السلام عليكم
انا مش متخصص ... بس ممكن اتبادل مع حضرتك المعلومات القليلة المتوفرة لدى
هناك العديد من ماكينات اللحام .. و اخص بالذكر ماكينات لحام الكهرباء
1- ماكينات القوس الكهربى ...
و دى الماكينات الشائعة الاستخدام ... و تعتمد على شدة التيار لعمل حرارة عالية كافية لانصهار سيخ اللحام و كذلك السطح المراد اللحام عليه
و دى ماكينتى للحام ... تعطى من 80 امبير و حتى 400 امبير و محولاتها ( قالبها ) من النحاس
كما توجد انواع عديدة و تختلف فى السعر طبقا لبلد المنشأ و حجمها و الغرض منها .... و من الانواع الجيدة جدا ... لينكولن الامريكى .. او ميلر
2- لحام الميج
و ده اسهل و ابسط نوع لحام كهرباء ... و تقوم الماكينة بعمل تغذية اوتوماتيكية للسلك المستخدم فى اللحام ....
جمال الماكينة دى ان السلك المستخدم فيه اقطار نصف مليمتر .. و ده معناه انك ممكن تلحم صاج سمكه نصف مليمتر فأكثر .. و هى مفيدة جدا فى اعمال السمكرة الخارجية
3- ماكينات التيج
و دى حاجة شبه لحام الاكسجين ... بس كهربا ... يقوم القوس الكهربى باحداث حرارة كافية لانصهار سيخ اللحام الى بتلحم بيه
مميزاتها ... 1- ممكن تستخدم سلك لحام بقطر نصف مم زى الميج
2- بنسة اللحام ملهاش علاقة بمادة اللحام و لا السطح ... بمعنى انك ممكن تلحم بيها حديد ... نحاس ... استنلس ستيل بنفس البنسة ... مع تغير سلك اللحام فقط
عيوبها ... صعبة شوية و تحتاج الى خبرة كبيرة
و بالطبع ... حضرتك مش حتنسى وسائل الحماية من الاشعة الضارة .. و التى تتمثل فى قناع وجه ... قفازات ثقيلة .. حذاء واقى .. و يفضل ملابس او كافر اول مقاوم للحريق
لو حضرتك عندك استفسار اخر انا تحت امرك