[AbOnOrA]

طبعاً نهايه مؤسفة لمجادلات طااااااالت كتير بين عمرو وباقى الاعضاء محدش فينا اخد منها غير الصداع ووجع القلب
بس عايز اقولك حاجة ياعمرو والله بمنتهى الامانة كلنا قدرنا ناخد فكرة عن سنك وطبيعة خبراتك من بداية مشاركاتك فى المنتدى وصدقنى لا عمر كونك دكتور او مهندس او رائد فضاء حتى هيغير من انطباعات واراء الناس فيك او احترامهم لشخصك
فحاول دائما يكون اسلوب وقيمة كلامك هو مرايتك قبل الالقاب او الاسماء

اما بخصوص مشكلة دكتور بلبلان فانا باعتب على حضرتك فى جزئيين
اولاً بما ان الشخص اللى عمل معاك كده شخص من المنتدى واحتمال يكون خدع ناس قبلك او بعدك فلازم ادبياً على حضرتك انك تنبه باقى الناس وده بتوضيح اسم الشركة واسم الشخص بمنتهى الوضوح ويجب ايقافه من المنتدى تماماً اياً كانت صلاحياتة او اسهاماته او لقبه وده حق الناس

ثانياً حضرتك حكيتى على المشكلة فى احد اطوارها وطلبت منى عدم الافصاح عن الموضوع لحين وصولك والتأكد من المشكلة علشان منتهمش حد او نسوء سمعة حد بالباطل وانا احترمت موقفك جداً والتزمت بيه فعلاً حتى بينى وباقى اعضاء الإدارة حكيتلهم الموضوع بدون الاشارة للفاعل بالرغم من ان حضرتك قولتلى عليه
فكنت منتظر من حضرتك انك تخلينى اول واحد تطمنه وتعرفه حصل ايه علماً بان منذ شروعك فى كتابة الموضوع اديت رقم حضرتك لسيف وطلبت منه يبلغك بانزاعجى لاستمرار الموضوع ورغبتنا فى التدخل بس حتى الان لم اتلقى اى افادة من حضرتك وده حقى على حضرتك من واقع العشم والصداقة الشخصية قبل ما يكون باعتبار مسؤليتى عن المنتدى

فكده فيه حق عرب عندك يا دكتور ptmnlo123per16

اما بخصوص جوهر الحوار عن التأمين فهو قتل بحثاً فى مواضيع كتير وجمعنا فتاوى كتير بهذه الخصوص وانا نفسى عملت موضوع باسم ان كان التأمين حراماً فمن يعوض الغارمين
ورائى فى الموضوع باختصار ان التأمين عمل اهلى تعاونى الغرض بيه دفع الضرر وتعويض الغارمين (او من يخسر خسارة فادحة فى تجارتة او ممتلكاتة) واقرته الشريعة وعملت به الحضارة الاسلامية منذ مهدها وطبق من خلال بيت المال

وطبعاً ده خارج تماماً عن التشبيه بالتأمين على الزوجة والاطفال والكلام اللى اتقال ده وان كان فى ناس بتعمل كده فعلاً لكن ده تطبيق مختلف تماماً وخارج موضوعنا وخارج حتى عن ما اقرتة الشريعة واعرافنا ومعتقداتنا الشرقية عموماً والاسلامية بالاخص فالتأمين دفع للضرر بعضه او بعض من اثارة وليس رداً لقضاء الله الذى لاراد له

لكن احنا بنأمن على عربياتنا لانها غالية جداً حتى اغلى من قيمتها الحقيقية وبالتالى خسارتها بحادث او بالسرقة تعتبر غرامة وخسارة فادحة لمعظمنا ولا نطيق احتمالها مادياً

نفس الكلام ينطبق على اللى بيجب عربية بالقسط مش ممكن يدفع اقساط لعربية بعد ما اتسرقت ومش ممكن فلوس المودعين تروح عليهم فلازم تأمين يضمن لكل الاطراف حلول

نفس الكلام لو واحد جايب العربية ياكول عليها عيش لو خسرها هيبقى خسر تجارته واحيانا كل ما يملك وبرضو هيخش فى دائرة الغارمين

نفس الكلام حتى بره العربيات بندفع من مرتباتنا جزء علشان لما ينقطع سبب الرزق ده نلاقى دخل بديل وبره الناس بتدفع نسب كبيرة جداً من مرتباتها بشكل تأمينات او اشتراكات نقابية او اياً كان لتأمين دخل ثابت بعد انقطاع الدخل الاساسى فى حالة التقاعد او المرض

واكم من التطبيقات لنظم التأمين اللى من غيرها لا تستقيم الحياة للافراد او المؤسسات
لكن زية زى اى حاجة وارد فيها الإجادة والاسائه والإستفادة والضرر
بالنسبة لحضرتك يمكن علشان فيه عربية تانية او مبلغ العربية مش غرامة بالنسبة لحضرتك فممكن متأمنش بس بالنسبة التأمين مفيد ومهم جداً بل لاغناء عنه

وده كله لا يمنع ايمانا بربنا ابداً وبقضائه فمن يمنع قضاء الله اذا قدر لك ان تخسر مبلغ من المال او تخسر حياتك او تجارتك او اى شىء لامانع ابداً فقط على الانسان ان يحتاط وياخذ بالاسباب كما جاء فى الحديث (اعقلها وتوكل) حيث امر رسول الله صلى الله علية وسلم الرجل بان يربط الناقة خشية السرقة ثم يتوكل على الله لا ان يتركها ويكتفى بالتوكل

طبعاً ديه قناعتى الشخصية ولا تعتبر فتوى او امر ولا نهى فقط استعراض لرأى قد يحتمل الصواب او الخطاء وعلى كل انسان انه يبحث بنفسة (خاصة فى الموضوع ده) ويسأل اهل العلم ويستشير اصحاب الرأى حتى يصل لقناعتة الخاصة التى سيحاسب عليها امام خالقة
اللهم قد بلغت اللهم فاشهد

واعذرونى على الاطالة واتمنى ان تتسع صدوركم لرائى المتواضع ptmnlo123per122