[MaXx]

الموضوع عايز اتناقش فيه معاكم لاني محتاج افهم منكوا ,,,و محتاج اعرض اللي انا فاهمه و تفكيري

اولا ده اقتباس من رد ليا في موضوع تاني في المنتدي ,,,

كان كلام مفتى الجمهورية في موضوع التقسيط والربا ,,, ان الربا حرام ,,,و لكن بعض التعاملات تخرج عن كونها ربا للاسباب التالية : و ده اللي فهمته : الربا حرام لانها تعتبر استغلال لحاجات الناس الضرورية ,,, يعني المسكن و المأكل والمشرب و العلاج ,,, دول الحاجات اللي الانسان ما يقدرش يستغنى عنهم ,,, بكده لو حد استلف فلوس لقضاء حاجة اساسية من دول ,,, لازم لما يرجع الفلوس ترجع بالظبط زي ما اخدها ,,, نفس القيمة ( يعني تقاس بالذهب لان قيمته ثابتة عكس الفلوس الورقية اللي قيمتها بتقل و بتزيد ) ( يعني ممكن تاخد دلوقتي 100 الف جنيه ترجعهم بعد 10 سنين ممكن تكون قيمتهم اقل من 100 الف النهاردة و ممكن تكون اعلي ,,, علشان كده المفروض القيمة تقاس بالذهب و خصوصا لما يكون الاجل طويل ) انما واحد بيعمل استثمار و بيفتح شركة ,,, او بيشتري شقة جديدة ( غير بتاعته ) من الاخر اي حاجة تضيف لرأس ماله ,,, ( منهم شراء سيارة ) كل ده اضافة لرأس المال يعني استثمار ,,, هنا اللي بيديك الفلوس بيديهالك مش علشان بيسد حاجة ليك ,,,لا بيدهالك علشان يشغل فلوسه عندك ,,, ممكن بعد فترة تبيع الشقة و تكسب في سعرها ( بس كقيمة المفروض انها ثابتة ) و ممكن برضو بعد فترة تبيع العربية و تخسر في سعرها ( بس كقيمة المفروض برضو انها ثابتة ) ... بعيدا بقي عن كلام المفتي ,,, انا دايما بحس ان الدين عندنا سهل الفهم و مش معقد ابداً ,,, حسيت ان الكلام فيه منطق كبير اوي ,,, يعني لو محتاج تعمل علمية حقك تاخد قرض من غير اي فايدة و ترجع قيمة الفلوس زي ما كانت بالظبط ,,, و ده بينطبق علي المسكن الاساسي اللي من غيره تعيش في الشارع ,,, انما بتفتح شركة ولا مصنع ولا اي حاجة بتكسب ,,, او بتزود الاصول بتاعتك بشقة زيادة ولا عربية ( مش هتموت لو ما جبتهاش ) اللي بيديك الفلوس بيبقي المفروض متوقع منك انك تشغلها في حاجة بتكسب و بالتالي بتديله جزء من مكسبك ,,, لان في اصل منتج ,,, زي الشركات و الاستثمار ,,, و في اصول غير منتجة زي شراء العقارات و السيارات مثلا ,,, و لما بتاخد قرض بغرض الاستثمار انت بتختار ان الاصل اللي هتشتريه يكون منتج او لا و هنا لو اللي بيفتح شركة خسر ,,, بيكون مدين ليك برضو بالفلوس ( لانه المسئول عن ضياعها ) بس انت مسئول عن خسارة الارباح طبعا ... و ده اللي بيخلي في دراسات جدوي علشان نقيم المشروع ده هيكسب ولا لا ,,, و ده برضو يخليني افكر و اقول ان النسبة الثابته علي الفوائد بتاعة القروض فيها ظلم طبعا ,,, يعني لان اللي بيكسب 10 كده زي اللي بيكسب 100 زي اللي بيكسب 1000 زي اللي بيكسب منفعة شخصية في شراء شقة او سيارة !!! المفروض تكون نسبة العائد علي المنفعة الشخصية اقل بكتير من الموجود ,,, و تكون العوائد علي ارباح الشركات و لما الربح يقل العائد ,,,و يزيد يزيد معاه العائد ,,, و احب اقول برا مصر في الدول الاجنبية مثلا ما تتحبسش لو اخدت قرض و ما دفعتوش ما تتحبسش يعملوا اعادة جدولة للقرض و بيتصرفوا بطرق تانية غير السجن ,,, بس علي الرغم من اننا مسلمين و مسيحين في مصر متدينين بحس ان الموضوع لو اتعمل كده مصر كلها هتاخد قروض وتضرب عليها ptmnlo123per111 ده اللي انا فاهمه بصراحة ,,, بصراحة متناهية كمان ده انا شايف انه متناسب مع المنطق و الدين كلامه كله عين العقل زي ما بيقولوا ,,, انا مقتنع بالكلام اللي انا كتبته بس اعتقد ان في ناس كتير اوي هتعترض علي كلامي ده ... ptmnlo123per144

