[خالدخليفة]

المعالى

اليوم كنت فى قرية صغيرة اسمها المعالى وهى تابعة لمركز منيا القمح بالشرقية وللوصول اليها فيجب ان تمر على بلد أسمها الجديدة ( بكسر الجيم وفتح الدال وتشديد الياء مع كسرها وفتح الدال التانية )
المهم
كان معى احد أصدقائى ..........وكان خائفا جدا لان البلد لها طريقان
الأول / من داخل البلد......... وهو طريق كله ونس ومحلات وناس وغيره
الثانى / وهو طريق الترعة .............وهوطريق مقطوع وضلمة والغيطان على يمينك والترعة على شمالك ولو طلع عيل بخشبة صغيرة هيـثـبـتـنـا وياخد كل اللى هو عايزه
وطول الطريق هوسنى وخرم نافوخى
اعمل معروف ياعم خالد ........أوعى تمشى من طريق الترعة
اعمل معروف ياعم خالد .....بلاش طريق الترعة .....ده طريق مقطوع وممكن نتخطف فيه
ياعم خليها على الله
ياعم انت قلبك ميت .....لكن انا عندى عيال
وانا عندى قطط يعنى ؟؟؟؟
بزهق / ياعم انا بخاف من الطريق اللى هناك ده ............ومش هنمشى من هناك
خلاص ياعم ....مش همشى من طريق الترعة
ثم حين تركت الطريق ودخلت الى اول طريق هذه البلد وجدت ناس واقفة مستنية الميكروباس وهو عبارة عن سيارة نص نقل ومغطاة مثل بوكس الشرطة
ولكن لايوجد هذا الميكروباس (شبيه البوكس )
ووجدت رجل ومعه زوجته ........وأشفاقا عليه وعلى أولاده وقفت واخدتهم معى
ثم مشيت بالسيارة
وفى أول 100 متر تقريبا من الطريق
وجدنا مجموعة من الناس تزيد عن ال 20 شخص تقريبا ومعهم سيوف وسنج وحديد وكل انوا ع الأسلحة وجريوا على العربية وكل الاسلحة موجهة ناحيتنا
وبصوا علينا من جوه واتفرجوا علينا شوية
ثم قال احدهم بزعيق / متجيش من هنا تانى ياقاهرة(نسبة للوحات العربية / ملاكى القاهرة ).......تاخد طريق الترعة
حاضر
وبعد ان تركناهم ضحكت بصورة هيستيرية
هههههههههههه

ولكن صاحبنا بص لى وقال /سيبك منه هو هيحكمنا واللا أيه؟؟؟؟هنرجع غصب عنه

ماشى ياعم ....أيه الشجاعة دى .....انت اخدت حبتين شجاعة واللا ايه ؟؟؟

لكن الراكب معنا هو وزوجته وأولاده القوا بقنبلة على رؤوسنا
فـقال / بلاش ترجعو من هنا لان فى قتيل فى البلد والموضوع كبير....والأحسن ترجعو من طريق الترعة

هههههههههههههههههه
وضحكت على صاحبنا اللى نازل فيا توصيات من الصبح وانه مش هيرجع من طريق الترعة

المهم

ممشيناش 100 متر تانية .......ووجدنا لجنة شعبية تانية
حوالى 50 فرد مثلا وكله ماسك فى أيده سنج وسيوف وشوم وجريو على العربية والسيوف موجهة ناحيتى

سلام عليكم ياشباب

محدش رد
ولكن احدهم قال / م تجيش من هنا تانى ياقاهرة.........امشى من طريق الترعة
حاضر
وصاحبنا .....هيموت من الغيظ
ومفيش 100 متر كمان ووجدنا تجمهر ضخم .......يعنى مثلا مجموعة لاتقل عن 100 شخص وكلهم مسلحين كالعادة
ثم نفس الجملة
متجيش من هنا تانى ياقاهرة

والغريبة انى فى كل مرة كأنى داخل على كمين .....فأجد السيارة مجبرة ان تدخل عليهم على شكل حرف S وفى أحدى المرات كانت هناك شجرة مرمية بعرض الطريق
ومرة أخرى سيارة قديمة بعرض الطريق
وفى كل مرة لايفسحون الطريق الا بعد النظر داخل السيارة
ثم الجملة الشهيرة التى تحرق دم صاحبنا
متجيش من هنا تانى ياقاهرة
هههههههههههههههه
وصاحبنا متغاظ
وفى كل مرة بعد الحبتين دول يوسعوا لنا الطريق ماعدا المرة بتاعة السيارة القديمة ........اجبرونى على النزول اللى الغيط ثم الصعود مرة أخرى الى الطريق
المهم
بعد عدة كماين كتيرة .......وصلنا البيت المقصود
وهناك
صديقى / أيه ياعم حالة الحرب دى ؟؟؟؟؟؟
قريـبه / أبدا ......واحد من منيا القمح له فلوس عند واحد من بلدنا و...جه ياخدهم منه ...وهما بيتكلموا مع بعض علوا صوتهم .....راح بتاع منيا القمح طلع طبنجة من جيبه وضربه بيها

انا باندهاش / أيه ده ؟؟؟؟ ومات الراجل ده ؟؟؟
طبعا .....وأهل البلد دى راحوا البيت عند الواد القاتل ولما مش لقوه ....راحوا خطفوا أبوه وأخوه وعلقوهم على شجرة ومستنيين حد ييجى يسأل عليه

أنا / يانهار أبيض ..... والحكومة فين ؟؟؟؟
الحكومة هتعمل أيه يعنى ......ده الناس معاها سلاح أكتر من الحكومة

وبعد أن انتهت الزيارة

انا لصديقى / ها ......تحب نمشى ازاى ؟؟؟؟
بـيـأس ونبرة صوت مهزومة / هو فى غيره................طريق الترعة
هههههههههههههههه........م اااااشى
وعدنا الى القاهرة
لكن فعلا طريق البحر مقطوع وضلمة وطول م انا ماشى عليه وصاحبنا مرعوووووب الى أن خرجنا على طريق منيا القمح ثم الى القاهرة