[aga63]

ايه كل ده؟؟؟
على كده انا ح أتحسر على عربيتى القديمه (كنت مسميها زقزوقه) كانت جولف 1 مو 76 موتور 1300 (بالمناسبه انا راسلت الشركه وقالت جولف 1 مافيهاش موتور 1300 ولكنه 1100 ولكن خبراء المرور المصريين كانوا كاتبين فى الرخصه 1298 - شوفوا الدقه).
اما أعطالها فأول ماأخدتها بهدلتنى لحد ماغيرت موتور بواحد مو 81 وللأسف كان 889 سى سى فقط (انا اشتريته على انه 1300 من واحد بورسعيدى وكان معايا ميكانيكى كان شغال فى توكيل فولكس ولكن بعد ماراسلت الشركة الأم فى ألمانيا وليس المنيا ظهرت الحقيقة وكان الفرق فى حرف فى الموتور ممكن ادور عليه واكتبه لكم وهوه كود من B الى M حاجه كده)
المهم زقزوقه بعد تغيير الموتور وبارة دركسيون وجلب المقصات عاشت معايا 12 سنه بدون مشاكل تذكر وربنا يبارك للى إشتراها منى أنا غيرت الكبالن بعد 11 سنه مشيت فيهم حوالى 87000 كم. وجبتهم المانى بحوالى 360 جنيه غير الكاوتش والشحم والمصتعيه (انا ان شاء الله ممكن اكتب لكم التمن بالضبط ولمن مش ح يفيد قوى لأنه من سنه ونصف.
اما العفشة فيها فمشاكلها كانت فى الجزء اللى ماسك الشاسيه بالمقصات مع المطبات المصرية بيحتاج لحام. بس كل حوالى 40 الف معايا.
ارخص قطعة غيار فيها كانت سير الكاتينه ب 35 جنيه.
فلتر الهواء كان ب 48 جنيه.
طقم الدبرياج (انا غيرته مع الموتور ولم اغيره مره تانيه) كان بحوالى 850 جنيه.
العربيه انا أقصى سرعه جبتها وخفت أجرى بيها أكتر من كده كانت 140 كم/ساعه)
كانت بتعمل فى نص البلد 200 كم/صفيحه. ولما سافرت بيا الاسكندرية وكنت طول الطريق ماشى 100 كم/ساعه عملت معايا 320 الى 330 كم/صفيحه.
بالمناسبه بارة الدركسيون اليمين (القصيره فيها) كانت من 12 سنه بحوالى 180 جنيه (ساعتها كانت علبة دركسيون ال 128 مع البارتين بحوالى 160 جنيه) وجلب المقصات الواحده كانت ب 20 جنيه (بس الحاجات دى قعدت معايا 11 سنه بعدها) ودلوقت انا معايا لادا 1500 مو 84 غيرت جلب المقصات كلها فى خلال سنه (مرة فى الاول ومره من اسبوعين)!!!!.
كان سلك الدبرياج بتاعها (أعتقد كان فيها عليب) فيه مشكله بيتقطع من عند البدال كل 2000 كم.
طبعا هيه لاكانت انجكشن ولاحاجه كانت كاربيراتير عادى.
بصراحه زعلان عليها قوى بس ربنا يبارك للى أخدها ويديله خيرها ويكفيه شرها.
معلش انا طولت عليكوا وانا عارف انها عربيه قديمه مش جديده بس بصراحه كانت شايلانى وشايله مشاويرى. اى سؤال عنها او عن جولف 2 انا جاهز لأنى متابعهم كويس.
بالمناسبه انا لما غيرت موتور غيرت طقم روديه الموتور الجديد واتكلف ساعتها حوالى 1000 جنيه غير الموتور.
وكان ساعتها طقم البساتم فقط بحوالى 1600 جنيه (سبب رئيسي لاتخاذى قرار تغيير الموتور بدلا من العمره لآن بالحساب كانتالعمرة بتاعتها ح تتكلف 4600 جنيه سنة 1995 والموتور كلفى 2000 جنيه بدون روديه وخلافه) بس انا دلوقت مع العمره مش مع تغيير المواتير وانا لما غيرت كان أهم حاجه عندى انى ماأغيرش مكان قواعد الموتور على الشاسيه (اتعرض على اغير بموتور 1600 ولكن ده بيغيروا قواعد الموتور وانا لم اقبل هذا).