المشاركة الأصلية كتبت بواسطة yasser .mk
بصى يا ستى .. بعد البحث والتحرى لقيت إن بيكانتو بـ 40 ألف هتبقى حالتها واقعة وعايزة شغل ومصاريف ووجع دماغ ولقيت إن الأقرب لبيكانتو (هيونداى i10 - إسبرانزا 113 A ) هيونداى برضه مش هتلاقيها بـ 40 ألف غير حالتها تعبانة ..لكن إسبرانزا ممكن تلاقى منها موديل حديث وبحالة جيدة بالمبلغ دة لكن عيبها الوحيد إنها صينى ...
ونصيحة من أخ أكبر ...
1- إنك لو هتشترى بيكانتو أو هيونداى i10 يبقى لازم تزودى المبلغ شوية علشان تلاقى حاجة نضيفة أو تشترى إسبرانزا 113a
2- إنك تشترى حاجة زيرو من المعرض رأساً وتكونى أول إيد تلمسها بحيث تدفعى المبلغ إللى معاكى مقدم والباقى بالتقسيط ...أو تشترى حاجة جديدة سعرها فى حدود من 40 إلى 50 ألف ...هتلاقى أشكال جديدة فى السيزوكى آلتو أوالفيات أونو ...الموديلات الحديثة شكلها حلو ...
........
أنا مش عاوز اجيبلك إحباط ..لكن مش عايزك تدبسى فى حاجة مضروبة ...والحل هو إنك تشترى جديد بالتقسيط أوتحاولى تزودى المبلغ شوية لو مصممة على بيكانتو ..أو تفكرى فى أنواع تانية ..... أو تصبرى شوية لغاية ما أجيبلك حاجة حلوة ..والله الموفق
|
متشكرة لحضرتك جدا استاذ ياسر علي التواصل والمتابعة رربنا يجعله في ميزان حسنات حضرتك يارب
بالنسبة للاسبرانزا مرفوضة عشان صيني مش مقتنعة اصلا بيها وكل ما اجيب سيرتها الناس تقولي ابعدي عنها ملهاش عمر
بالنسبة للI10 هي فعلا غالية وكمان عرفت ان قطع غيارها غالية من المنتدي من هنا فاستبعدتها من زمان
البيكانتو بقي عارفة ان عشان اجيب حاجة كويسة عيزالي 45 مثلا بس للاسف مش معايا يكمل وصعب اتصرف تاني يعني ممكن يكون أقصايا خالص خالص 42 وعشان كدة انا فعلا بدور علي حاجة لقطة مش حاجة عادية
بالنسبة للانواع التانية انا معنديش مشكلة في اي نوع تاني اقل بس اهم حاجة حالة ممتازة فابريكة دواخل عالاقل مش اقل من 2005 وسعر ميزدش عن 40 ومتكونش صيني وهي دي بقي المعضلة انا حاطة كمان الاتوس في الاعتبار بس معرفش ايه نظامها بصراحة
بالنسبة للالتو والماروتي مستبعدين عشان انا مجربة الماروتي مريحتنيش يمكن عشان كانت قديمة بس عمةوما انا مش عايزة اكررها والالتو اختها واللادا طبعا تقيلة جربتها معرفتش اسلك فيها لاني مبتدئة سواقة بردو
بالنسبة للجديد بقي دة صعب لان اغلب المبلغ هو من والدتي وهي مش عايزة تجازف بحاجة زيرو وانا كمان بصراحة لاني قلت لحضرتك انا مبتدئة سواقة بردو بس بردو مخدش حاجة تطلع روحي عند الميكانيكية
عمووووووما انا عارفة ان طلبي صعب بس زي ما حضرتك قلت هي اولا واخيرا ارزاق وانا مستنية اللي ربنا مقدرهولي وباخد بالاسباب وبجد الف شكر لحضرتك مرة تانية