[احمد سويلم]

(( اخرة خدمة الغزّ ....... علقه ))

هكذا بدأ صديقى حديثه الرائع عن قصة حياته البائسه
اعتقد اننى قد حكيت لكم من قبل عن الثائر المناضل سيد فرخه
وصديقى بدون التطرق لأسماء بعينها ضابط مباحث محترم برتبة مقدم
لديه رصيد يقترب من عشرين عاما من الخدمه فى وزارة الداخليه
عمل فيها بأكثر من مركز وقسم ومديريه
فى دلتا مصر وصعيدها ...وفى قلب العاصمه
كان عائدا من عمله بأحد مراكز الجيزه الى منزله الكائن بشارع قصر العينى
ومن مبهجات القدر ان يرى منظر ما بعينه يجعله يتصل بى ليسمعنى اصوات حيوانات مختلفه.... ذكر الجاموس الوحشى ليس اولها والخنزير ليس اخرها
قابلنى البيه رئيس المباحث الذى طالما تورطت معه فى حوارات ونقاشات مطوله حول تجاوزات جهاز الشرطه وقمع الحريات والفتك بالمدنيين العزل وسحل المعارضين الخ ..... من بلاوى جهاز الشرطه
سأقوم فقط بفلترة بعض الالفاظ التى تخدش الحياء العام والخاص
وسأحاول ان اكون امينا قدر المستطاع فى نقل كلماته كما هى
بدأ كلامه قائلا

(( وانا مروّح لقيت فى الشارع عندى مظاهره ... تعمل الفين تلات تلاف بنى ادم
مظاهره حاشده هائجه مائجه متجهه الى وزارة الداخليه
يتقدمهم محمولا على الاعناق الثائر المناضل سيد فرخه
سيد فرخه ... بيقود مظاهره فيها افنديه كتير من عينتك وناس شكلها محترم ونسوان لابسه من تيمبرلاند كمان
سيد فرخه يا عمى مسجل خطر ..... جرايم نفس
انا شخصيا جيبتله امر اعتقال فى 98 وانا معاون مباحث الوايلى
سيد الوقتى بقا الثائر المناضل وبقا البطل الشجاع وبقا صمام امان الشعب
وانا تعليمات الوزاره اطّنش وانفّض وما احتكّش بحد علشان الناس مش ناقصه
سيد لو جه بكره على القسم عندى ومعاه عشرين تلاتين راجل من المرج ولّا من عزبة النخل علشان يقتحم القسم ويفك الحجز ويسرق السلاح كمان ,, هيلاقى ميت واحد يقف معاه فى مظاهره ضد الطاغيه رئيس مباحث القسم
ولو انا ضربت عليه نار زى ما القانون بيقول علشان احمى المنشأه اللى بشتغل فيها والسلاح اللى حالف عليه
هبقا مجرم من قتلة الشهداء .... ولو المحكمه برأتنى النائب العام هيطعن على الحكم علشان السوايسه قاطعين الطريق او علشان العيال اللى نايمه فى التحرير
لو سيبت القسم وهربت هبقا الضابط الجبان اللى ساب القسم للمجرمين ونرجع نغنى ... الشرطه هربت
وطبعا فتحت الزنازين اللى عندى وخرجت السوابق اللى فيها على الناس
على اعتبار انى لما افتح الحجز ...... اللى جوا هيطلعوا ياخدونى بالحضن
ولو كلمت الجيش هيقولولى دافع عن نفسك لحد ما نبعتلك حد ... ولا سيد فرخه واللى معاه معاهم سلاح وانت ورجالتك معاكوا مسدسات ميه
ولو سيد بقا ربنا كرمه ودخل دبحنى فى مكتبى
خبر فى المصرى اليوم ... مكافأه ومعاش للعيال
صورة لييا بالميرى ... ولمراتى وامى وهما بيولولو علييا

