اولا باحمد ربنا الف مرة انها مش عربيتى لانى بجد ماكنتش اعرف هاتصرف ازاى لو حصل لى حاجة زى كده لا قدر الله
التوقيت : الساعة 5:20 بعد صلاة الفجر مباشرة
كنت فى ساااااااااااااااااااااااا اااااااااااابع نومة لما لقيت ماما بتصحينى بفزع وبتقولى الحقى فى حرامى فى الشارع
ماحسيتش بنفسى الا وانا طايرة على الشباك ابص اشوف اللى بيحصل ايه
يا ترى عربيتى ولا عربية مين , ومين الحرامى ده , وهايوقفوه ازاى
وصلت للشباك وانا سامعة صوت موتور عربية قوى , طبعا اللى جواه كان طاير عشان ماحدش يلحقه , والناس عمالة تقول حرامى حرامى , قال يعنى حد هايعبرهم وهايمسك الحرامى
الغريب انى قلبى مادقش من الخوف زى المعتاد فى المواقف دى
انا لقيت نفسى باترعش ومهزوزة
العربية اللى اتسرقت كانت من نفس الشارع اللى عربيتى راكنة فيه
كان ممكن بمنتهى السهولة ابص من الشباك مالقيش عربيتى , وماكانش حد هايعرف انها اتسرقت لانى ببساطة ماكنتش هاعرف اصوت مثلا
ربنا يعافينا ويبعد عننا كل شر وسوء
عارفين .. ساعتها لما شوفت اللى حصل اتمنيت ان يكون معايا مسدس افرغه فى الحرامى ولا اضرب به عجل العربية عشان لو الناس كانو مسكو الحرامى بجد كانو هايقطعوه حتت
فين العسكرى بتاع زمان اللى كان يمشى فى الشارع ويقول ( هااااااااا مين هناك )
ياريته يرجع تانى يحسسنا بالامان شوية
بس فى الحالة دى هايكون كل شارع محتاج 5 عساكر على الاقل
المهم ان انا النوم طار من عينى وقال يا فكيك , شكله كان بيجرى ورا الحرامى ولا حاجة
انا قولت احكيلكم على اللى حصل عشان كل واحد ياخد باله من عربيته ويركب لها جهاز انذار
ويرقيها دايما ولا ينسى ذكر الله
حسبنا الله ونعم الوكيل
ربنا يرد لكل اللى اتسرق منه حاجة حاجته ويجازى كل حرامى على فعلته اللهم امين
وربنا يعافينا ويعف عنا
اللهم آمين