علي الجانب الاخر بقي

اي اضافة لاصل المبلغ المقترض تبقي ربا ,,,

من هذا المنطلق مفيش حاجة هيبقي اسمها قسط لاي تاجر ( تاجر مقاول معرض اي حد بيبيع علشان يكسب و ده مصدر رزقه ) و الاسباب هتبقي كالتالي ,,,

لنفرض اني تاجر و برأس مالي اشتريت عدد من السيارات او بنيت عمارة

و هبيع بالقسط بدون طبعا اي زيادة علي اصل المبلغ ,,,

و القسط متوسط المده هنقول 3 سنوات ,,, ( علي الرغم من ان اغلب الناس بتقسط 5 سنوات في السيارات و لحد 10 سنين تقريبا في العقارات ,,,

يبقي انا مش هلم اصل المبلغ قبل سنة و نص علي الاقل ( اصل المبلغ مش المكسب )

طيب و بسأل ليه علي اصل المبلغ اللي استثمرته ؟

علشان دورة رأس المال ,,, اني اشتري و ابيع ,,, او انتج و ابيع ,,,

كده دورة رأس المال تقف ,,,

و الربح يقل ,,,

دورة رأس المال في العقارات مثلا هي الفترة ما بين بداية ما ابني العمارة ,,,و اني ابيع الشقق كلها ,,,

و في السيارات الفترة ما بين اني اشتري العربيات من برا ,,, و ابيعها كلها ,,,

_________________________ ____________________

بعيدا عن موضوع الربح اللي هيقل ,,,

ليه انا كتاجر ابيع بالقسط ,, و الله لو ما معكش فلوس سلعتي ما تشتريش ,,, ما يبقاش معكش فلوس و رايح تتأنتك و تجيب عربية اغلي بكتير من الفلوس اللي معاك ,,, او شقة تمليك غااالية و انت مش معاك ,,,

يا سيدي اركب المواصلات ,,, و اجر شقة ,,, ولا هو انت اقرع و نزهي ؟!

( يا ريت محدش يحس اني بهاجم )

ده كلام التاجر لانه عايز يكسب ,,, طبعا

من الاخر ,,, مش هيبقي في تقسيط الا لو بتشتري من واحد مش لازماه الفلوس دي دلوقتي ...

يعني تقوله هشتري دي و هبقي اديك الفلوس بالقسط بدون اي فائدة ,,, و هيقولك ماشي لسبب واحد بس ,,, انه مش محتاج الفلوس دي دلوقتي ,,,

انما مجال زي العقارات و السيارات علي سبيل المثال ( و ده هينطبق علي كل انواع التجارة اللي كل ما تزيد سرعة دوران رأس المال يزيد معاها المكسب )

دورة رأس المال تقف او تطول ,,, و ده يخلي التاجر يقولك روح ,,, و علي قد لحافك مد رجلك ,,, ما اقدرش الومه و اقول انه جشع لانه بيقولك ,,, متجيبش حاجة غالية عليك ,,, حوش الفلوس و ابقي تعالي لما يكون معاك تمن اللي ببيعه...

_____________________

منظور اجتماعي ,,,

مين مرتبه يخليه يجيب عربية بعد كام شهر بس من بداية ما يشتغل ( انا بتكلم علي الغالبية العظمي طبعا ) المرتب يا دوب بيقضي لوازم الحياة الضرورية ,, و ممكن يدبر قسط العربية بعد ما يحوش المقدم ,,,

انما يحوش مبلغ يجيب بيه العربية اللي عايز يجيبها بالتقسيط ,,, ده هياخد منه سنين طبعا ,,, و الناس مش عايزة كده ...

مش عارف انا بتكلم كتير ,,,

بس انا عايز اتكلم معاكم لان اغلبكم اكبر مني في السن ... و افكاركم تهمنى

و شكراً