اى صنف ملة دكر فيكى يا بلد يقولى اعمل ايه ؟؟؟؟؟؟
دا انا خايف اروح فى يوم بيتنا الاقيهم غيروا اسم الشارع من قصر العينى لشارع الثائر المناضل سيد فرخه
فجأه كده يا سبحان الله بقا الظباط اوسخ خلق الله
اقصد طبعا اللى بقو ظباط
انما الميتين تلتميت الف اللى راحوا يقدموا فى كلية الشرطه وما دخلوش دول ناس محترمه
فجأه كده بقا الظابط هو اللى مسئول عن كل بلاوى البلد ... وكان البلد ماكانش فيها غير ناس نضيفه وظباط شرطه

اضحكك .... والله لأضحكك
انت ابن حلال وتستاهل تضحك ... الواد عمرو اخويا العيد اللى فات كلمنى يوم الوقفه وقالى تخييل ولاد الو... هيقعدونى فى المستشفى نبطشى اول يوم العيد ... فى شرع مين اقضى اول يوم العيد فى المستشفى ؟؟؟؟
مابقيتش عارف اقوله ايه
انا اللى عمرى ما قضيت اى عيد اصلا فى بيتى
لدرجه ان الواد ابنى فاهم انى بخاف من الخروف ..... عشان كده ما بجيش البيت الا بعد العيد بيومين تلاته

فى شرع مين يقعد الدكتور فى المستشفى اول يوم العيد ؟؟؟؟؟؟
حاسس بكمية ظلم غير عاديه انه هيقعد اول يوم العيد فى المستشفى , مع انه هياخد عليه فلوس اد كده علشان شغال فى العيد
طيب فى شرع مين بقا انا عمرى ما قضيت عيد فى بيتى وسط عيالى من يوم ما اشتغلت فى الداخليه ؟؟؟؟
وببلاش , انت عارف احنا مرتباتنا عامله ازاى
وعارف ان اللى مدخل ولادى مدارس خاصه امى
وعارف ان اللى بيدفع اقساط عربيتى لحد الوقتى ابويا
وعارف ان مرتبى ما بيكفيش عشر ايام فى الشهر
انا ما اخدتش من الداخليه غير كلمة باشا
وانا رايح ..., وانا جاى
اتفضل يا باشا ....

فى شرع مين يا محترم ابقا خدمت عشرين سنه وما حصلتش 3000 جنيه مرتب وغيرى بتاع العلاقات العامه ولا بتاع الكهربا بيبقا اصغر منى بخمس ست دفع وبياخدلوه بتاع 20 25 الف جنيه ؟؟؟؟؟
بتاع ايه يعنى ؟؟؟؟؟

انا معاك ... الثوره عمرها ما هتبقا ثوره بجد الا لو دبحت حد ... ومش هتلاقى اسمن من ظباط الشرطه
بس مين بقا فى الظباط ؟؟؟؟؟؟
الرجاله اللى نزلت تأمن منشات البترول فى السويس لقوا نفسهم فى محكمة الجنايات ؟؟؟؟
ولا ضباط المباحث اللى وقفوا فى سطوح الاقسام يحموا اقسامم وسلاحهم من البلطجيه ؟؟؟؟؟
ولا بتوع الامن المركزى اللى لقوا نفسهم تالت يوم ثوره من غير قياده ؟؟؟؟

يعنى هى البلد كانت خربانه وعدمانه علشان الشرطه ؟؟
واحنا اللى حرقنا القطارات ... وسرطننا الاكل .. وهربنا الاثار ... وخربنا المستشفيات وبعنا الغاز لليهود ؟؟؟؟
احنا يا عمنا اللى وسخنا الميه وخليناكو تشربو مجارى ؟؟؟؟
احنا يا سيدنا اللى غرقنا العباره ولا احنا اللى خدنا فلوس الناس وخلعنا على برا ؟؟؟؟

يعنى التعليم والصحه والاسكان والمواصلات والاكل والشرب والعيشه كانت زى الفل وولاد الو... بتوع الداخليه هما اللى كانوا منغصيين على البلد عيشتها
عشان كده عملتوا ثوره علينا ؟؟؟؟؟

احنا اللى كنا بننتهك حقوق الانسان ؟؟؟؟؟؟؟
دا احنا كنا عايزين حد من بتوع حقوق الحمير يجى يشوفلنا حقنا
يا راجل دا انا كانت بتفوت علييا ايام بشتغل فى اليوم الواحد 18 ساعه ......!!!!! وبعدها انزل تانى يوم الشغل عادى جدا
انا الموظف الوحيد فى الدوله اللى مالوش بند انتقال فى مرتبه
يعنى الدوله بتقولى تعالى اسوان
خدمتك فى اسوان
وبس
انا بقا جاى من مصر من اسكندريه من الواحات
مالهاش فيه

