السلام عليكم
ازيكوا يا احلى شباب و اجدع ناس ... عاملين ايه ؟
يا رب تكونوا كلكم عال العال و زى الفل
حبيت النهاردة افتح معاكم موضوع للمناقشة
لو الفلوس ماتفرقش ,,, تركب جيب ولا سيدان؟؟؟؟
و طبعا يا ريت يكون فيه شرح للاسباب و وجهة النظر
عن نفسى ::: مش هتكلم على تقنيات ولا مواصفات انا هتكلم بس عن احساسى الشخصى
أنا بصراحة كان نفسى أركب جيب وده للاسباب دى
1- ان العربيات السيدان بتكون واطية على الارض فى اى مطب ممكن تحك بجسم العربية .. او انت بتركن و قدامك رصيف تسمع حكة الاكصدام و انت بتركن أو و انت ماشى خلاص انما الجيب طبعا تدوس بيها فى اى حتة.
2- القدرة التحميلية للعربيات الجيب اكبر من العربيات السيدان سواء للبشر او الشنط (ده طبعا على اعتبار اننا بنقارن عربيات من نفس الحجم الداخلى تقريبا يعنى ماتكونش السيدان مثلا مرسيدس شبح و تكون الجيب تيريوس)
لما ركبت اكتر من عربية جيب زى (انفوى ,, تريل بليزر,, شيروكى ,, باجيرو )(مع العلم ان مش كلهم دفع رباعى) بصراحة رجعت فى كلامى للاسباب دى
1-لما تركب العربية الجيب كدة تحس بالهيبة و كمان تحس انك ( راكب ميكروباص) و بصراحة الربع ساعة وجعت لى ظهرى مع انى ريحت الكرسى على كيفى. (تفرق من حد للتانى)
2- انا بحب الجرى ,,, طبعا مش فى كل وقت بس لما جربت اجرى بالجيب حسيت انى خايف
و لما جيت اخد غرزة حسيت انى هقع من العربية (نفس الاحساس و انا باخد ملف على الهادى) فا كدة الثبات انساه يا معلم و الايرودايناميكس فى البلالا و خصوصا فى الباجيرو
3- تحس ان العربية تقيلة كدة فى حركتها و فراملها مش عارفة تسعفك مع ان اقل موتور فى العربيات دى 6 سلندر 3200 سى سى و فيه مواتير 4200 سى سى (راكب صندوق).
من الآخر كدة حسيت انى كنت فى كابوس
مستنى ردودكم و تعليقاتكم