر ب 25جم
زيت الباور وزيت الفرامل بيتزود بس وزيت الفتيس المانول بيتكشف علية ويتزود وكل الزيوت تكشفى عليها وانتى بتغيرى زيت الموتور
وبالنسبة للرادياتير شوفى المية حالتها اية وهيه بتتغير بمية خضراء علشان الصدا
واكشفى على اهم حاجة الكاوتش لو متبهدل هاتى طقم جديد افضل لانه هوة الاساس وربنا يسترها معاكى والف مبروك وربنا يديكى خيرها ويكفيكى شرها
|