[TELEBK]

والله حكاية الخداع في شراء العربيات ديه كتير ، والنصب فيها أكتر ، وحنقل تجربتي :
كنت شفت عربيه أونو واقفة في الشارع وعجبني لونها وشكلها كان كويس ، وأنا بصراحة كان نفسي فيها أوي ، المهم سألت ولقيت إنها تبع معرض جنبنا ، رحت للتاجر وقالي إنها بتاعت إتنين إخوات ، إتصل وجه واحد في نص ساعة وقال إنهم تجار سيارات بس العربيه ديه جايبينها ليهم علشان تنقلاتهم ومش بيفكروا بييعوها " وطبعا بهبلي أنا صدقت " المهم بيقولي إنهم أتخانقوا وعايزين ينفصلوا وكل واحد ياخد فلوسة منها " ده علي أساس إنهم جايبينها شراكة " ، وبعدين العربيه كانت بتوكيل وصاحبه هوه أخوه وبعت يتصل بيه ، أخدت العربيه وبرضة بهبلي رحت أنا وواحد قريبي المفروض إنه بيسوق بقالة 30 سنه ، ورفعناها في بنزينة " وعلي فكرة معظم البنزينات بتبقي عارفة عربيات التجار ومتفقين معاهم يقولوا عليها تمام " والراجل قال زي الفل مفيهاش غلطة ، أخدتها وجربتها وكانت بتجري زي النحلة .
مطولش عليكم خلصت فيها وقولت أروح التوكيل أبص عليها رفعوها قالولي واخده خابطة من تحت في القنطرة والعربية مايلة شمال خلفي ومرحلة في العجلة الشمال الخلفي 2 سم للخلف ، المهم أتضح إنها كانت عاملة حادثه وخابطة في رصيف وراشة بره بالكامل ، وطلعت عين أهلي علي ماقدرت أعدلها شوية ، وفي الآخر بعتها وخسرت فيها 10000 جنيه ده بعد التصليح ، بس هيه بصراحة قعدت معايا سنتين ، آه كانت آرفاني بس كانت برضه شايله عني بلاوي أنا وأسرتي .
الدرس المستفاد :
1 - إبعد عن التجار لا تبيع ليهم ولا تشتري منهم .
2- إكشف علي العربية عند واحد وإتنين وتلاته وخد معاك ميكانيكي وسمكري تكون عارفهم ويفضل يكونوا مش من المنطقة إللي شاري منها العربية .
3 - إوعي تتخدع بمظهر العربية من بره أو من جوه المهم أساسيتها .
4 - أوعي تتخدع بمظهر إللي بيبع لك العربية سواء ست أو راجل أو شيخ أمشي بطريقة علمية في الشراء أفضل .
5 - أوعي تتخدع بأي قصص تتقالك ومواضيع مالهاش دعوه بالبيع ، زي العربيه ديه شراكة بين إخوات أو ورث أو تتباع لظروف سفر أو ....الخ ، وده في حالة لو شكيت في صاحبها وحسيت إنه بيلعب بيك أو شكله تاجر وبيشتغلك ، بس فيه ناس كتير محترمة بتبيع لظروف أسرية أو سفر أو مرض " لاقدر الله " وخلافة ، وده ممكن أي حد يقدر يعرفهم علي طول .
6 - في الآخر " إستفت قلبك وإن أفتوك " وأعلم أنه " قل لن يصيبنا إلا ما كتب الله لنا " ، وبرضة " لايمنع حذر من قدر " .