اضحكك تانى ؟؟؟؟؟
مش خساره فيك

كنت منتدب فى خدمه فى شرم الشيخ ... واستراحاتنا فى مكان يبعد عن الخدمه حوالى 70 كيلو
والطريق اصلا مافيهوش رايح ولا جاى
كل نص ساعه تعدى علينا عربيه
وانا الكام ظابط بنيجى بقدرة ربنا .... بس بنقعد ساعتين تلاته بعد الخدمه علشان نعرف نرجع
وكان فى خدمة كلاب معانا ...
كلاب بوليسيه معانا فى الخدمه
عربيه بتجيبها وعربيه بتوديها
عربيه مكيفه .... واخر منجهه
قام احد الساده الزملا اقترح علينا نطلب من المفتش اننا - بعد اذن الكلاب طبعا - نرجع فى عربية الكلاب
هى كده كده راجعه لحد البلد
قالنا اكتبوا طلب .... كتبناه
عرضه على السيد مدير الامن .. ورد علينا بخطاب مكتوب فيه
(( لا مانع .., مع مراعاة عدم تجاوز خط سير الكلاب ))

*** يجب ان اشير هنا الى اننى انفجرت ضاحكا لمده ليست قصيره وسمعت وابل من السباب لا داعى لذكره ***

انت عارف انى بعد ما قريت الورقه اللى فيها رد المدير .... فكرت جديا انى استقيل ؟؟؟؟؟؟
ما تنساش ان انا ابن ناس برضه يعنى ....
يعنى لو وصلت لحد كده .... امشى بكرامتى احسن
بس خبطت فى الواد والبت ...... هياكلوا منين ؟؟؟؟؟
مش هقولك هيتعلموا منين ... امى وابويا اللى شايلين بند التعليم زى ما قلتلك
التعليم واشتراك النادى وتجديد الرخص واحيانا المصيف كل سنه

طيب انا هقعد فى البيت اعمل ايه ؟؟؟؟؟
ما هو ظابط المباحث لما يسيب الخدمه بيبقا عامل زى السقا فى بلد دخلتها المواسير
الشىء الوحيد اللى بيعرف يعمله .... ماعادلوش لزمه

وماتقوليش محامى الله يسترك
انا ما اعرفش عن القانون غير ذكريات ضبابيه لأيام مواد الحقوق بتاعت الكليه
يا ابنى حرام عليكو ..... سيبونا فى حالنا بقا
انا اللى بقف فى كمين 8 ساعات وأرجع على خدمة مطش 5 ساعات واروح اقعد فى القسم تلاته اربعه كمان ... اجى ارووح الاقى اللى بيقولى ...طيب انزل هاتلك حكمين تلاته قبل ما تمشى

انا اللى بتكلم فى التليفون علشان الشغل بنص مرتبى ...
لو ما اتكلمتش الشغل هيقف
ولما تتكلم ما تستناس بدل من حد

الوزاره اعلنت عن شاليهات فى شرم الشيخ
مساحه الشاليه 100 متر
مقدم 100000 جنيه
والباقى اقساط
3000 كل شهر !!!!!!!!!!!
انا بس كان نفسى لما قريت الاعلان ده اسأل السيد الوزير
هو الاعلان ده للظباط برضه ولا لنادى القضاه او مثلا للعاملين بقطاع البترول
يعنى لو فرضنا اصلا ان فى 100000 الف جنيه
اجيبلك تلات الاف جنيه كل شهر منين يا ابن الم ..... ؟؟؟؟؟؟؟
صحيح
ماهو الوزاره دى فيها ناس بتقبض نص مليون جنيه فى الشهر
وفيها ناس بتتعالج فى باريس على نفقه الدوله
وفيها ناس مشاركه فى قرى سياحيه فى الساحل

