رد: محاولة شراء سيارة أنتهت بالفشل
الحمد لله يا جماعة أنا أشتريت عربية النهاردة من سوق السيارات اللي في العاشر، وده اللي حصل معايا بالضبط....
النهاردة يوم الاحد 1-1-2012 اتصلت بالسمكري الصبح بدري وأتاكدت عليه أن أحنا هنروح السوق حسب اتفاقنا السابق، ورحت للسمكري الساعة 11 تقريبا وأخدنا معانا بوهيجي عربيات (شفت في موضوع سابق ان واحد بينصح ناخد معانا بتاع بوهية عشان هو اكتر واحد بيفهم لو كانت العربية راشة أو لا) وعرفت قد إيه البوهيجي مهم جدا عشان كان بيعرف بكل سهولة الحتة اللي رشة، المهم، وصلنا السوق تقريبا مع أذان الضهر،وأول ما دخلنا لاحظت أن التجار تقريبا هما اللي مسيطرين على السوق، بس فيه ناس بتبيع عربياتهم لوحدهم وده كان قليل جدا، وانتو عارفين انا كنت بدور على فيرنا أقل موديل 2008، وطبعا شفنا عربيات كتير، في منهم فيهم شغل في الحوض ومرشوش بنضافة يعني عايز واحد خبير عشان يكتشفهم، والعربيات النضيفة سعرها مبالغ فيها، بس طبعا فيه اللي عايز يبيع فعلا وده اللي كنا بندور عليه، المهم انحسر اختيارنا بين عربيتين 2008 الاول طلب 48.5 والتاني 50 والاتنين تكيف وباور بس عشان العربيات النضيفة الكاملة بيطلبوا مش أقل من 54، وطبعا العربية أم خمسين كانت أفضل، المهم وصلنا مع الاول لغاية 47، وبعد كده قلنا نشوف التاني هنوصل معاه لكام، وصل لغاية 48 ومش عايز ينزل جنيه ومشينا من عنده على كده ولما لقيت أنه مش راضي ينزل عن كده لفيت لفة ورجعت له تاني واتكلمت معاه تاني وقلت له 47.750 بدل من 47.500 ورفض برضه لغاية زودت له 50 جنيه بالعافية، وأحب أقول لكم البايع ده كان تاجر والعربية عليها توكيلين، والعربية الاولانية كانت بدون توكيل والرخصة بأسم صاحبها، بس أنا استريحت للعربية اللي عليها توكيلين، أعمل إيه دلوقتي؟ وطبعا كان معايا الفلوس كلها بس كنت عامل احتياطات جامدة جدا عشان الفلوس متتسرقش، يعني بصراحة كده بدون كسوف لفيت الفلوس على وسطي وربطها جامد جدا وطبعا فلوس أوراق كبيرة فئة المتين جنيه ومكانتش باينة خالص، حتى الناس اللي معايا مكانوش يعرفوا الفلوس معايا ولا مش معايا، روحنا على الشهر العقاري على طول اللي في السوق، وعملنا عقد مسجل على طول واللي معايا يقوللي أعمل توكيل وانا اقول لا عقد مسجل والحمد لله سجلت العربية باسمي وخلصت واستلمت العربية واتاكدت ان كل حاجة تمام، أنا حبيت اقول لكم على كل حاجة حصلت عشان تكون تجربة يعرفها كل اخواتنا في المنتدى، وانا هعمل موضوع بنفس الرد ده عشان كل واحد عايز يشتري عربية من سوق السيارات يقرأه الأول وشكرا لدعائكم ليه، ألف شكر
|