السلام عليكم
دلوقتى كان عندى مشكلة فى الماروتى
لما ببقى طالع على اى نقلة بحرك الفتيس بسهولة عادى لكن العربية ذات نفسها مش بتاخد النقلة على طول يعنى بقعد عمال ازود بنزين و فجأة العربية تاخد النقلة بعد ما اكون زودت بنزين جامد فتقوم ناطة و ناتشة من مكانها و شبة طالعه امريكانى و النطة دى بتبقى جامدة اوى فى الغيار الاول و المارشدير و بتقل مع التانى و اقل مع التالت و اقل مع الرابع
مع العلم انى مغير طقم الكهربا و الفلاتر كلها و السيور و منظف الكاربراتير
فأنا كنت شاكك فى الدبرياج الديسك و الاسطوانة و البلية مع العلم ان العربية بتشد معايا كويس لحد 100 و موديلها 99 و مشميتش ريحة شياط
رحت للميكانيكى الخميس اللى فات المهم ركب العربية و جربها قالى دا كاربراتير مش دبرياج خالص
و وصفلى واحد بتاع كاربراتير فى امبابة
المهم رحتله كانت الساعة 2 قالى لأ انا مش بقبل عربيات بعد الساعة 1
المهم اتصلت بمركز الصفا اللى فى جسر السويس قالى انا بقبل عربيات لحد الساعة 4 و نص
طلعت على مركز الصفا و قالولى هنكشف على العربية و نقولك مصاريف التصليح و لو مش عايز تصلح هتدفع 25 ثمن الكشف قلتلهم ماشى
اخدت دور و الراجل جه كشف على العربية قالى الكاربراتير عايز يتحل و نشوف فيه ايه قلتله ماشى قالى المصنعية 100 جنيه غير ثمن اى حاجة عايزة تتغير كمان قلتله ماااااااااشى
فك الكاربراتير و بعد حوالى ساعتين ركبه تانى قالى الكاربراتير كان عايز يتنظف و احنا ركبنالك حاجة اسمها "بلية تعجيل" كانت مش موجودة عندك + جوان قاعدة كاربراتير
المهم دفعت فى الاخر 121 جنيه كالأتى
100 مصنعية تصليح كاربراتير
5 بلية تعجيل
5 جوان قاعدة كاربراتير
11 ثمن ضريبة مبيعات 10%
و قالى لازم تغير سلك البوجيهات علشان بيقطع قلتله ماشى و لو فيه اى حاجة تعالى تانى فى خلال اسبوعين
و طلعت بالعربية و حسيت بفرق جامد ما شاء الله و التقطيعه راحت تماما لكن انا اعيب على المركز فى كذا حاجة
1- غالى طحن يعنى انا لولا انى مزنوق فى الوقت كنت رحت عند اى محل تانى و مكنش هياخد اكتر من 50 جنيه و مش هياخد ضريبة مبيعات !!!!
2- طريقه مكسر جامد يعنى هتصلح الكاربراتير و تبوظ العفشة
3- بعد ما روحت بفتح الكابوت لقيت العمه بتلعب فى مكانها المهم فكيتها لقيت الصنايعى النص لبه بتاعهم ضيعلى الجوان الكاوتش الاسود اللى بيبقى ما بين العمه و الكاربراتير و طبعا فصلت انا واحد جديد من شنبر كاوتش قديم
4- كل ما ادوس بنزين جامد البدال بتاع البنزين ما بيرضاش يرجع تانى قمت جايب wd40 و رشيت على الكاربراتير من برا الموضوع اتظبط
5- كان فيه جزء من اجزاء الكاربراتير بيقع من مكانه كل ما ادوس بنزين قمت جايب سلكه نحاس و ثبته
لما كنت عندهم, مساعد الصنايعنى اللى عندهم و هو للعلم (عيل صغير) عمل الاتى
1- قالى لااااازم نغير سلك البوجيهات مع انه عمله اختبار و العربية مطفيه !!! سحر
أنا بحسن نيه قلتله غيره, المهم راح للمخزن ملقاش سلك بوجيهات الماروتى المهم كتبلى فى كارت الصيانه تغيير سلك البوجيهات.
اشتريت بعدها سلك بوجيهات جديد و ركبته المهم طلع مش معزول كربون فكان بيعمل خروشة فى الكاسيت المهم قولت اجرب اركب السلك القديم ركبته و جربت سلك سلك و شوفت الشرارة بعينى و عرفت انى كنت ضحية الاشتغاله او قلة الضمير
2- فك البوجيهات و قالى لااااازم تغير البوجيهات: مع انى كنت مكملتش بيها 1000 كيلو كل الحكاية ان كان عليه كربون بسيط علشان الكاربراتير كان عايز يتظبط و دا اللى كنت رايح علشانه فى المقام الاول المهم اخدت بالى فقلتله ركبها زى مهيا متغيرهاش و عايز اقولكوا انى مكمل بيها دلوقتى 9000 كيلو بدون اى مشاكل و ان شاء الله هغيرها فى معادها على 10000 كيلو
الخلاصة ان الصنايعى بياخد كلام المساعد بتاعه (العيل الصغير) عن ثقة عمياء و بيكتبه زى ما هو فى كارتة الصيانة بالاضافة ان مراكز الخدمة مش بتسألك القطعه دى ماشية كام كيلو و مش بتصلح لكن بتغير و الحمد لله انهم مقالوليش الكاربراتير لاااااااااازم يتغير
فالنتيجة انى طبعا مش هروحله تانى ابداااااااااا
و الحمد لله على كل حال