[بنت الجبري]

السلام عليكم ورحمة الله وبركاته
استاذ حمدي
كنت بادور ع النت بخصوص السيراميك لغاية ماوصلت للموضوع هنا
كلام الاعضاء عن حضرتك اعطاني احساس ان حضرتك امين وصادق في المعلومه اللي بتقولها وسجلت في المنتدى علشان اقدر اسأل حضرتك
انا باشطب في شقتي واتعقدت من عدم الامانه واللف والدوران اللي باقابلهم يوميا من الصنايعيه.. مسكت الشقه لمقاول وهو جاب الصنايعيه وكنت باسلمه الفلوس بدون نقاش ولما في يوم طلبت الحساب التفصيلي وقارنت اسعاره باللي باسمعه في السوق لقيت الاسعار غاليه في بعض حاجات لدرجة الضعف واحيانا الضعفين وحاليا بادور على سعر كل حاجة قبل مايعملوها لاني مابقتش واثقه فيه
المهم انا هاركب الصاله بالممرات بورسلين وهاعمل الاوض سيراميك باركيه والمطبخ والحمام سيراميك وفيه بلاطات ديكور ووزر
هو قال انه هيحاسبني المتر ب15 لكله ارضيات وحوائط
اما الباركيه هيتعمل عاشق ومعشوق (مش فاهمة يعني ايه) وعلشان كده هيحاسبني على ضعف المساحه يعني لو ركب 2 متر هياحسبني على 4 ونفس نظام المتر 15 جنيه
ياترى الحساب كده كويس ولا غالي؟؟ والمفروض حوض الحمام والمطبخ ساقط جوه رخامه ..المفروض هو يركب لي الرخامه وبانيو الحمام ولا ايه؟
اعتذر للاطالة وارجو من الله انك تلاقي وقت ترد على اسئلتي
شكرا جزيلا مقدما