[Hisham.Elgazzar]

المشاركة الأصلية كتبت بواسطة الهاك الصغير الملاحظات أولا بالنسبة للاسبراتير طلع في اسبراتير 131 سن طويل و 128 سن قصير وده اللي انا ركبته طبعا كنت بفضل الالكتروني بس اللي بيفهم فيه الميكانيكيه هوا العادي وجه كهربائي ظبته وخد 40 جنيه وبالنسبة للرداخ الياباني ركب قدام جنب الماتور وطرمبة البنزين اللي ورا زي ماهي ومش واصلها كهرباء لمبة الرشاش مش بتضيء عداد دورات المحرك فصل وقالي خلي كهربائي يشغله تقيمي لاداء السيارة اول مادورت وفتحت الكبوت لقيت الماتور بيهتز كتير قالي اصل العربية بارده الكلام ده ماكانش موجود في الانجكشن صوت الماتور بقي هادي وضعيف طلعت اجرب العربية لقيت العربية بتسك يااااااه رجعت تاني لايام اللادا طبعا ده لازم يحصل مع الاسبراتير العادي لكن استنتاجي فعلا ان اي عربية انجكشن مهما كان ماتورها صغير اقوي من الكاربراتير العادي انا كان معايا دوجان كانت اسبراتير الكتروني وكانت سريعه طبعا بس معرفش الضعف من الاسبراتير العادي ام لا

موضوع مهم للغاية
تسلم إيدك على المجهود الرائع
بعد إذنك عندى تعليق على سعر الموبينة لأنى من شهر ونص كنت بشتريها ب 65 جنيه وهى إنجليزى ماركةHPC مشعارف إزاى بقت ب105

فى حاجة تانية برضو أحب ألفت نظرك ليها البيك بتاع السلانسيه فى الكربراتير الجديد كهرباء ولازم يكون شغال علشان العربية تبقى منتظمة فى السلانسية وفى المشى بدون مشاكل

الرداخ اليابانى (للتوضيح ماهو إلا عبارة عن طلمبة بنزين كهرباء يابانى لموديل معين فى المتسوبيشى لانسر وسعره 170 جنيه ، ويمتاز هزا الموديل بالفصل الاوتوماتيكى عند إمتلاء حوض الكربراتير ، يعنى مش محتاج لفايظ ( فلزم التوضيح للإخوة القراء الكرام)


أسلاك البوجيهات كما يظهر من الصورة انها جوده عالية ويفضل ان تكون جرافيت او كربوى يعنى لجودة التوصيل

الإسبراتير العادة مفيهوش مشاكل ، مع انه كان من الممكن تجيب إليكترونى بالمشط بتاعه والموبينة هيبقى أحسن شوية ، لكن العادة زى الفل شغال بيه من زمان


الكربراتير محتاج ظبط ، مش معقول تاخده من على الرف مركون او من على مكنة على الأرض من فترة ويركب وتحس بفرق فى السحب ، أهم حاجة المانيفولد والقاعدة بتاعته يكونوا اتركبوا كويس جداا بالجوان بتاعهم ويكون مفيش اى تسريب لازم تتأكد بنفسك وماتسمعش كلام الصنايعية المتفزلكين

ولو الكربراتير اتظبط صح وومفيش تنفيس ولا اى كلام يزعل تركب العمة وطبعا مع تغيير فلتر الهوا لأن القديم اكيد مسدووود وبيساعد على خنقة العربية

طبعا مش هننسى تغيير البوجيهات بنوع كويس اتنين او تلاتة شمعه ونظبط الخلوص بتاعها بالفلر على 0.5 علشان نخلى الإشعال قوى ومفيش نقطة بنزين تطلع نيه

وماتنساش ان الإنجيكشن ماعليك انك لما بتدوس بنزين بتفتح بوابة الهوا ، يقوم حساس الهوا ، مدى إشارة للكمبيوتر ، انه فيه هوا وبنزين عوزين يتحرقوا ، يقوم الكمبيوتر مدى إشارة للموبينة
بناء على حساس الكرنك بسرعة الدوران ، وتطلع الشرارة
تقابل البنزين ، ونتا وحظك لو مظبوط تمام هتحس ان العربية زى الفل ، لأن مفيش تقديم ولاتأخير ولو العكس هتكره حياتك وهتدفع اللى فجيبك ومفيش فايدة

اما الكربراتير بقى ده مخ لوحدة

بيظبط هوا وبنزين بكمية معينة وخلاص على كده
تظبط كهربتك على حساب المخلوط وشكرا
اول ماتدوس بنزين يدخل البنزين والهوا على المانيفولد على وش البستم على طول من غير تأخير وعطلة الكمبيوتر ، يبقى مين الافضل ؟؟؟


أخيرا وليس آخرا وآسف للإطالة لاحظت ان غطا التاكيهات غرقان زيت وخصوصا من عند الكامة من قدام (اويل سيل الكامة بيرشح زيت )

جرب النصايح بتاعتى ومنتظر النتايج

واى استفسار انا موجود ، وأستاز محمد القاضى يقدر يفيدك جدا

وكزالك المشرف المهندس / سيد عصام