[Mohamed Elhasafy]

السلام عليكم...
أخيراً و بعد طول إنتظار و بعد ما أخدت البركة من فريدة على فرش الفابريقة قلت كفاية كده بركات أحسن الكراسى هاتنطق من كتر البركة و إستخرت الله و قررت أعمل فرش جلد لساجتى المسكينة
المشكلة كانت إنى عايز مكان شغله ممتاز و مش بتاع إشتغالات و فى نفس الوقت سعره كويس!... المعادلة كانت صعبة جداً..
يعنى الشغل الكويس و بدون إشتغالات سعره هااااى
و السروجى الأمين و اللى سعره حنين شغله شعبى
و الشغل الكويس و سعره كويس موجود فى التوفيقية و لكن لازم تكون عينك فى وسط راسك و إلا هتلبس يا معلم
دورت لغاية ما تعبت فى عابدين و التوفيقية و مدينة نصر و فى الأخر قلت الأمر لله أدفع زيادة ده الواحد ما بيعملش فرش كل يوم لغاية ما عرفت بالصدفة البحتة إليجانس لفرش السيارات و هو ينتمى لأول فئة و لكن السعر معقول جداً و منافس بل يقل عن بعض الأماكن الشعبية
و تعرفت على أ/ أحمد ريان صاحب إليجانس و هو شخصية محترمة جداً و شرحلى وجهة نظره فى تخفيض أسعاره وذلك لأنه يسعى للإنتشار و جاء لينافس بقوة
المهم أنا كنت قبل ما أعدى عليه روحت أشهر مكان للفرش التفصيل و عاينت الخامات و بسرعة طوالى على إليجانس ولقيت نفس الخامات بسعر خيالى و معاه ضمان سنتين ضد فك الخياطة أو تقشير الجلد
توكلت على الله و أخترت الخامات و الألوان و طبعاً عملت نفس شكل الفابريقة علشان لو شيلته ما ألاقيش الفوم الأصلى شكله مشوه و اللى أكد وجهة نظرى إن أستك العراقات اللى أنا مركبها سابت أثر غائر فى الكرسى و لما شافها أ/ أحمد ريان قالى إن نوع الفوم ده ضعيف و ممكن يتشوه بسهولة
الجميل إنى فكيت الكنبة و الكرسى المجاور و مشيت من غيرهم يوم و عديت عليه تانى يوم علشان أركبهم و أفك كرسى السائق و أركب فرشه و أنا واقف
أظرف موقف حصل إنى روحت أغسل العربية فى بنزينة وطنية علشان الفرش يركب على نظافة و كانت العربية من غير الكنبة و لا كرسى المجاور فواحد من العمال اللى هما أصلاً مجندين فى الجيش قاللى: هوه يا باشا إنت اللى معدلها و لا هى جايه كده فابريقة ... فقولتله: لأ أصل الدنيا حر و مش عايز حد يركب معايا!..
المفروض التفصيل و التركيب بيتم فى نفس اليوم و لكنى خليته على يومين علشان كنا فى رمضان و اليوم وقته ضيق
صحيح وقتها كان فى خصم 20% و لحقته على أخر لحظة و نسيت أقولكم إن أ/ على (سروجى إليجانس) ذوق جداً و بيسمعك و ينفذ طلبك و ما بيحاولش يثبتلك إنه عارف كل حاجة و إنت مش عارف حاجة (زى أغلب الصنايعية)
و لو تاخدوا بالكم أنا قسمت اللون الرمادى فى الظهر و ده غير الفابريقة اللى هى حته واحده و عملت كده علشان الظهر يمسك نفسه مع الإستخدام الشاق و ما يريحش و كمان منها شوية حركات
أخيراً عنوانه: 16 شارع الدكتور محمد عوض ... خلف بنزينة شل اللى فى أول مكرم عبيد ... مدينة نصر و ده رقم أ/ أحمد ريان : 0161203070
مستنى رأيكم فى الصور ... السلام عليكم
http://www.facebook.com/media/set/?s...3894026&type=1