مرة فى نوبتشية كنت بلعب شطرنج مع صاحبى ده و كان واحد صاحبنا تالت بيتفرج علينا و فجأه سألنا
هو يا جماعة ايه اصل الشطرنج ؟ يعنى الى اعرفه عن الطاولة ان القواشيط البيضة رمز النهار و السودة رمز الليل فالشطرنج اصله ايه ؟
فانا رديت عليه
و الله اعلم الى اخترع الشطرنج واحد هندى و ملك الهند ساعتها اتبسط منه اوى
و قال له اطلب الفلوس الى انت عايزها
الراجل قال له لأ مش عايز فلوس انا عايز رز
الملك قال له رز ايه ياجدع انت بس
الراجل قال له عوازك كل يوم تحطلى رز كالاتى
اول يوم تحط رزه واحدة فى اول خانة
تانى يوم رزتين فى الخانة التانية
تالت يوم 4
و بعدين 8
16
32
64
128
و هكذا حتى اليوم ال 64 بتمام الخانات (عدد خانات رقعة الشطرنج)
فطبعا الملك وافق على هذا الطلب السهل لان مفيش اكتر من الرز
المهم الملك جه قبل الاواخر و طير رقبة الراجل
لان خزانة الهند من الرز مكفتش
و هنا صاحبى الى بيلعب قدامى معجبوش الكلام و قفش
(بغض النظر عن صحة القصة تاريخيا هو كان اعتراضه حسابيا)
المهم انا عمرى ما حسبتها بس كان دفاعى انها متتالية هندسية و قولتله متضمنش يا باشا الارقام حتوصل لأيه
صمم و قفش و راهنى على عربيتى قصاد الرز
و انا طقت فى دماغى و ندهنا الواد الساعى راح جبلنا كيلو رز طبعا فشلنا نعده (و الواد قاعد يبصلنا و اكيد بيقول فى سره ايه ولاد المجنونه دول بيهببوا ايه)
فقسمنا الكيلو على اربع كبيات و كمان عدينا ربع كباية و فى الاخر ضربنا فى 16 طلع تقريبا 80 الف رزه فصاحبى قفش و قال لى 100 الف قولتله مش حتفرق و اتفقنا ان الكيلو فيه 100 الف حبايه و كان اياميها الكيلو ب 2 جنيه
و صاحبنا التالت بتاع الطاولة لقيته بيميل عليه و يقوله لو كسبت عايز الكاسيت بتاع عربيته
(يا ابن اللاذينه بتورثنى بالحيا - طبعا بنهرج -)
المهم
صاحبى مسك الموبايل و قعد يضرب 2 فى 2 فى 2 فى 2 .......
طبعا الموبايل مكفاش زى ما توقعت و راح مطلع ورق و قعد يكمل يدوى و انا بحاول اقنع فيه ان بكره الصبح فى ثانية حضربها على الاكسيل
بس مفيش فايده قعد يكمل يدوى لغاية لما كبس عليا النوم روحت حسبت الخانة الى وصلها (قسمت عدد الرز بتاع الخانة الى وصلها زائد جميع الخانت من الاول على 100 الف طلع لى كام كيلو و ضربتهم فى 2 جنيه ) طلع تقريبا 290 الف جنيه
فانا اتطمنت و روحت نمت و هو اتكبس و برضه قعد يكمل
المهم تانى يوم الصبح عملتها على الاكسيل و طلع المبلغ 368 تريليون و 945 مليار و فكة بالملايين
مش عارف اجيبهم منه ازاى