لما تيجى تنضف وزارة الداخليه بقا دور على دول
دور على جهاد يوسف وعدلى فايد واسماعيل الشاعر
مش على معاون مباحث الصف اللى قتل اتنين بلطجيه بعد ما ضربوه بخرطوش فى رجله
مش على عربية القسم اللى بتودى عيالى المدارس
لاء
شوف اللى عنده خمس عربيات ملاكى علشان تجيب الخضار للهانم
شوف الظباط اللى ما راحتش الصعيد ولا تعرف فين سكته مع انهم فى الوزاره من سنه 70
شوف اللى تقاريره كلها امتياز .... وعنده بدل الحافز عشره وهوا نايم اصلا فى مكتب مكيف فى الوزاره
شوف الظابط اللى عمره ما نزل الشارع اصلا وفجأه لقى نفسه لوا

ولو عايز تتكلم على الرشوه مثلا اللى فى الوزاره
تفتكر الرشوه دى فى وزارة الداخليه بس ؟؟؟؟؟؟
يعنى الداخليه واقسامها واداراتها بس هى المكان الوحيد اللى الناس بتضطر تدفع فيه رشوه ؟؟؟؟؟
وانت فى الجمارك مثلا ما بتدفعش رشوه ؟؟؟
فى الاحياء .... فى المصالح الحكوميه .... فى السكه الحديد
فى اى خر.... فيكى يا مصر مافيش رشوه ؟؟؟؟؟

يا ابنى .... وزارة الداخليه هى المكان الحكومى الوحيد فى مصر اللى ممكن يجريك زى الحمار 25 سنه وبعدين يقولك ...
كفايه كده عليك اقعد فى البيت
مستغنيين عن خدماتك
فى اى مصلحه تانيه انت شغال غصب عن عين ام البلد لحد سن الستين
الا عندنا
ممكن تبقا لسه 45 ويقعدك فى البيت
ويرميلك ملاليم كل اول شهر علشان ما تموتش من الجوع

كان فى راجل الله يرحمه بقا اشتغلت معاه اول ما اتخرجت
قالى الداخليه دى بتفضل تقلعك هدومك يوم بعد يوم ... لحد ما تخليك عريان ملط
تقوم ملبساك الجلابيه

لو كان فى ظابط فاسد اكيد قدامه تلاته اربعه نضاف
بس الناس مش عايزه تشوف غير الفاسد
ولو كان فى ظابط محترم .....,الناس بتدوورله على اى عيب .... علشان ما تقولش ان فى ظابط محترم

احنا اتمسكنا بايد وسخه
واتحكمنا بناس وسخه
لكن 99% من ظباط الوزاره ناس عاديه جدا
زى اى حد
لا هم ملايكه ولا هم شياطين
بنى ادمين ... فيهم الحلو والوحش
فيهم ابن الحلال وفيهم ابن الش.... , زى اى ناس عاديه
ولو كان اى حد اتحط مكاننا يمكن كان عمل بلاوى زرقا ما يعلم بيها الا ربنا
بدل ما تدبحوا الشرطه .... هاتولنا حقنا ضمن الخلق اللى عايزين تجيبوا حقهم

ادينى يا عم مكان نضيف اشتغل فيه وساعات عمل ادميه وامكانيات اشتغل بيها ومرتب يتماشى مع البهدله اللى بتبهدلها
وتعالى حاسبنى حساب الملاكين على حقوق الناس

ما ابقاش انا شغال 16 ساعه فى قضايا ومصايب وجنايات ... زهقان وكفران وطلعان .... امى
وعايزنى ابقا مبتسم بشوش الوجه مصفف الشعر لواحد جايلى سايح فى دمه عشان يعمل محضر فى مراته اللى كلته علقة موت ؟؟؟؟؟؟
الرحمه حلوه برضه
هاتوا يا عم موظفين استقبال بتوع فنادق يقعدوا فى النبطشيات يقابلوا الناس بابتسامه حلوه واحنا نشوف شغلنا
سيبنى اشوف شغلى علشان اعرف اجيب نتيجه كويسه فى دايرتى
ما تقوليش اعامل السوابق والمسجلين ازاى مثلا ......
انا ادرى بمعاملة الناس دى
وما تقوليش دول مهما كان بنى ادميين
علشان لو واحد منهم اصطادك انت ومراتك او انت واختك ..... او حتى انت لوحدك
هتعرف انه مش بنى ادم ولا حاجه
بس هتيجى تعيطلى بعد لا مؤاخذه ما يكون ........ اللى حصل حصل يعنى

