ورطه فى سوزوكى 7 راكب
تجربتى المريره مع التوكيل وشركه المصريه للسيارات بالاسكندريه
لسه شارى سيزوكى 7 راكب موديل 2014 اشترتها من شركه المصريه للسيارات الموجوده بجرين بلازا فى سموحه ويا رتنى ما اتجننت فى عقلى واشترتها من هناك رغم انى فضلت اشترى من شركه كبيره ولها اسمها
المهم
انا خبرتى فى الميكانيكا على قدها وكان فيه رفض غريب من موظف التسليم عند طلبى تجربه السياره انا قولت العربيه جديده ومفيش مشكله واكدلى الموظف ان لو فيه مشكله روح التوكيل وهيعملوهالك
بعد ما طلعت على الطريق ادوس فرامل يا دوب العربيه تهدى ومتقفش قولت اجرب فرامل اليد والله لقيتها زى قلتها كانها مش موجوده
ربنا سترها لحد ما وصلت البيت وقولت تانى يوم اروح التوكيل وبرضه يا رتنى ما روحت
بتتعامل هناك كانك سواق تنايه مش مالك سياره ملاكى
اشتكيت للمهندس من العيوب الى فى العربيه
* ضعف فرامل الرجل
*فرامل اليد مش موجوده خالص
*الغيارات بتعض وبتيجى بالعافيه
بعد ساعه طلع الفنى وقالى تمام يا استاذ العربيه بقت زى الفل
طلعت على الطريق وقولت اجرب لاقيت الوضع زى ما هو بس فرامل الرجل بقت بتمسك شويه
قولت الامر لله روحت رخصت وبعد الالف كيلو قولت اعمل الصيانه فى التوكيل وبالمره يشوفوا المشاكل بتاعه الفرامل والغيارات
وبعد خمس ساعات لقيت المهندس بيقولى على فكره يا استاذ العربيه فيها الاكس معوج وهيحتاج يتغيير هى وبليه العجله اليمين
لا اله الا الله طيب يا عم انت مقولتليش ليه لما جتلل قبل كده انا كنت مرخصتش وكنت ممكن ارجعلهم العربيه
اتضح لى يا بهوات
انهم خبوا على موضوع الاكس لحد ما ارخص وبقيت غصب عنى لازم استحمل لحد ما يعدى اسبوع لما يوفروا لى الاكس والبليه
عربيه يا عالم لسه زيرو
يغيرلها التوكيل وايرات الغيرات واكس معوج ومفيش فرامل يد وفرامل رجل ضعيفه والعربيه كانت متفككه من تحت ومحتاجه تربيط
منها لله شركه المصريه للسيارات خدعونى وعطونى عربيه فرز تالت واستغلوا ضعفى فى مساله الميكانيكا
ومنه لله التوكيل الى خبى عليا مساله الاكس المعوج والبليه وباقى الاعطال لحد ما رخصت ووقعت الفاس فى الراس حسبى الله ونعم والوكيل
حبيت احكيلكم على الى حصلى علشان الناس تخلى بالهم وتعرف النصب الى للركب والاستغلال الى عينى عينك
|