المثل البلدى بيقولك ادى العيش لخبازه ... لو هياكل نصه
علشان دى صنعته
وما تقوليش حقوق انسان ومش حقوق انسان
اول حق من حقوق الانسان انه يبقا امن على نفسه وعلى ممتلكاته ... وانا لما امسك واحد بيروع الناس او بيسرق حاجتهم يبقا ده هوا اللى نفى عن نفسه صفة الانسانيه وحرم نفسه من حقوقها
وبعدين يا اخى ما تشوف العيال بتوع التحرير لما مسكو بلطجى عملوا فيه ايه ؟؟؟؟
ما عرضهوش على النيابه يعنى وهى بقا تدينه او تخلى سبيله
ده عملوا فيه اللى ما اتعملش فى عماد الكبير
حلال على العيال اللى مالهومش صفه ... وحرام على الظابط اللى دى شغلته ؟؟؟؟؟

هات كام شاب كده من اللى فى التحرير دول ...
ارميهم فى كمين او تمركز فى الطريق الاوسط فى سينا ...من غير ميه ومن غير اكل
وخليهم يشوفوا المناظر اللى بتعدى هناك
وبعدين هاتهم يتكلموا على حقوق الانسان

يا سعادة الباشا ... احنا هنضحك على بعض
البلد مليانه بلطجيه ومجرمين وشمامين وبلاوى سودا
لما تبقا تعلم الناس دى وتديهم بيوت وتأكلهم وتشربهم زى الناس وتخليهم بنى ادميين
ابقا اطلب منى اعاملهم معاملة بنى ادميين

والله لو اتعدل حال مؤسسات الدوله ... احنا مش هنبقا عجبه وسط الناس ... اكيد هنتعدل
لو حد حس اد ايه احنا مظلومين ...
ولو الناس تعرف كمية الظلم والقهر والكبت اللى عند الظباط والامنا والافراد فى الشرطه
يعذرونا فى كل اللى اتعمل
وبعدين من امتى وفين فى الدنيا الناس بتحب الشرطه
طول عمر رجل الامن مش هقول مكروه
بس على الاقل مش محبوب
مش الشخص اللى شعبيته مكسره الدنيا يعنى
عشان هوا اللى بيسجن وبيحبس وبيعاقب وبيدففع الناس غرامات
ماهو انا عصاية القانون
والناس جبلت على كره العقاب حتى لو تستحقه
ونا اداة العقاب ......
الناس تحبنى ازاى بقا ؟؟؟؟؟؟؟؟
الناس ممكن تحب الدكتور ... المهندس
مندوب المبيعات الرزل لو بيديهم عينات
انما الظابط ...... هتحبه ليه
ده لو اتسرق منهم حاجه والظابط جابهالهم برضه هيبقا الشخص اللى بيفكرهم بالسرقه اللى حصلتلهم
الظابط كده كده مكروه يا ريس
فى اى حته فى الدنيا

قالها ..... واشعل سيجارته العشرين ونفث دخانها بضيق وهو يهز رأسه ثم ابتسم فجأه وبدون مناسبه وقال

(( رضينا بالهم .... والهم مش راضى بينا يا عم الحاج
تيجى ننزل نتعشى فى الحسين ......؟؟؟؟؟؟))

وانتهت الفضفضه التى نقلتها تقريبا كما قيلت
وهذا لا يعنى اننى مقتنع بكل ما جاء فيها او رافضا لكل ما جاء فيها
لكنها كانت صادقه فى كل حرف منها
على الاقل من وجهة نظر قائلها
فالانسان عندما يحتاج الى التنفيث عما يدور بصدره وبعقله من مشاكل ومتاعب ومصاعب يواجهها ليل نهار
لن يحتاج للكذب او للتلفيق

وما حاجتنا اصلا للكذب ها هنا
انها مجرد فضفضه
... فضفضة ظابط شرطه